Read Jinghpaw Hanson Version Bible 1 KORINHTU 15 Bible Online

1 KORINHTU 15 - Jinghpaw Hanson Version Bible bible

1 KORINHTU 15

¹Bai hpunau ni e, ngai nanhte hpe tsun dan yu nna, nanhte mung hkam la ai hte, hkan nang yu manit dai kabu gara shiga a lam, ngai nanhte hpe naw shapraw shadan dan na made ai;

²ngai nanhte hpe tsun dan yu ai mungga hpe nanhte a manat nga nna, kaman lila sha kamsham ai n rai myit yang gaw, de a jaw e mung nanhte hkye hkrang la ai hkrum myit dai.

³Kaning rai nme law, ngai hkam la sai lam ngai nanhte hpe shawng na lak e ap ya masade ai; dai gaw, Chyum laika ni tsun ai hte maren, Hkristu gaw anhte a yubak a matu mara si hkam sai;

⁴makoi mayang ai shi hkrum nhtawm, Chyum laika ni tsun ai hte maren, masum ya nhtoi hta e bai hkrung rawt wa sai rai nna,

⁵Kehpa kaw paw pru dan wu ai; dai hpang e sape shi lahkawng kaw paw pru dan mu ai;

⁶dai hpang lang lata sha hpunau manga tsa jan shi hpe mu dat mu ai: shanhte hta malaw maga ya du hkra nga shajang nga ma ai; nkau mi chyawm gaw yup pyaw mat masai;

⁷dai hpang Yaku kaw, dai hpang kasa ni yawng hte kaw, shi paw pru dan mu ai;

⁸hpang chyahtum e, ngai nhtoi n gu ai ma zawn re ai wa kaw mung, shi paw pru dan ni ai.

⁹Kaning rai nme law, kasa ni hta kaji htum ai wa ngai rai nga nngai; Karai Kasang a Hpung hpe zingri zingrat nngai majaw, kasa ngu na pyi ngai n ging n dan nngai.

¹⁰Rai timung, ngai rai nga nngai hte maren, Karai Kasang a chyeju majaw ngai rai nga nngai; ngai hkam la ai shi a chyeju gaw, ngai hta e kaman lila n rai nga ai sha, shanhte nlang hte hta ngai grau nna bungli gun hpai nngai; dai gaw ngai n rai, ngai hte rau anga nga ai Karai Kasang a chyeju sha rai nga ai.

¹¹Dai rai nna, ngai rai timung, shanhte rai timung, dai lam hkaw dan ga ai hte, nanhte mung dai lam kamsham manit dai.

¹²Ya Hkristu gaw si mat ai ni kaw na bai hkrung rawt wa sai, hkaw dan nga ga yang, si mat ai ni a bai hkrung rawt wa ai lam n nga ai, nga nna nanhte hta na nkau mi kaning rai tsun lu nga myit ta?

¹³Si mat ai ni a bai hkrung rawt wa ai lam n nga yang gaw, Hkristu mung bai hkrung rawt wa na n rai.

¹⁴Hkristu gaw bai n hkrung rawt a yang gaw, anhte a hkaw dan ai ga kaman lila rai nga ai hte, nanhte a makam masham mung kaman lila sha rai nga ai;

¹⁵dai hta kaga, Karai Kasang a lam hta masu ai sakse ni anhte tai wa na saga ai; kaning rai nme law, Karai Kasang gaw Hkristu hpe hkrung sharawt nu ai, nga nna shi a lam anhte sakse hkam saga ai; rai timung, si mat ai ni teng teng bai n hkrung rawt ma yang gaw, Karai Kasang shi hpe hkrung sharawt wu ai n rai.

¹⁶Si mat ai ni bai n rawt ma yang gaw, Hkristu mung bai rawt wa na n rai.

¹⁷Hkristu gaw bai n rawt a yang gaw, nanhte a makam masham kaman lila rai nga ai hte, nanhte a yubak hta e nanhte naw lup mat manit dai.

¹⁸Dai hta kaga, Hkristu hta e yup pyaw mat ai ni mung sum mat ai hkrum masai.

¹⁹Anhte ndai aprat e sha Hkristu hta e myit mada shara lu ga yang gaw, shinggyim masha yawng hte hta grau nna matsan mayan hkrum ai ni, anhte rai nga ga ai.

²⁰Ya chyawm gaw, Hkristu si mat ai ni kaw na bai hkrung rawt wa sai rai nna, yup pyaw mat ai ni hta shawng si ai asi tai wa sai.

²¹Kaning rai nme law, masha a jaw e si hkrung si htan byin wa ai zawn, masha a jaw e mung si mat ai ni matu bai hkrung rawt wa na lam tai wa sai.

²²Yawng mayawng gaw Adam hta e si mat wa ai hte maren, yawng mayawng gaw Hkristu hta e bai hkrung wa na mara ai.

²³Rai timung, langai hte langai tinang ang ai hku hte maren rai wa na ra ai: Hkristu gaw shawng si ai asi rai nga ai; dai hpang, Hkristu bai du ai ladaw e shi hte seng ai ni hkrung wa na mara ai;

²⁴dai hpang e chyahtum ladaw du na ra ai; dai shaloi e shi gaw Kawa Karai Kasang kaw dai mungdan hpe ap ya na ru ai rai nna, du aya yawng mayawng mung, up ai ahkang hte hpung shingkang yawng mayawng hpe mung, shi yeng kau ngut nu ai:

²⁵kaning rai nme law, gumlau ni yawng hte hpe shi a lagaw npu e tawn da ai du hkra, shi up ai ahkang aya lu la na ru ai.

²⁶Hpang chyahtum na hpyen wa ngu ai, si hkrung si htan gaw, yeng kau ai hkrum na ra ai.

²⁷Kaning rai nme law, yawng mayawng hte hpe gaw shi a lagaw npu e tawn da nu ai, nga ai. Yawng mayawng hte hpe tawn da nu ai lam tsun yang, shi a npu na yawng mayawng hte hpe tawn da ai wa gaw n lawm nga ai, dan dan leng leng chye lu nga ai.

²⁸Yawng mayawng hte hpe shi a npu e tawn da ngut yang, shi a npu e yawng mayawng hte hpe tawn da ai wa a npu e mung, dai Kasha nan tawn da ai hkrum na ra ai rai nna, Karai Kasang gaw yawng mayawng hta e baw sumhpa tai na ra ai.

²⁹Dai hta kaga, si mat ai ni a matu mara baptisma hkam la ai ni gaw, kaning rai galaw nga ma ta? Si mat ai ni gaja wa bai n rawt ma yang gaw, shanhte a matu mara hpa majaw baptisma hkam la ma ta?

³⁰Anhte mung hpa majaw hkying shagu hta e hkrit shara e shang nga ga ta?

³¹Ngai gaw, hpunau ni e, shani shagu si hkam nga nngai, ngu nna anhte a Madu Hkristu Yesu hta e nanhte a lam ngai lu ai gumrawng shara hpe tau yu nna tsun wam nga nngai.

³²Ngai gaw Ehpesu mare hta e masha ni zawn, matse labye hte gasat nngai rai timung, nye a matu hpa akyu nga a ta? Si mat ai ni bai n hkrung rawt wa na rai yang gaw, anhte sha ga, lu ga, hpawt ni she si na ga ai.

³³Nanhte lam hkum dam myit; N kaja ai kanawn manang ni, mai kaja ai arawn alai hpe jahten ma ai.

³⁴Dingman ai hku hkan na, dum hprang mu, yubak hkum galaw myit; nkau mi gaw Karai Kasang hpe n chye ma ai: nanhte kaya dum myit ga, ning nga ngai tsun nngai.

³⁵Rai timung, si mat ai ni gaw kaning rai bai rawt lu na ma ta? kaning re ai hkum hte paw pru na ma ta? nga nna langai ngai san na ra ai.

³⁶Angawk wa e, nang gat hkai ai nli mung n si mat yang gaw, tu hkrung wa ai n rai;

³⁷dai hta kaga, nang gat hkai ai gaw, tu na ra ai hkum hpe nang gat hkai ndai n rai; mam gu shing n rai kaga amyu nli sha nang gat hkai ndai rai nna,

³⁸Karai Kasang gaw jaw mayu ai hte maren, dai hpe hkum a jaw nga let, amyu kaga ga hpe tinang hte seng ai ahkum jaw shajang mu ai.

³⁹Hkum shan nga manga gaw amyu langai sha n re ai sha, masha a hkum shan kaga, yamnga shan kaga, u shan kaga, nga shan kaga, rai nga ai.

⁴⁰Sumsing lamu na hkum ni rai nga ai, ginding aga na hkum ni mung rai nga ma ai: sumsing lamu na hpung shingkang kaga, ginding aga na hpung shingkang kaga, rai nga ai.

⁴¹Ajan a hpung shingkang kaga, shata a hpung shingkang kaga, shagan ni a hpung shingkang kaga, rai nga ai; kaning rai nme law, shagan langai ngai shagan gale hta hpung shingkang shai nga ai.

⁴²Si mat ai ni a bai hkrung rawt wa na lam mung, dai hte maren rai nga ai. Dai gaw hten mat chye ai hta gat hkai nga ai, n hten n mat chye ai hta bai hkrung rawt wa ai;

⁴³arawng n lu ai hta gat hkai nga ai, hpung shingkang hta bai hkrung rawt wa ai; magrau n grang ai hta gat hkai nga ai, n-gun atsam hta bai hkrung rawt wa ai;

⁴⁴dinghta hkum tsawp hte gat hkai nga ai, wenyi a hkum hte bai hkrung rawt wa ai. Dinghta hkum tsawp nga ai rai yang gaw, wenyi a hkum mung nga na rai nga ai.

⁴⁵Dai hte maren, shawng na masha Adam gaw asak hkrung ai shinggyim masha tai wa ai, nga nna ka da nga ai: hpang chyahtum na Adam, chyawm gaw, jahkrung ya ai wenyi rai nga ai.

⁴⁶Wenyi hte seng ai mahtang gaw shawng nga ai n rai, dinghta ga hte seng ai shawng nga nga ai; dai hpang wenyi hte seng ai bai nga ai.

⁴⁷Shawng na masha gaw dinghta ga na rai nga nna, dinghta ga hte seng nga ai: hpang na masha chyawm gaw, sumsing lamu na rai nga ai.

⁴⁸Dinghta masha rai nga ai hte maren, dinghta ga hte seng ai ni mung rai nga ma ai; sumsing lamu na masha rai nga ai hte maren, sumsing lamu hte seng ai ni mung, rai nga ma ai.

⁴⁹Dinghta ga a gawng shing-yan hpe anhte gun ga ai hte maren, sumsing lamu a gawng shing-yan hpe mung, anhte gun na ra ga ai.

⁵⁰Hpunau ni e, ning nga ngai tsun nngai gaw, hkum shan yan asai gaw Karai Kasang a mungdan a sali wunli n dagraw lu ai hte, hten mat chye ai gaw, n hten n mat chye ai sali wunli hta shang lu na n rai.

⁵¹Yu mu, sung htum ai ga ngai nanhte hpe tsun dan made ga: anhte yawng yup pyaw mat na n rai;

⁵²rai timung, hpang chyahtum na pahtau ngoi wu ai shaloi e, akajawng sha, myi grip mi hta e, anhte yawng hte gaw lai mat na ra ga ai: dai pahtau gaja wa ngoi wu na ra ai rai nna, si mat ai ni gaw n hten n mat chye ai sha bai hkrung rawt wa na mara ai hte, anhte lai mat na ra ga ai.

⁵³Kaning rai nme law, ndai hten mat chye ai gaw, n hten n mat chye ai dagraw lu na ra ai; ndai si mat chye ai mung, n si n mat chye ai, dagraw lu na ra ai.

⁵⁴Ya ndai hten mat chye ai gaw, n hten n mat chye ai dagraw nga ai hte, ndai si mat chye ai mung, n si n mat chye ai gaw dagraw ngut yang she, Si hkrung si htan gaw padang e gamaw mayu kau ai hkrum nu ai, nga nna ka da nga ai hte maren, dik wa na ra ai.

⁵⁵Si hkrung si htan e, na a padang ninghkaw kanang nga nga a ta? Si hkrung si htan e, na a palen kanang nga nga a ta?

⁵⁶Si hkrung si htan a palen yubak rai nga ai; yubak a n-gun atsam gaw, dai jep ai tara rai nga ai.

⁵⁷Anhte a Madu Yesu Hkristu a jaw e anhte hpe padang jaw ai Karai Kasang chyawm gaw, a nga u ga law.

⁵⁸Dai re ai majaw ngai tsaw ngai ra ai hpunau e, nanhte gun hpai ai amu gaw dai Madu hta e kaman lila n rai nga ai dum chye nga let, ngang ngang kang kang, dakring dalang nga nga nna, dai Madu a bungli hta tutnawng e tsam mari shakut sharang nga nga mu law.