Read Jinghpaw Hanson Version Bible HPILEMON 1 Bible Online

HPILEMON 1 - Jinghpaw Hanson Version Bible bible

HPILEMON 1

¹Hkristu Yesu a bawng dung ai wa, ngai Pawlu hte hpunau Timohti gaw, anhte amu shingtau ai, tsawra ai wa Hpilemon hpe mung,

²an a kajan Ahpia hpe mung, an a hpyen manang Arhkipo hpe mung, na a nta e shanu ai Hpung hpe mung, ga shana dat ga ai:

³anhte a Wa Karai Kasang hte Madu Yesu Hkristu kaw na, chyeju hte ngwipyaw ai gaw, nanhte hta e anga nga malit ga law.

⁴Madu Yesu hpe mung, chyoi pra ai ni yawng hte hpe mung, nang tsawra ai hte kamsham lam hkan ai hpe, ngai na nngai majaw,

⁵Hkristu a matu anhte hta rawng ai kaja reng ai amu shagu a chye chyang ai lam hta, nang hkan shingtau ai makam masham gaw akyu shapraw lu lit ga,

⁶nye a akyu hpyi ai ga hta nang hpe adum nga let, Karai Kasang hpe ngai tut tut a shakawn nga nngai.

⁷Kaning rai nme law, hpunau wa e, na a marang e chyoi pra ai ni a myit masin shalan shabran hkrum lu ai majaw, na tsawra myit hta ngai grai wa kabu gara ai hte shangwi shapyaw hkrum nngai.

⁸Dai rai nna, nang mai galaw ai lam nang hpe htet dat na, Hkristu hta e ngai grai nden ja ai ahkang lu nngai rai timung,

⁹dingla wa Pawlu rai nga nngai hte, ya e Hkristu Yesu a bawng dung ai wa mung rai nga nngai majaw, tsawra ai hku she nang hpe hpyi nem dat na, ngai grau ra nngai:

¹⁰Ngai bawng dung nga yang, ngai shangai la ai, ngai sha Onesimu a matu ngai nang hpe hpyi nem dat nngai;

¹¹shi gaw shawng de na a matu akyu n rawng timung, ya gaw na a matu mung, nye a matu mung, akyu rawng nga ai:

¹²shi hkum nan hpe nang hpang de ngai bai wa shangun dat nngai; dai lam hta e nye a tsawra ai myit du nna lawm nga ai.

¹³Dai kabu gara shiga majaw bawng dung ai hta, shi gaw na a malai ngai hpe galaw jaw na, ngai kaw woi nga mayu nngai rai timung,

¹⁴na a chyeju gaw kaning n chyum nna n re ai sha, myit ra ai hku san san rai u ga, na a myit n lawm yang gaw, ngai kaning mung n rai mayu nngai.

¹⁵Kaning rai nme law, hpang de na a mayam wa zawn n rai, ngai du lawm hkra tsawra ai hpunau wa re ai hta n-ga, masha hking hku yu yang mung, Madu a lam hku yu yang mung, na a matu grau nna tsawra mai ai, hpunau wa zawn,

¹⁶tutnawng e nang kaw anga nga lu na she, shi nang hte tawng marang mi hka ai, rai dam nhten.

¹⁷Dai re ai majaw, nang ngai hpe kanawn manang zawn nawn ndai rai yang gaw, ngai hpe zawn shi hpe hkap hkalum la u.

¹⁸Shi nang hpe lama ma shut kau ai rai yang mung, hka kap ai rai yang mung, dai gaw nye a hka shatai u.

¹⁹Ngai Pawlu gaw dai hka wa na, ngu nna nye a lata hte nan ka dat nngai: rai timung, na hkum nan pyi ngai hpe hka wa ra ndai, ngu nna ngai n tsun mayu nngai.

²⁰Rai sa, hpunau wa e, na a majaw, dai Madu hta, ngai kabu gara nga lu n-ga; Hkristu hta e nye a myit masin hpe shangwi shapyaw ya rit.

²¹Na a madat mara na myit hpe kam ya lu de ai majaw, ngai tsun ai hta n-ga nang galaw na rin dai hpe, ngai chye let ka dat nngai.

²²Dai hta kaga, nye a matu nga na shara lajang tawn da u; kaning rai nme law, nanhte a akyu hpyi ai ga majaw, nanhte hpang de bai du na ahkang lu la na, ngai myit mada nga nngai.

²³Hkristu Yesu a majaw nye a bawng dung manang Epahpra gaw, nang hpe shakram dat ai:

²⁴nye a shingdep shingtau Marku, Aristaku, Dema, Luka mung, nang hpe shakram dat ma ai.

²⁵Madu Yesu Hkristu a chyeju gaw, nanhte a wenyi hte rau anga nga u ga law.