Read Jinghpaw Hanson Version Bible 1 KORINHTU 9 Bible Online

1 KORINHTU 9 - Jinghpaw Hanson Version Bible bible

1 KORINHTU 9

¹Ngai gaw nye myit shadang lu nngai, n rai ni? Kasa mung ngai rai nga nngai, n rai ni? anhte a Madu Yesu hpe ngai mu yu ni ai, n rai ni? nanhte gaw, dai Madu hta e, nye a magan rai nga myit dai, n rai myit ni?

²Masha kaga a kasa ngai n rai yang gaw, nanhte a ngai teng teng rai nga nngai; kaning rai nme law, nanhte gaw, dai Madu hta e, nye kasa aya a dazik rai nga myit dai.

³Ngai hpe san dinglik yu ai ni hpe, ngai tsun htang ai ga gaw, da ndai rai nga ai.

⁴Anhte gaw sha na lu na ahkang n lu ga ai kun?

⁵Kasa kaga ni hte, Madu a kanau ni hte Kehpa zawn, kamsham ai madu jan woi hkawm na ahkang, anhte n lu ga ni?

⁶Ngai hte Barnaba chyu sha lata bungli tawn da mayu yang, ahkang n lu ga ni?

⁷Kadai wa mi tinang a jarit hte majan amu gun a ta? Sun galaw nna dai hta na n di sha ai, kadai wa rai ta? Yamnga rem nna, yamnga chyu n lu n sha ai, kadai wa rai ta?

⁸Masha hku hkan nna sha, ndai lam ngai tsun nga n ni? Jep ai tara mung ndai lam tsun nga ai, n rai ni?

⁹Kaning rai nme law, Mam kabye ai nga a n-gup hpe ka dagraw ya lu na n rai, nga nna Mawshe a tara hta e ka da nga ai. Karai Kasang gaw usu ni hpe sha tsang nga ai kun? shing n rai, anhte a matu teng teng tsun nga ai kun?

¹⁰Gaja wa, hkauna galau ai wa gaw, myit mada let galau mai lu ai rai nna, mam kabye ai wa mung, mam lu la na myit mada ai hte kabye lu u ga she, anhte a matu shing nga ka da nga ai.

¹¹Anhte gaw nanhte hta e wenyi nli gat nhtawm, nanhte a dinghta jarit hpe anhte dan ga yang gaw, chyeju kaba ngu lu na a ni?

¹²Sara kaga ni gaw nanhte hta shing re ai ahkang lu ma yang gaw, anhte grau nna lu ang ga ai, n rai ni? Rai timung, dai ahkang hpe anhte n hkan ai sha, Hkristu a kabu gara shiga hpe n shadang u ga she, anhte lam shagu hta shakut sharang nga ga ai.

¹³nawku nta na chyoi pra bungli shachyen ai ni gaw, nawku nta hte seng ai hte hpe sha lu ma ai hte, tawn hkungri hpajang ai ni gaw, tawn hkungri na daw chyen, sha lu ma ai hpe, nanhte n chye nga myit ni?

¹⁴Dai hte maren, dai kabu gara shiga hkaw dan ai ni gaw, dai kabu gara shiga hta asak bau lu na, nga nna dai Madu hkang da nga sai.

¹⁵Ngai chyawm gaw, ndai ahkang hpe loi mi mung n hkan nngai. Shing rai, ngai hpe dai zawn di mi ga mung, ngu nna ndai lam hte hpe ngai ka da nngai n rai; kaning rai nme law, marai langai ngai nye a gumrawng shara shayuk ai hta, ngai si wa na gaw, nye a matu grau mai nga ai.

¹⁶Ndai kabu gara shiga hpe ngai hkaw dan nga yang, nye a matu gumrawng shara n nga ai; kaning rai nme law ngai n hkaw dan ai gaw n nga lu nngai; ngai n hkaw dan yang gaw, dingnye lu nngai.

¹⁷Dai rai nna, dai amu hpe nye a myit hte ngai galaw nga n yang gaw, ngai shabrai lu nngai; rai timung, nye a myit hte n galaw nga n yang gaw, kunhting aya hta san da ai sha rai nga nngai.

¹⁸Dai re ai majaw, nye a shabrai gaw hpa rai nga a ta, nga yang, dai kabu gara shiga hkaw dan ai shaloi, kabu gara shiga a ahkang nau wa ngai n hkan ai rai nna, jahpu n hpyi ai sha, dai kabu gara shiga hpe shagrin da na, rai nga li ai.

¹⁹Ngai gaw shing rai gade a ahkang npu e n nga timung, malaw maga hpe lum la lu hkra, yawng mayawng a mayam ngai tai nga nngai.

²⁰Yuda ni hpe lum la lu hkra, Yuda ni hta e Yuda masha zawn, ngai tai nga nngai; ngai hkum tara npu e n nga timung, tara npu na ni hpe lum la lu hkra, tara npu na ni hta e tara npu e nga ai wa zawn, ngai tai nga nngai.

²¹Ngai hkum Karai Kasang kaw tara kata ai wa n rai, Hkristu a tara npu e nga ai wa ngai rai nga nngai rai timung, tara kata ai ni hpe lum la lu hkra, tara kata ai ni hta e, tara kata ai wa zawn, ngai tai nga nngai.

²²N-gun n ja ai ni hpe lum la lu hkra, n-gun n ja ai ni hta e, n-gun n ja ai wa zawn, ngai tai nga nngai: nkau mi hpe lam langai ngai hte hkye hkrang la lu hkra, masha yawng mayawng hta lam yawng mayawng, ngai hkan shatsup nngai.

²³Dai kabu gara shiga a akyu hta ngai mung lawm lu u ga, dai kabu gara shiga a jaw e ngai yawng mayawng hte hpe hkan galaw nngai.

²⁴Gat shingjawng ai shara e yawng gat ma timung, marai langai wa sha dai kumhpa lu la nga ai, nanhte n chye nga myit ni? Shing rai nanhte lu la hkra gat shingjawng nga mu;

²⁵shingjawng poi hta hkying hkat ai ni gaw, lam shagu hta htang gam nga ma ai. Shanhte gaw hten byak chye ai janmau lu la hkra sharang ma ai; anhte chyawm gaw hten byak n chye ai janmau lu la hkra sharang ga ai.

²⁶Dai majaw tuk shamak re ai zawn, ngai gat nngai n rai; htwi hkat yang mung, nbung hpe ngai n htwi kau ai sha,

²⁷masha kaga hpe tara hkaw ngut ai hpang, ngai hkum nan sum kau ai n hkrum u ga, nye a hkum hpe ngai htwi kau nna, dai hpe shagrit da we ai.