Read Jinghpaw Hanson Version Bible EHPESU 1 Bible Online

EHPESU 1 - Jinghpaw Hanson Version Bible bible

EHPESU 1

¹Karai Kasang a myit ra ai a majaw, Hkristu Yesu a kasa rai nga ai, ngai Pawlu gaw, Ehpesu mare hta e nga ai chyoi pra ai ni hte, Hkristu Yesu hta kangka rai nga ai ni hpe, ga shana dat nngai.

²Anhte a Wa Karai Kasang hte Madu Yesu Hkristu kaw na, chyeju hte ngwipyaw ai gaw, nanhte hta e anga nga malit ga law.

³Anhte a Madu Yesu Hkristu a Kawa rai nga ai Karai Kasang gaw, a nga u ga law: shi gaw sumsing lamu lahta tang hta e, Wenyi hte seng ai shaman ya ai lam amyu myu hte, Hkristu hta e anhte hpe shaman ya mi ai:

⁴anhte gaw tsawra ai myit hte, shi a man e chyoi pra ai ni hte mara n rawng ai ni tai wa u ga, ginding aga garai n lat yang nna, shi anhte hpe Hkristu hta e lata la ma ni ai.

⁵Tsawra htum ai Kasha a marang e, anhte hpe jaw dat mi ai hpung shingkang rawng ai chyeju a lam hpe shakawn kungdawn u ga,

⁶shi a shawang myit sharawng awng nga ai hte maren, Yesu Hkristu a jaw e, kasha yin la na chyeju hkam la lu u ga, shi anhte hpe shawng nnan e san da ma ni ai.

⁷Shi a n taw n tsang ai chyeju a majaw mung, tsawra htum ai Kasha a asai hta nan, htingrai htingrat na lam hte, yubak hpe raw dat kau na akyu, anhte lu la sagaw ai:

⁸shi a shawang myit na sung htum ai lam anhte hpe shadan dan yang,

⁹dai chyeju gaw hpaji byeng-ya hte kunghpan ai lam nlang hte hte, anhte hta e law htam wa sai:

¹⁰dai sung htum ai lam chyawm gaw, shi a sharawng awng ai myit hku hkan nna, Hkristu hta e myit shatawng da sai hte maren, madat da ai aten ladaw du wa yang, sumsing lamu tang na arai hpe mung, ginding aga na arai hpe mung, nga manga hte hpe Hkristu hta e gumhpawn tawn da na ru ai lam, rai nga ai.

¹¹Rai sa, shi hta e gumhpawn da na ru ai: shing rai Hkristu hta e shawng myit mada nga ai ni anhte gaw, shi a hpung shingkang hpe shakawn kungdawn nga lu u ga,

¹²shi a shawang myit bawng hkut ai lam hte maren, yawng mayawng shabyin da ai wa a myit shatawng da nna, anhte hpe shawng nnan e san da ma ni ai majaw, shi hta e mung anhte sali wunli tai wa saga ai.

¹³Nanhte mung, nanhte hpe hkye hkrang la sai kabu gara shiga ngu ai tengman ai mungga hpe na yu nna, shi hta e kamsham ngut yang, ndat da ai Chyoi pra ai Wenyi hte dazik kap ai, hkrum manit dai:

¹⁴Wenyi chyawm gaw, Karai Kasang a hpung shingkang shakawn kungdawn na lam a matu, shi mari da sai ni gaw htingrai htingrat ai chyeju lu la hkra, anhte a sali wunli a masat dingsat rai nga ai.

¹⁵Dai re ai majaw, Madu Yesu hta e mung, chyoi pra ai ni yawng hte hta e mung, nanhte lu nga ai makam masham lam hpe ngai na yu nngai majaw,

¹⁶ngai mung, nye a akyu hpyi ai hta nanhte hpe adum nga let, nanhte a lam shakawn kungdawn na, n sim n sa rai nga nngai.

¹⁷Anhte a Madu Yesu Hkristu a Karai Kasang ngu ai, hpung shingkang a Kawa gaw, shi hkum nan hpe chye chyang lu mu ga, hpaji byeng-ya hte shingran shapraw ai Wenyi nanhte hpe jaw ya u ga hte;

¹⁸shi shaga la ai a jaw e myit mada shara gaw gade wa kaba nga ai mung; n taw n tsang ai hpung shingkang rawng ai shi a sali wunli gaw chyoi pra ai ni hta e gade wa kaba nga ai mung; kamsham nga ai anhte hta e shi a nachying galu kaba htum ai atsam gaw, gade wa galu kaba nga ai mung,

¹⁹nanhte chye na lu myit ga, nanhte a kraw lawang na myi gaw htoi san wa malit ga, ngai hpyi nga nngai. Dai atsam chyawm gaw, shi a n-gun lagaw hte atsam shapraw wu ai hte maren,

²⁰Hkristu hpe si mat ai ni kaw na sharawt la yang, shi shapraw dat wu ai rai nna,

²¹du magam, hkang ai ahkang, hpung shingkang hte up ai aya lu ai ni nlang hte a ntsa e mung, ndai aprat hte htawm hpang na aprat e mying lu ai shingteng amying nlang hte a ntsa e mung, shi hpe shatsaw nna, sumsing lamu lahta tang hta, shi a hkra maga e dung nga shagun da wu ai.

²²Arai baw sumhpa hpe shi a lagaw npu e shi tawn da nu ai rai nna, yawng mayawng a baw tai na, dai Hpung kaw shi hpe jaw da wu ai:

²³dai Hpung gaw, yawng mayawng hpe jahpring shatsup lu ai wa a hkum tsup ngu ai Hkristu a hkumhkrang rai nga ai.