Read Jinghpaw Hanson Version Bible 1 KORINHTU 5 Bible Online

1 KORINHTU 5 - Jinghpaw Hanson Version Bible bible

1 KORINHTU 5

¹Nanhte hta e hpye ai amu rai nga ai gaw, gaja wa pri kajai wa masai: maigan ni hta pyi n lawm ai hpye ai amu rai nga ai rai nna, marai langai mi gaw shi a kawa a num shaw nu ai, rai nga ai.

²Nanhte madaw gumlu gumlan rai nga myit dai rai nna, shing re ai amu galaw ai wa hpe nanhte kaw na shaden kau ai hkrum u ga, yawn ai myit n madun ai sha nga nga myit ni?

³Ngai chyawm gaw, hkumhkrang tsan gang timung, wenyi hte lawm nga ai rai nna, nanhte hte nye a wenyi ni, anhte a Madu Yesu a atsam hte zuphpawng nga yang,

⁴dai Madu a nhtoi hta e, ndai wa a wenyi hkye hkrang la ai hkrum u ga, hkumhkrang hten bya na matu,

⁵shing re ai wa Satan hpe ap ya na, ngu nna rau nga ai zawn, ndai amu galaw ai wa hpe anhte a Madu Yesu a mying ningsang hte, ya e pyi ngai jeyang ngut se ai.

⁶Nanhte a gumrawng gumtawng ai gaw mai kaja nga ai n rai. Matsi loi mi gaw muk tawng ting hpe shawawm dat wu ai, nanhte n chye nga myit ni?

⁷Nanhte matsi n rawng myit dai hte maren, muk tawng ningnan nanhte tai myit ga, dai dingsa matsi hpe htawk kau mu. Kaning rai nme law, Hkristu ngu ai anhte a Shalai wa hkungga gaw sat kau ai hkrum nu ai.

⁸Dai rai nna, dingsa matsi hte n rai, n hkru n hkra ai hte hpye ai amu ngu ai matsi hte mung n re ai sha, matsi n rawng ai san pra nna tengman ai hte, anhte poi galaw sha ga.

⁹Nanhte gaw hpye ai amu galaw ai ni hte n kanawn myit ga, shagun dat ai laika hta ngai nanhte hpe ka dat ni ai;

¹⁰rai timung, ndai mungkan ga na hpye ai amu galaw ai ni hte, nammak lawhpa ai ni, dip lu dip sha ai ni hte gawngngu sumla nawku ai ni hte n kanawn lu na, ngai n myit nngai: dai lam rai yang gaw, nanhte mungkan ga na pru mat wa na sha rai nga ai.

¹¹Ya chyawm gaw, hpunau ngu ai wa gaw, hpye ai hte nammak lawhpa ai, gawngngu sumla nawku ai, shatan nhkan ai, chyaru ya shang ai hte dip lu dip sha ai wa rai nga a yang gaw, n kanawn lu ai hta n-ga, shing re ai wa hte n jawm lu n jawm sha lu na, ngu nna nanhte hpe ka dat nngai.

¹²Kaning rai nme law, shinggan de nga ai ni hpe jeyang na, ngai hte hpa seng ga ta? Nanhte gaw kata de na ni hpe jeyang myit dai, n rai myit ni?

¹³Shinggan de nga ai ni hpe Karai Kasang jeyang nga ai, n rai ni? Dai n hkru n hkra ai wa hpe nanhte kaw na shaden kau mu.