Read Jinghpaw Hanson Version Bible 1 KORINHTU 6 Bible Online

1 KORINHTU 6 - Jinghpaw Hanson Version Bible bible

1 KORINHTU 6

¹Nanhte shada da amu rawng myit yang gaw, chyoi pra ai ni a man e n re ai sha, n ding n man ai ni man e tara dara hkam na, nanhte hta na langai ngai sa wam nga myit ni?

²Chyoi pra ai ni gaw mungkan ga hpe tara dara na mara ai, nanhte n chye nga myit ni? Mungkan ga gaw nanhte e tara dara ai hkrum a yang gaw, kaji htum ai lam hte hpe tara dara na, nanhte n ging nga myit ni?

³Anhte lamu kasa hpe tara dara na re ai, nanhte n chye nga myit ni? dai rai nna, dinghta lam hte hpe grau nna tara dara lu na, n rai myit ni?

⁴Shing rai yang, dinghta lam hte hpe tara dara shara nga myit yang gaw, Hpung kata e arawng n lu ai ni hpe nanhte tara agyi aya hta dang da ga myit ni?

⁵Nanhte kaya myit ga she ndai lam ngai tsun nngai. Hpunau shada a lapran e jeyang chye ai hpaji byeng-ya rawng ai masha langai mi pyi nanhte hta n nga a ni?

⁶Hpunau wa gaw hpunau wa hte n kam n sham ai ni a man e pyi, shawk hkat nga a hka?

⁷Shing rai, ya nanhte shada da shawk hkat ai amu rawng nga myit dai gaw, nanhte a shut ai lam majing rai nga malit dai. Hpa majaw sharu shatsang ai mahtang n hkam myit ta? Map lu map sha ai hpe hpa majaw n hkam myit ta?

⁸Nanhte chyawm gaw, hpunau ni hpe pyi, sharu shatsang ai hte map lu map sha myit dai.

⁹N ding n man ai ni gaw Karai Kasang a mungdan a sali wunli n hkam la lu na re ai, nanhte n chye nga myit ni? Lam hkum dam myit: hpye ai amu galaw ai ni mung, gawngngu sumla nawku ai ni mung, num shaw ai ni mung, ngang ai ni mung, la shada tam ai ni mung,

¹⁰lagu lagut ni mung, nammak lawhpa ai ni mung, chyaru ya shang ai ni mung, shatan nhkan ai ni mung, dip lu dip sha ai ni mung, Karai Kasang a mungdan a sali wunli hpe hkam la lu n rai.

¹¹Nanhte nkau mi gaw shing rai chyalu ni rai nga myit dai: rai timung, nanhte gaw anhte a Madu Yesu Hkristu a mying ningsang hte, anhte a Karai Kasang a Wenyi e kashin kamun kau ai mung, shachyoi shapra ai mung, dinghpring ngu ai mung, hkam la manit dai.

¹²Yawng mayawng galaw na ahkang ngai lu nngai; rai timung, yawng mayawng hte wa akyu byin ai n rai. Yawng mayawng galaw na ahkang ngai lu nngai; rai timung, hpa lam a jaw e mung, ngai mayam n tai mayu nngai.

¹³Shahpa gaw kan a matu, kan gaw shahpa a matu rai nga ai; rai timung, Karai Kasang gaw dai yan hpe rau jahten na ru ai. Dai hkumhkrang chyawm gaw hpye ai amu a matu n re ai sha, dai Madu a matu rai nga ai; dai Madu mung hkumhkrang a matu rai nga ai:

¹⁴Karai Kasang chyawm gaw shi a n-gun hte dai Madu hpe hkrung sharawt wu ai rai nna, anhte hpe mung hkrung sharawt na mi ai.

¹⁵Nanhte a hkumhkrang ni Hkristu a daw shan ni rai nga ai hpe, nanhte n chye nga myit ni? Dai rai yang gaw, Hkristu a daw shan ni hpe ngai jahka kau nna shawa num a daw shan ni shatai na rai nga a ni? Shing n rai law.

¹⁶Shawa num hte manoi ai wa gaw, shi hte hkumhkrang langai sha rai nga ai hpe, nanhte n chye nga myit ni? Kaning rai nme law, Shan lahkawng gaw hkum shan langai sha tai na mara ai, nga nna shi tsun da nga ai.

¹⁷Dai Madu hta manoi ai wa chyawm gaw, Wenyi langai sha rai nga ma ai.

¹⁸Hpye ai amu hpe zai nga mu: masha e galaw nga ai yubak nga manga gaw, tinang a hkumhkrang a shinggan e nga nga ai; hpye ai amu galaw ai wa mahtang gaw, shi a hkumhkrang hpe nan shut hpyit da wu ai.

¹⁹Dai hta n-ga, nanhte a hkumhkrang gaw, Karai kasang kaw na nanhte lu la ai hte, nanhte hta e rawng nga ai Chyoi pra ai Wenyi a htingnu rai nga ai, nanhte n chye nga myit ni? Nanhte gaw tinang hkum hpe pyi up lu ai n rai;

²⁰nanhte jahpu manu daw nna mari da sai ni rai nga myit dai: dai re ai majaw, nanhte a hkumhkrang hte Karai Kasang hpe shagrau sha-a nga mu law.