Read Jinghpaw Hanson Version Bible HEBRE 1 Bible Online

HEBRE 1 - Jinghpaw Hanson Version Bible bible

HEBRE 1

¹Karai Kasang gaw moi na lakhtak e, myihtoi ni a n-gup hte, ga htap law law hte lam amyu law law hta, ji wa ni hpe ga tsun da nhtawm e,

²ndai nhtoi ladaw na hpang jahtum ai hta, Kasha a n-gup hte anhte hpe ga matsun jaw da mani ai; dai Kasha hpe yawng mayawng a sali wunli hkam la ai wa tai na shi san da nu ai rai nna, shi hte mung nga yawng nga pra galaw da nu ai;

³shi gaw Karai Kasang a hpung shingkang a ningchya hte, shi a gawng shing-yan a hkrang sumla rai nga ai rai nna, shi a mungga atsam hte yawng mayawng hte hpe bau sin da ai: yubak mara hpe jasan jaseng kau ngut jang, matsaw ningtsang na daru magam a hkra maga de shi dung nga ai rai nna,

⁴lamu kasa ni hta reng grau ai amying ningsang hkam la lu ai majaw, shanhte hta grau reng ai wa tai nga ai.

⁵Kaning rai nme law, “Ngai Sha nang rai nga ndai, Dai ni ngai nang hpe shaprat sade ai, nga nna mung, Ngai gaw shi a Kawa tai nna, Shi gaw ngai Sha rai na ra ai,” nga nna mung, gara lamu kasa hpe galoi me tsun yu a ta?

⁶Dai hta kaga, dai Kasha alat hpe mungkan ga de bai jashawn dat ai shaloi e, “Karai Kasang a lamu kasa ni yawng shi hpe nawku mu ga,” nga dat ai.

⁷Lamu kasa ni a lam gaw, Shi a kasa ni hpe shi nbung shatai nna, Shi a ali ama ni grung ai wan hpe shatai wu ai,” nga nna shi tsun ai.

⁸Bai, dai Kasha a lam chyawm gaw, “Karai Kasang e, na a tingnyang htani htana anga nga ai; Shi a mungdan a sumdoi, dingman ai sumdoi rai nga ai.

⁹Nang dinghpring ai tsaw nna, yubak hpe n dawng ndai; Dai majaw Karai Kasang gaw, na a Karai Kasang, Na a manang ni hta, kabu gara namman hte nang hpe grau nna chya ya nit dai.”

¹⁰Bai, “Madu e, shawng ningpawt e, ginding aga hpe nang gaw da nna, Sumsing lamu, na a lata a amu rai nga ai:

¹¹Dai ni hten wa ma timung, nang agrin nga ndai: Yawng gaw hpun nba zawn dingsa mat na ma ai.

¹²Nba hpe zawn nang dai hte hpe katsu nna, Hpun nba galai ai zawn, galai kau ai hkrum na mara ai. Nang chyawm gaw dinggrin anga nga nna Na a shaning ni, htum ngu ai n nga ai,” nga nna tsun ai.

¹³Dai hta kaga, “Na a gumlau ni hpe na a lagaw na Kabye lahkum ngai shatai ai du hkra, Nye a hkra maga de naw adung nga u,” nga nna, gara lamu kasa a lam galoi me tsun yu a ta?

¹⁴Shanhte yawng mayawng gaw, hkye hkrang la ai Sali wunli hkam la na ni a matu mara, amu gun hpai shangun ai wenyi ni rai nga ma ai, n rai ni?