Read Jinghpaw Hanson Version Bible GALATI NI 1 Bible Online

GALATI NI 1 - Jinghpaw Hanson Version Bible bible

GALATI NI 1

¹Masha kaw na n rai, masha a ahkang majaw mung n re ai sha, Yesu Hkristu hte si mat ai ni kaw na shi hpe sharawt la ai Kawa Karai Kasang a ahkang majaw kasa rai nga ai ngai Pawlu hte,

²ngai hte rau nga ai hpunau ni nlang hte gaw, Galati mung na Hpung ni kaw ga shana dat ga ai.

³Anhte a Wa Karai Kasang hte Madu Yesu Hkristu kaw na chyeju hte ngwipyaw ai gaw, nanhte hta e anga nga malit ga law.

⁴Dai Madu gaw, anhte a Kawa Karai Kasang a myit ra ai hte maren, ya e rai nga ai n hkru ai mungkan ga na anhte hpe mawai la u ga, anhte a yubak a matu mara shi hkum hpe nan ap kau ya wu ai.

⁵Dai Kawa Karai Kasang kaw, htani htana prat dingsa e hpung shingkang anga nga u ga law. Amen.

⁶Hkristu a chyeju hta nanhte hpe shaga la ai wa kaw na nde wa alawan hka wa nna, kabu gara shiga kaga hpang de hkan nang myit dai majaw, ngai amau nga nngai.

⁷Dai kabu gara shiga kaga chyawm gaw, kabu gara shiga mai ngu na n re ai sha, Hkristu a kabu gara shiga hpe shabyak mayu nna, nanhte hpe sharu shatsang nga ai ni nkau mi rai nga ma ai.

⁸Rai timung, anhte nanhte hpe hkaw tsun dan ai kabu gara shiga hta kaga, anhte mung, sumsing lamu na lamu kasa mung, nanhte hpe hkaw tsun dan a yang gaw, shi dagam dala hkrum u ga.

⁹Nanhte hkam la manit dai kabu gara shiga hta kaga, marai langai ngai nanhte hpe hkaw tsun dan a yang gaw, shi dagam dala hkrum u ga, ngu nna shawng e anhte tsun ga ai hte maren, ya e ngai bai naw tsun nga nngai.

¹⁰Kaning rai nme law, ning nga tsun ai gaw, masha myi man pa na ngai ra nga nngai kun? shing n rai, Karai Kasang a myi man pa na ngai ra nga nngai kun? Masha ra ai hku hkan nang na ngai tam nga nngai kun? Masha ra ai hku ngai naw hkan nang nga yang gaw, Hkristu a ali ama ngai rai na nngai n rai.

¹¹Dai hta kaga, hpunau ni e, ngai hkaw dan yu ai kabu gara shiga gaw, masha myit ai lam hte maren n rai nga ai gaw, ngai nanhte hpe shadum jahprang made ai.

¹²Kaning rai nme law, masha kaw na ngai dai hpe hkam la nngai n rai; sharin achyin ya ai hte mung ngai n hkam la ai sha, Yesu Hkristu a shingran ga hte nan hkam la nngai.

¹³Yuda htung hta naw nga ai shaloi e, nye a arawn alai a lam nanhte na yu manit dai; Karai Kasang a Hpung hpe nachying ladu lai hkra ngai zingri zingrat nga nna, dai hpe akrin atsai di kau mawe ai.

¹⁴Nye a ji woi ni a matsun maroi ga a lam nachying nja nhpra rai nga nngai majaw, nye a amyu na rau ram manang ni law law hte, Yuda htung hta e ngai grau nna kaba wa nngai.

¹⁵Rai timung, dai Kasha a kabu gara shiga hpe maigan amyu ni hpe hkaw tsun dan u ga, nye nu a hkritung nna pyi ngai hpe san tawn da ai Karai Kasang gaw,

¹⁶shi a chyeju majaw ngai hpe shaga la nna shi Kasha a lam ngai hta shapraw dan na ra nga ai shaloi jang, ngai hkum shan yan asai hpe bawng yu nngai n rai.

¹⁷Dai hta kaga nye a shawng e kasa tai ai ni hte sa hkrum na, ngai Yerusalem de n lung wa ai sha, Arabi mung de sa nhtawm, Damasku mare de bai wa nngai.

¹⁸Dai hpang masum ning lai yang she Kehpa hte jahkrum na, ngai Yerusalem de lung wa nngai rai nna, shi manga ya tup shi hte rau anga nga nngai.

¹⁹Dai Madu a kanau Yaku hta kaga, Kasa gale hpe ngai n mu nngai.

²⁰Nanhte hpe ngai ka dat ai hta, masu magaw ga n lawm nga ai ngu nna, yu mu, Karai Kasang a man e ngai tsun nga nngai.

²¹Dai hpang e Suri hte Kiliki ginwang hkan e ngai sa du nngai.

²²Hkristu hta e nga ai, Yuda mung na Hpung ni chyawm gaw, nye a myi man hpe rai n chye n dum ma ai rai nna,

²³Shawng e anhte hpe zingri zingrat ai wa gaw, tinang nan shawng e akrin atsai di kau ai makam masham lam hpe, ya e hkaw tsun nga ai da, nga nna na la ai hte sha,

²⁴nye a lam Karai Kasang hpe shakawn kungdawn nga ma ai.