Read Jinghpaw Hanson Version Bible EHPESU 6 Bible Online

EHPESU 6 - Jinghpaw Hanson Version Bible bible

EHPESU 6

¹Ma ni e, nanhte a kanu yan kawa hpe dai Madu hta madat mara nga mu: dai gaw ging dan ai lam rai nga ai.

²Nang ngamu ngamai ai hkrum nna, na a nhtoi gaw dai mungdan hta galu kaba nga lit ga, na nnu yan nwa hpe hkungga lara di mu,

³nga nna htet da ai ga gaw, ga ndat lawm ai, shawng na htet da ai ga rai nga ai.

⁴Nanhte mung, nu wa ni e, nanhte a kasha ni hpe masin hkum shapawt myit: dai Madu a sharin achyin ai hte daru shadum ai lam hta, shanhte hpe bau maka nga mu.

⁵Mayam ni e, Hkristu hpe madat mara ya ai zawn, hkrit gari nna myit mang langai sha hte, nanhte a mungkan madu ni hpe madat mara nga mu.

⁶Myi man pa mayu ai hte masha a myit shapyaw na zawn n rai; Hkristu a mayam ni zawn, myit masin ting hte Karai Kasang a ra ai hku galaw nga mu:

⁷masha a matu zawn n rai, dai madu a matu zawn sharawng awng ai myit hte, amu bungli galaw nga mu.

⁸Mayam rai timung, shanglawt rai timung, mai kaja ai bungli hpa rai timung galaw a yang gaw, dai Madu gaw, langai hte langai hte hpe jaw htang na ru ai, chye nga mu.

⁹Nanhte mung, madu ni e, shanhte hpe dai hte maren galaw nga nna, daru kajet ai lam hpe sharang kau mu: shanhte hte nanhte a Madu gaw sumsing lamu e adung nga ai rai nna, shi a man e myi man tau yu shara n nga ai gaw, adum nga mu.

¹⁰Ya kaw nna dai Madu hte, shi a n-gun marai a atsam hta e, n-gun lapyin rawng nga mu.

¹¹Nat e maw ai hkalem hkalau ai lam hte hpe nanhte manga kau lu myit ga, Karai Kasang jaw da ai hpyen hking nlang hte hpe bu hpun dagraw nga mu.

¹²Kaning rai nme law, anhte a gasat gala ai gaw, asai yan ashan hpe n re ai sha, du agyi ni hpe mung, ahkang aya lu ai ni hpe mung, ndai sin mak nga ai mungkan a hpung shingkang rawng ai ni hpe mung, sumsing lamu lahta tang e nga ai. n hkru n hkra ai nat a luksuk ni hpe mung, gasat gala nga ga ai.

¹³Dai re ai majaw, n hkru n hkra ai nhtoi hta nanhte ban hkum kau lu nna, lam shagu hte hpe shangut nhtawm, lahpran tsap nga lu myit ga, Karai Kasang a hpyen hking nlang hte hpe lang dagraw nga mu.

¹⁴Dai rai nna, nanhte a nshang hpe tengman ai hte kyit nna, dinghpring ngu ai sinda magap hpe dagap nhtawm,

¹⁵ngwipyaw shabyin ai kabu gara shiga hkaw tsun na jin jin rai nga u ga, lagaw hta kyepdin din let, lahpran tsap nga mu.

¹⁶Dai hta n-ga, n hkru n hkra ai wa a wan pala nlang hte hpe sat dang kau lu na, makam masham ngu ai n-gang hpe lang kahtap nga mu.

¹⁷Hkye hkrang la ngu ai hpri gup chyawp hpe chyawp nna, Karai Kasang a mungga ngu ai Wenyi a ntawng nhtu hpe, a hpye nga mu.

¹⁸Ahkying ladaw shagu hte hta e, akyu hpyi nna hpyi nem ai amyu myu hte, dai Wenyi hta hpyi nga nna, a maja nga let chyoi pra ai ni nlang hte a matu mara n-gun n yaw ai sha, tut tut akyu a hpyi nga mu.

¹⁹Dai kabu gara shiga a jaw e, hkang hkyihkyang hte hkang da ai kasa ngai rai nga timung, dai kabu gara shiga a sung htum ai lam hpe nden ja ai myit hte shana ya lu nna,

²⁰ngai mai tsun ai hte maren n hkrit n kang ai sha tsun dan lu hkra, nye a n-gup hpaw ai shaloi, tsun dan lu na mung sumtu, ngai hpe jaw ya u ga, nye a matu mung akyu a hpyi nga mu.

²¹Ngai hta byin ai hte, ngai kaning rai nga nga ai gaw, nanhte mung chye lu hkra, dai madu hta kangka re ai shingdep shingtau rai nga ai, tsawra ai hpunau Tuhkiku gaw, lam shagu nanhte hpe shana ya na marin dai:

²²nanhte gaw anhte a lam chye lu nna, nanhte a myit masin hpe shangwi shapyaw ai hkrum lu malit ga, ndai lam a majaw nan, ngai shi hpe nanhte hpang de shangun dat se ai.

²³Kawa Karai Kasang hte, Madu Yesu Hkristu kaw nna, ngwipyaw ai hte makam masham hta lawm ai tsawra ai gaw, hpunau ni kaw anga nga u ga.

²⁴Anhte a Madu Yesu Hkristu hpe n sawt ai myit hte tsawra ai ni nlang hte hta, akyu ara rai nga u ga law.