Read Jinghpaw Hanson Version Bible 1 KORINHTU 3 Bible Online

1 KORINHTU 3 - Jinghpaw Hanson Version Bible bible

1 KORINHTU 3

¹Ngai chyawm gaw, hpunau ni e, Wenyi myit rawng ai ni hpe zawn, nanhte hpe tsun dan lu made ai n rai; shinggyim ta naw re ai ni hte, Hkristu hta e ma chyangai hpe zawn, tsun dan yu masade ai.

²Garai n rin lu myit dai majaw, shat shatmai n re ai sha, chyu hkrai sha, ngai nanhte hpe gawn jaw made ai. Ya e pyi nanhte garai n rin lu myit dai:

³kaning rai nme law, nanhte shinggyim ta naw rai nga myit dai. Nanhte hta e manawn masham hte ga law ga la rai nga myit dai majaw, nanhte shinggyim ta naw rai nga myit dai hte, mungkan masha zawn, naw hkawm nga myit dai, n rai myit ni?

⁴Langai ngai gaw, “Ngai chyawm gaw, Pawlu hte seng nngai; bai kaga gaw, Ngai mahtang Apolo hte seng nngai,” nga nna tsun shajang myit yang gaw, nanhte mungkan masha hkrai rai nga myit dai, n rai myit ni?

⁵Apolo gaw kadai rai nga a ta? Pawlu mung kadai rai nga a ta? Shan gaw shangun ma rai nga nna, shan a jaw e nanhte kamsham ai kaw du lu myit dai: dai Madu e jaw da mu ai hte maren, shan langai hte langai shachyen lu ma ai.

⁶Ngai gaw hkai da nngai, Apolo gaw ntsin jaw wu ai: Karai Kasang e she tu shangun nga ai.

⁷Shing rai, hkai da ai wa gaw hpa n rai nga ai, ntsin jaw ai wa mung hpa n rai nga ai; tu shangun ai Karai Kasang chyu sha shabyin ya lu ai.

⁸Dai hta kaga hkai da ai wa hte ntsin jaw ai wa gaw langai sha rai nga ma ai; rai timung, tinang a shakut sharang ai hte maren, langai hte langai gaw tinang a shabrai lu la na mara ai.

⁹Anhte chyawm gaw Karai Kasang a shingdep shingtau ni rai nga ga ai: nanhte gaw Karai Kasang a yi hkauna hte, Karai Kasang a wahpang htingnu, rai nga myit dai.

¹⁰Karai Kasang ngai hpe jaw da ai chyeju hte maren, hpaji rawng ai nta shachyaw ai wa zawn, ngai npawt nhpang gaw da se ai; kaga hte gaw dai hta e gaw kahtap mu ai. Kaning rai gaw kahtap na hpe langai hte langai yu yu nga mu ga.

¹¹Kaning rai nme law, gaw tawn da sai, Yesu Hkristu ngu ai npawt nhpang hta kaga, kadai mung gaw da lu ai n rai.

¹²Marai langai ngai dai npawt nhpang hta e, aja, gumhpraw, lungseng, hpun, nawnam hte yi hku hte hte gaw kahtap dam a yang gaw, langai hte langai a bungli gaw dan pru wa na ra ai:

¹³kaning rai nme law, dai nhtoi gaw dai hpe shadawng dat nna, wan e gaw dai hpe shadan dan na ru ai; langai hte langai a bungli kaning rai nga ai gaw, dai wan e chyam ginhka na ru ai.

¹⁴Marai langai ngai a gaw kahtap ai bungli nan nawng rai nga lu yang gaw, dai wa gaw shabrai lu la na ru ai.

¹⁵Langai ngai a bungli hkru mat a yang gaw, shi sum mat ai hkrum na ra ai; rai timung, wan hte lawt ai zawn, shi hkum sha hkye hkrang la ai hkrum na ra ai.

¹⁶Nanhte gaw Karai kasang a nawku htingnu rai nga nna, Karai Kasang a Wenyi gaw nanhte hta e rawng nga malit dai hpe, nanhte n chye nga myit ni?

¹⁷Marai langai ngai Karai Kasang a nawku htingnu hpe sharun shabya nga yang gaw, Karai Kasang dai wa hpe sharun shabya kau na ru ai; kaning rai nme law, Karai Kasang a nawku htingnu gaw chyoi pra nga ai; nanhte mung dai zawn rai nga myit dai.

¹⁸Kadai rai timung tinang hkum hpe hkum hkalem nga myit ga. Marai langai ngai ndai mungkan ga e nanhte hta, Hpaji byeng-ya rawng nga nngai, nga nna grang a yang gaw, dai wa gaw hpaji byeng-ya lu la hkra, angawk angak tai wa u ga.

¹⁹Kaning rai nme law, ndai mungkan ga na hpaji byeng-ya gaw, Karai Kasang a man e angawk angak rai nga ai. Dai rai nna, Hpaji rawng ai ni hpe shanhte a hpaji hte shi shakrip mu ai;

²⁰bai, Hpaji rawng ai ni a myit ai lam kaman lila rai nga ai gaw, dai Madu chye ya nga ai, nga nna ka da nga ai.

²¹Dai re ai majaw, kadai rai timung masha hta e hkum gumrawng nga mu ga. Kaning rai nme law, yawng mayawng hte gaw nanhte a npu e rai nga ai:

²²Pawlu mung, Apolo mung, Kehpa mung, mungkan ga mung, hkrung mahkrung mung, si hkrung si htan mung, ya e nga ai hte htawm hpang e pra na ra ai mung, yawng mayawng hte gaw nanhte a npu e rai nga malit dai;

²³nanhte mahtang Hkristu a rai nga ai ni, rai nga myit dai; Hkristu chyawm gaw Karai Kasang a re ai wa rai nga ai.