Read Jinghpaw Hanson Version Bible EHPESU 2 Bible Online

EHPESU 2 - Jinghpaw Hanson Version Bible bible

EHPESU 2

¹Nanhte mung, nanhte a tawt lai ai bungli hte yubak a majaw chyasi rai nga ai shaloi e,

²ndai mungkan a n-gawn shawa hte, nbung hta hkang ai du wa ngu ai, n madat mara ai kasha ni hta, ya e shachyen nga ai wenyi a lam hte maren, nanhte shawng e hkawm nga manit dai.

³Anhte nlang hte mung shanhte hte rau shawng e kanawn nga nna, anhte a hkum shan a marin marit ai lam hkan let, hkum shan hte kraw lawang na myit mang ai hku hkan galaw ga yang, shanhte gale hte maren pawt sindawng ging ai kashu kasha ni majing rai nga ga ai.

⁴Shing rai, tawt lai ai bungli a jaw e, anhte chyasi rai nga ga timung, nachying matsan dum chye ai Karai Kasang gaw, shi a tsawra ai myit kaba a marang e anhte hpe tsawra nna,

⁵Hkristu hte hpawn jahkrung ma ni ai; chyeju hte sha nanhte hkye hkrang la ai hkrum manit dai;

⁶Hkristu Yesu hta e anhte hpe chyeju jaw let, shi a nachying galu kaba htum ai chyeju hpe htawm hpang prat ni hta e madun dan nga u ga,

⁷Hkristu Yesu hte hpawn, shi anhte hpe sharawt la nna, sumsing lamu lahta tang e dung shangun ma ni ai.

⁸Kaning rai nme law, makam masham a marang e, chyeju hte sha, nanhte hkye hkrang la ai hkrum manit dai: dai gaw nanhte kaw na n rai, Karai Kasang a kumhpaw kumhpa sha rai nga ai:

⁹kadai mung gumrawng shara n nga u ga, magam bungli kaw na mung rai nga ai n rai.

¹⁰Kaning rai nme law, anhte shi a magam bungli rai nga ga ai; mai kaja ai bungli shachyen na, Hkristu Yesu hta e hpan da ai ni gaw, anhte rai nga ga ai: dai mai kaja ai bungli hta anhte hkawm nga u ga, Karai Kasang gaw dai ni hpe shawng nnan e lajang tawn da mu ai.

¹¹Dai rai nna, hkum shan hku yu yang, nanhte shawng e maigan ngu ai ni rai nga myit dai hpe, dum ngu mu; dai hkum shan hta e lata hte sha shabyin ai matu gadoi hkam ai ni gaw, Matu gadoi n hkam ai ni, nga nna nanhte hpe shamying nga ma ai;

¹²dai aten e Hkristu hta nanhte n lawm myit dai; Israela masha ni a mungdan a shinggan e nanhte nga ai hte, dai ga shaka hte seng ai ga ndat ni hta tsasam ni rai nga myit dai rai nna, mungkan ga hta myit mada shara mung, Karai Kasang mung, n lu ai sha pra nga myit dai hpe, dum nga mu.

¹³Ya chyawm gaw, shawng e tsan gang nga ai ni nanhte gaw, Hkristu a asai hte Hkristu Yesu hta e ni wa manit dai.

¹⁴Kaning rai nme law, shi gaw anhte a ngwipyaw ai lam rai nga ai; shi gaw, dai lahkawng rai nga ai hpe langai sha shatai let, lapran e din nga ai madin hpe sharun kau nu ai;

¹⁵dai n dawng n yawt lam ngu ai matsun maroi ga hta rawng nga nna, htet da ai ga hte seng ai jep ai tara hpe, shi a hkum shan hta e shi htawm kau nu ai; shing rai, dai amyu lahkawng gaw shi hta e masha ningnan langai sha hpan tawn da u ga, shi gaw ngwipyaw ai lam shatai wu ai:

¹⁶shi a hkum hta dai wudang a marang e, dai n dawng n yawt lam hpe shaza kau let, dai amyu lahkawng hpe Karai Kasang a matu hkumhkrang langai sha tai mu ga, shan a lapran e htinglu htinglai ya mu ai.

¹⁷Shing rai shi sa du nna, tsan gang nga ai nanhte hpe mung, ni nga ai ni hpe mung, ngwipyaw ai lam a kabu gara shiga hkaw tsun dan mi ai.

¹⁸Kaning rai nme law, an lahkawng gaw shi a marang e, Wenyi langai sha hte Kawa hpang de shang wa na lam lu la sagaw ai.

¹⁹Dai re ai majaw, ya gaw nanhte tsasam hte malet nhprang manam n re ai sha, chyoi pra ai ni hte rau, mung masha hte Karai Kasang a nta na ni, nanhte rai nga myit dai:

²⁰kasa ni hte myihtoi ni, gaw da ai wahpang npawt hta nanhte de kahtap myit dai; Hkristu Yesu nan dai hta e grau htum ai njut nlung rai nga ai;

²¹shi hta e wahpang langai hte langai, matut manoi htuk shachyaw sai rai nna, dai Madu hta e chyoi pra ai nawku htingnu de kaba wa sai:

²²Wenyi a jaw e Karai Kasang a rawng nga na wahpang tai myit ga, nanhte mung shi hta e jawm de nga myit dai.