Read Jinghpaw Hanson Version Bible 1 KORINHTU 8 Bible Online

1 KORINHTU 8 - Jinghpaw Hanson Version Bible bible

1 KORINHTU 8

¹Ya, sumla ni hpe nawng ai hkungga a lam, anhte yawng mayawng chye ginhka ai myit rawng nga ai gaw, anhte dum chye ga ai. Chye ginhka ai myit gaw grang chye ai, tsawra ai myit chyawm gaw, shadaw shangang chye ai.

²Marai langai ngai, lama ma chye nngai, nga nna myit a yang gaw, chye mai ai lam pyi shi garai n chye wu ai:

³langai ngai gaw, Karai Kasang hpe tsawra a yang gaw, Karai Kasang gaw shi hpe chye da wu ai.

⁴Dai rai nna, sumla ni hpe nawng ai hkungga sha na lam gaw, sumla gaw ga ntsa e hpa n re ai sha rai nga ai hte, langai sha rai nga ai Karai Kasang hta kaga shaje n nga ai, anhte dum chye ga ai.

⁵Kaning rai nme law, sumsing lamu hte ginding aga ntsa e, Hpara ngu ai ni nga shajang ma ai rai nna, Hpara law law hte madu law law rai nga ma ai,

⁶rai timung, anhte a matu mara, Wa ngu ai, Karai Kasang langai sha rai nga ai rai nna, shi kaw nna yawng mayawng pru wa ai hte, shi a matu anhte rai nga ga ai; Yesu Hkristu ngu ai Madu mung langai sha rai nga ai rai nna, shi a marang e yawng mayawng rai nga ai hte, shi a majaw anhte rai nga ga ai.

⁷Rai timung, dai chye ginhka ai myit masha yawng n lu ma ai: nkau mi gaw ya du hkra sumla hta man ai majaw, hkungga sha ma yang, dai gaw sumla hpe nawng ai, dum nna sha ma ai; shanhte a myit nsam mahtang n-gun n ja ai majaw, awu asin hkrum ma ai.

⁸Rai timung, shahpa majaw Karai Kasang a man e anhte myi man pa na ga ai n rai: anhte n sha yang gaw, grit wa na ga ai n rai; sha yang mung, grau wa na ga ai n rai.

⁹Shing wa nga timung, nanhte a ahkang gaw n-gun n ja ai ni a myit kataw shara n tai u ga, sadi nga mu.

¹⁰Kaning rai nme law, nang gaw ginhka chye ai myit lu ninglen, sumla nta hta shat sha nga ai hpe, marai langai ngai mu a yang, dai wa a myit nsam n-gun n ja yang gaw, sumla hpe nawng ai hkungga sha gwi wa na, n rai ni?

¹¹Shing rai, na a chye ginhka ai a majaw, n-gun n ja ai wa gaw hten wa sai; dai hpunau wa a matu mara Hkristu gaw si hkam nu hka!

¹²Dai di yang, hpunau ni hpe shut hpyit nna shanhte a n-gun n ja ai myit nsam hpe machyi shangun myit yang gaw, nanhte Hkristu hpe shut hpyit nga myit dai.

¹³Dai rai nna, shahpa a majaw nye a hpunau myit kataw a yang gaw, nye a hpunau wa myit n kataw u ga, ngai prat dingsa e shan n sha na ni ai.