Read Jinghpaw Hanson Version Bible 2 KORINHTU 11 Bible Online

2 KORINHTU 11 - Jinghpaw Hanson Version Bible bible

2 KORINHTU 11

¹Ngai angawk ai mara loi mi nanhte naw sharang ya mi ga, ngai ra nga nngai: gaja wa nanhte nye a lam sharang ya nga myit dai.

²Kaning rai nme law, Karai Kasang a nja nhpra ai hte maren, ngai nanhte a lam nja nhpra rai nga nngai; nanhte hpe hkawnsek hpe zawn Hkristu kaw jaw ya nna, madu langai sha hte ngai nanhte hpe hkungran ya made ai.

³Rai timung, lapu gaw shi a hkalem ai hte Ewa hpe lau kau wu ai zawn, Hkristu a san seng ai hte chyoi pra ai lam hpe kau da hkra, nanhte a myit mang hten na hpe, ngai tsang nga nngai.

⁴Kaning rai nme law, nanhte kaw sa du ai wa gaw, anhte n hkaw dan ai Yesu kaga a lam shi hkaw dan nna, nanhte n hkam la ai Wenyi kaga hpe nanhte hkam la myit dai hte, nanhte n hta la ai kabu gara shiga kaga hpe hta la myit yang gaw, shi a lam nanhte gaja wa sharang nga myit dai.

⁵Ngai chyawm gaw kaba htum ai kasa ni a lawu e loi mi sha pyi n grit nga nngai, ngai nawn nga nngai.

⁶Tsun ai ga hta zai ai zawn rai timung, chye chyang ai lam hta gaw dai zawn n re ai sha, nanhte a man e lam shagu hta, dai gaw yawng mayawng hta, dan dan leng leng pru wa sai.

⁷Nanhte grau wa myit ga, ngai hkum hpe ngai shagrit nna, jahpu n hpyi ai sha Karai Kasang a kabu gara shiga nanhte hpe hkaw dan ai gaw, ngai hta mara kap nga ai kun?

⁸Nanhte hpe galaw daw na, Hpung kaga ni kaw na ngai jarit hkam la ai gaw, shanhte hpe dip kashun sha nngai; nanhte hte rau nga nna lama ma ra ai shaloi, ngai kadai hpe mung n shatsang nngai:

⁹Makedoni mung na du sa ai hpunau ni chyawm gaw ngai ra mara shapraw jaw ma ai rai nna, nanhte hpe hpa mung n shatsang ai sha ngai sadi nga ai hte naw a sadi nga na nngai.

¹⁰Hkristu a tengman ai ga ngai hta rawng nga ai hte maren, ngai ning rai gumrawng shara nga ai hpe Ahkaia mung ginwang hkan e kadai mung hkum da lu na n rai.

¹¹Dai gaw hpa majaw rai kun? Nanhte hpe n tsaw n ra ai majaw rai kun? Karai Kasang gaw chye nga ai.

¹²Mara tam mayu ai ni mara n mu u ga hte, shanhte a gumrawng ai hta anhte hte maren sha shanhte tai u ga she, ngai galaw yu ai lam hpe naw a galaw nga na nngai.

¹³Kaning rai nme law, ning re ai ni gaw masu ai kasa ni hte, Hkristu a kasa ni a hpyi hpun nna hkalem ai bungli galaw ai ni rai nga ma ai.

¹⁴Dai gaw mau na shara n nga ai; kaning rai nme law, Satan pyi nhtoi hta na lamu kasa a hpyi hpun chye nga ai;

¹⁵dai rai nna shi a salung sala ni mung, dinghpring ai a ali ama ni a hpyi hpun nga ma ai hpe, amu kaba shadu na n rai: shanhte a jahtum na gaw, shanhte a bungli hte maren rai na ra ai.

¹⁶Bai ngai tsun nngai gaw, kadai mung ngai hpe angawk angak hkum aleng nga u ga: aleng nga myit yang gaw, ngai loi mi naw gumrawng nga lu n ga, angawk angak re ai wa hpe zawn ngai hpe naw hkap hkalum la mi.

¹⁷Ning nga nna gumrawng ai lam hta ngai sharawng nngai gaw, dai Madu ra ai hte maren ngai tsun nngai n re ai sha, angawk angak re ai ga zawn tsun nga nngai.

¹⁸Masha law law wa hkum shan lam hta gumrawng nga ma ai majaw, ngai mung gumrawng na nngai.

¹⁹Nanhte myit su nga myit dai rai nna, angawk angak re ai ni hpe kabu gara ai hte sharang nga myit dai.

²⁰Kaning rai nme law, marai langai ngai nanhte hpe rim yam ai, kashun sha ai, rim la ai, tinang a hkum hpe shagrau ai hte nanhte hpe shabyi kahpret ya myit yang gaw, dai wa hpe nanhte sharang ya nga myit dai.

²¹Anhte gaw n-gun kya ai ni zawn rai nga ga ai, ngu nna anhte a lam shatan let ngai tsun nngai; rai timung lam gale hta masha wa manoi nna nden ja nga a yang gaw, ngai mung dai lam hta nden ja lu nngai, ngu nna angawk angak re ai ga ngai tsun nngai.

²²Shanhte Hebre masha rai ma yang gaw, ngai mung rai nga nngai; shanhte Israela amyu rai ma yang gaw, ngai mung rai nga nngai; shanhte Abraham a aru arat rai ma yang gaw, ngai mung rai nga nngai.

²³Shanhte Hkristu a bungli gun hpai ai ni rai ma yang gaw, ngai mahtang grau nna rai nga nngai, ngu nna mana bu ai wa zawn ngai tsun nngai. Amu bungli grau nna ngai galaw nngai; htawng hkrat ai grau nna ngai hkrum nngai; ladu lai ai shingna ngai hkam ni ai; si hkrung si htan law law lang ngai hkrum nngai.

²⁴Yuda ni ngai hpe mali shi du na langai yawm yawm di nna, manga lang ndaw kayat ai shingna hkrum ni ai.

²⁵Masum lang hkawn hte adup ai mung ngai hkrum nngai; lang mi nlung hte kabai ai mung ngai hkrum nngai: masum lang li hten ai hta ngai lawm ni ai; lana mi hte lani mi tup nammukdara hta rawng nga nngai.

²⁶Law law lang ningwan hkawm nga nngai; hka e rap ai tsin-yam, damya hkrum ai tsin-yam, nye a amyu masha ni e di ai tsin-yam, maigan amyu ni e di ai tsin-yam, kahtawng mare hkan e hkrum ai tsin-yam, nam mali hkan e hkrum ai tsin-yam, nammukdara e hkrum ai tsin-yam, masu ai hpunau ni e di ai tsin-yam ngai a hkrum nga nngai;

²⁷amu bungli hte kyin dut ai hta, law law lang yup n lusha ai hta, kawsi ai hte hpang gara ai hta, law law lang lusha gam ai hta, kashung ai hte shinggu krin re ai, tsin-yam, a hkrum nga nngai.

²⁸Dai shinggan de na kyin dut ai hta kaga, Hpung ni yawng hte a lam myit ru myit tsang ai gaw, shani shagu ngai hpe a shadut shatsang nga ni ai.

²⁹Ngai gawng n kya yang, kadai gawng kya nga a ta? kadai kataw ai hkrum yang gaw, ngai myit n kahtet ai nga na kun?

³⁰Ngai gumrawng nga n yang gaw, nye a gawng kya ai lam ngai gumrawng nga nngai.

³¹Ngai masu magaw ga n tsun nngai gaw, htani htana e a nga ai Madu Yesu a Kawa Karai Kasang gaw chye nga ai.

³²Damasku hta e ngai hpe rim la na hkawhkam Areta a munggyi gaw Damasku masha ni a mare hpe a sin da nga wu ai.

³³ngai chyawm gaw, mare bunghku na hkuwawt hku e, ka hta shayawn jahkrat dat mi ai rai nna, shi a lata na lawt lu nngai.