Read Jinghpaw Hanson Version Bible 2 KORINHTU 12 Bible Online

2 KORINHTU 12 - Jinghpaw Hanson Version Bible bible

2 KORINHTU 12

¹N gumrawng nga ai gaw n nga lu nngai; rai timung dai gaw htaphtuk nga ai n rai: ya chyawm gaw, dai Madu kaw na myi le le ai hte shingran mu ai lam, ngai gaw tsun hpang na nngai.

²Ya shi mali ning na wa sai, Hkristu hte seng ai wa langai mi hpe ngai chye nngai; dai wa gaw masum na sumsing lamu du hkra woi lung wa ai hkrum wu ai: shi gaw hkumhkrang lawm ai kun, ngai n chye nngai, n lawm ai kun, ngai n chye nngai, Karai Kasang sha chye nga ai.

³Shing re ai wa hpe ngai chye nngai; shi gaw Paradisu de woi lung wa ai hkrum nna masha kadai mung tsun n ging ai kaba htum ai ga na wu ai:

⁴shi gaw hkumhkrang lawm ai kun, n lawm ai kun, ngai n chye nngai, Karai Kasang sha chye nga ai.

⁵Dai wa a lam ngai gumrawng na nngai: nye a gawng kya ai lam n rai yang gaw, nye hkum a lam ngai gumrawng na nngai n rai.

⁶Ngai gumrawng mayu timung, angawk angak ngai tai na nngai n rai; kaning rai nme law, tengman ai ga ngai tsun na nngai: rai timung, ngai hkum hpe mu ai hte nye a n-gup ga na lu ai hta n-ga, nye a lam kadai mung hpa n nawn mu ga, gumrawng na lam da kau na nngai.

⁷Ya dai chyahtum chyalai re ai shingran a majaw, ngai myit nau wa n kaba u ga, ngai hpe abyen na Satan a salung sala ngu ai, nye hkum shan hta ju ai aju ngai hkrum nga nngai; shing rai ngai nau wa myit n kaba nngai.

⁸Ngai gaw dai hta na lawt lu u ga, dai Madu hpe masum lang akyu hpyi nga nngai.

⁹Dai rai nna shi gaw, “Nye a chyeju gaw na a matu ram nga ai; masha a gawng kya ai hta nye a n-gun atsam hkum tsup nga ai,” nga nna ngai hpe tsun ni ai. Dai re ai majaw, Hkristu a n-gun atsam gaw nye a ntsa e a up nga u ga, nye a gawng kya ai hta grau nna ngai gumrawng na ra nga nngai.

¹⁰Dai rai nna Hkristu a jaw e hkam ai gawng kya ai, hkala nba ai, kyin dut ai, zingri zingrat ai hte nni nkri re ai hta ngai kabu nga nngai: kaning rai nme law, ngai gawng kya nga yang, n-gun atsam rawng nga nngai.

¹¹Ngai gaw angawk angak tai wa nngai; nanhte mahtang ngai hpe tai shangun ma ni ai: kaning rai nme nga yang, nanhte a shakawn kungdawn na hpe ngai hkam ang nga nngai. Ngai gaw hpa n re ai wa rai nga nngai rai timung, kaba htum ai kasa ni lawu e loi mi sha pyi n grit nga nngai.

¹²Gaja wa, shakut sharang ai amyu myu hte, lamik kumla mauhpa amu hte hpung shingkang ngu ai kasa kumla hte gaw, nanhte a ka-ang e dan wa sai.

¹³Kaning rai nme law, ngai nanhte hpe n sharu shatsang ai lam n lawm yang me, nanhte Hpung kaga ni hte kaning rai lawu grit nga myit ta? shing rai ngai shut ai mara hpe dat kau ya mi.

¹⁴Yu mu, ya masum lang ngu na hta nanhte kaw du na ngai jin jin rai ni ai rai nna, ngai nanhte hpe n sharu shatsang na nngai. Kaning rai nme law, nanhte a arung arai hpe ngai tam nngai n rai, nanhte hpe sha ngai tam nga nngai: kashu kasha ni gaw kanu kawa ni a matu sutgan mahkawng da na n ang ai sha, kanu kawa ni mahtang kashu kasha ni a matu mahkawng da na ang nga ai.

¹⁵Ngai chyawm gaw nanhte a myit masin a matu sutgan jahkrat mayu ai hta n-ga, nye a hkum hpe pyi jahkrat na grau nna ra nga nngai. Nanhte hpe ning rai ladu lai hkra tsawra nga nngai majaw, ngai hpe n dawng n yawt na mai nga a ni?

¹⁶Nanhte hpe ngai n sharu shatsang nga ai teng u ga; rai timung, ngai zai rawng nna hkalem ai hte nanhte hpe rim la nga ai, tsun nga myit yang gaw,

¹⁷nanhte hpang de shangun ai masha langai ngai hte ngai nanhte a arung arai hpe sen di sha nga nngai kun?

¹⁸Titu hpe ngai shadut jahkat nna, dai hpunau wa hpe shi hte rau shangun dat nngai. Titu gaw nanhte hpe sen di sha nga ai kun? Anhte gaw Wenyi langai sha hta hkawm nga ga ai, n rai kun? Lagaw hkang langai sha hta anhte hkawm nga ga ai, n rai ni?

¹⁹Bai, anhte gaw nanhte a man e mara raw ai ga tsun nga ga ai, nanhte a nawn nga myit ni? Hkristu hta Karai Kasang a man e nan, anhte tsun nga ga ai. Rai timung, tsawra ai ni e, nanhte hpe shadaw shalan na matu, lam yawng mayawng hte gaw rai nga ai.

²⁰Kaning rai nme law, nanhte hpang de ngai du yang, ngai ra ai hte maren nanhte n rai nga nna, nanhte ra ai hte maren ngai mung n rai nga na nhten, ngu nna ngai tsang nga nngai: gasat gala, manawn masham, n dawng n yawt ai, bra wa na lam, baw law ai ga, kadum kahte ai ga, grang ai ga hte kabrawng kabrang rai nga na hpe mung, ngai tsang nga nngai:

²¹nanhte hpang de ngai bai du ai shaloi, nye a Karai Kasang gaw nanhte a man e ngai hpe shagrit nhtawm, shawng e yubak galaw nna, tinang galaw ai n se ai lam hte, shut hpyit nna ngang ai amu a lam hta, myit n malai ai law law hte a majaw ngai myit yawn ai hkrum na nngai hpe mung, myit tsang nga nngai.