Read Jinghpaw Hanson Version Bible HEBRE 10 Bible Online

HEBRE 10 - Jinghpaw Hanson Version Bible bible

HEBRE 10

¹Jep ai tara gaw du na ra ai ngamu ngamai lam ni a hkrang sumla majing n rawng ai sha, de a shingna sha rai nga ai majaw, shanhte gaw tutnawng e nawng ya nga ai, shaning shagu na shagu hkungga amyu hte, sit shang shani wa ai ni hpe, galoi mung jahkum shatsup ya lu na n rai:

²jahkum shatsup lu ai rai yang gaw, daw jau ai ni hpe lang mi jasan jaseng kau ngut jang, hpang de galoi mung yubak mara a lam hpa myit dum shara n nga na majaw, shagu hkungga nawng ya na lam htum mat na sai, n rai ni?

³Ya gaw, dai nawng ya ai lam hta, yubak hpe myit dum myit hprang na lam, shaning shagu a rawng nga ai;

⁴kaning rai nme law, usu asai hte bainam asai gaw yubak mara hpe galoi mung yeng seng kau ya lu ai n rai,

⁵Dai re ai majaw, Hkristu gaw ndai mungkan ga de du sa yang, “Hkungga hte kumhpa hpe nang n ra nga ndai, Nang nye a matu hkumhkrang lajang da nit dai;

⁶Hkum dingyawng nat ai shagu hkungga hte Mara raw ai hkungga hpe, nang n sharawng ndai:

⁷Shaloi e, Laika shabawn hta nye a lam ka da nga ai gaw, Yu u, Karai Kasang e, nang myit ra ai hku hkan galaw na, ngai du sa ring ngai, ngu we ai,” nga nna tsun ai.

⁸Shing rai, Jep ai tara hte maren nawng ya mai ai lam shi gaw, Shagu hkungga, kumhpaw kumhpa, hkum dingyawng nat ai hkungga hte mara raw ai hkungga hpe nang n ra ndai hte, dai hpe n sharawng nga ndai, nga nna shawng tsun ngut jang,

⁹Yu u, nang myit ra ai hku hkan galaw na, ngai du sa ring ngai, nga nna bai tsun ai. Dai rai nna, hpang na lam hpe shagrin tawn da na matu, shi shawng na lam hpe yeng seng kau wu ai.

¹⁰Dai myit ra ai hku a gawp e, Yesu Hkristu a hkumhkrang hpe lang lata sha nawng ya ai a marang e, anhte gaw shachyoi shapra ai hkrum sagaw ai.

¹¹Hkinjawng ngu ai wa kadai mung, shani shagu daw jau nga let, yubak mara hpe galoi mung n raw kau ya lu ai, shagu hkungga amyu sha hpe law law lang nawng kahtap ya lu ai:

¹²shi chyawm gaw yubak mara raw kau ya ai hkungga langai sha hpe, prat dingsa na matu nawng ya ngut jang, Karai Kasang a hkra maga de dung nga sai rai nna,

¹³shi a gumlau ni hpe shi a lagaw npu e lagaw kabye lahkum tawn da ai du hkra, a la nga let, nga nga ai.

¹⁴Kaning rai nme law, shi gaw nawng ya ai hkungga langai sha hte, shachyoi shapra hkrum ai ni hpe prat dingsa na matu jahkum shatsup ya wu ai.

¹⁵Dai Chyoi pra ai Wenyi mung, anhte hpe sakse hkam ya mi ai: kaning rai nme law,

¹⁶“Da ndai, dai nhtoi ni a hpang e Shanhte hte ngai tawn da na ga shaka gaw, Ngai Madu nye a tara hpe shanhte a kraw lawang e bang da nna, Shanhte a myit hta ka da na we ai,” nga nna shawng tsun ngut jang,

¹⁷“Shanhte a yubak hpe mung, shanhte tara tawt lai ai hpe mung, ngai bai n dum na nngai,” nga nna bai tsun kahtap nga ai.

¹⁸Dai rai nna yubak raw dat na lam nga ai rai yang gaw, yubak a matu hkungga nawng ya shara, n nga na sai.

¹⁹Dai re ai majaw, hpunau ni e, Yesu a hkumhkrang ngu ai nba grang hkrang hkra,

²⁰anhte a matu shi waw ya ai ningnan hte hkrung ai lam hta, shi asai a gawp e dai chyoi pra ai shara kata de shang lu na, nden ja ai myit rawng nga ga ai hte,

²¹Karai Kasang a nta hta kaba htum ai hkinjawng agyi wa lu ga ai majaw;

²²n hkru n hkra ai myit dum chyalu hte lawt hkra, anhte a kraw lawang hpe lapri bun nna, anhte a hkumhkrang hpe mung san seng ai ntsin hte kashin kamun kau ngut jang, tengman ai myit masin hte, hkum tsup re ai makam masham hte, anhte sit shang wa ga:

²³anhte a myit mada shara hte seng ai nawku htung hta, n shamu n shamawt hkra, anhte maju jung nga ga; kaning rai nme law, ga ndat tawn da ai wa gaw, kangka re ai wa rai nga ai:

²⁴dai hta kaga, tsawra ai myit rawng wa na hte kaja ai amu bungli byin wa na matu, shada shingjawng hkat lu hkra, langai hte langai myit tau myit htang nga ga:

²⁵nkau mi wa htung nga ai zawn, anhte gaw tinang a zuphpawng ai lam hpe n koi n kau ai sha, shada da hpe shadum jahprang nga ga: dai nhtoi du magang ra ai hpe, nanhte chye myit dai majaw, shing rai shadum jahprang shara grau nna rai nga ai.

²⁶Kaning rai nme law, tengman ai a chye chyang ai lam hpe hkam la ngut sayang, yubak hpe dingsa sa galaw ga yang gaw, yubak a matu mara hkungga nawng ya na lam, naw nga sa na n rai:

²⁷dawdan hkrum na nga ai, nachying hkrithpa shara hte, nhtan shai ai ni hpe nat kau na sindawng kahtet ai wan sha, la nga na ra ai.

²⁸mawshe a tara hpe tawt lai ai wa gaw, matsan dum la ai n hkrum ai sha, sakse lahkawng masum a ga hte si ai hkrum lu ai;

²⁹dai rai yang gaw, Karai Kasang a Kasha hpe kabye shingkawt kau nna, tinang hkum hpe shachyoi shapra ya ai ga shaka a asai hpe awu asin di kau ai hte, chyeju madun ya ai Wenyi hpe n kaw n law di kau ai wa gaw, dai hta grau ai ari gade hkrum ging ai, ngu nna nanhte nawn da myit ta?

³⁰Kaning rai nme law, “Matai htang na ahkang ngai lu nngai, ngai tai na we ai, nga nna mung, Dai Madu gaw shi a amyu masha ni hpe tara dara na ra ai,” nga nna mung, tsun ai wa hpe, anhte chye nga ga ai.

³¹Hkrung nga ai Karai Kasang a lata de hkrat wa ai lam gaw, nachying hkrithpa lam rai nga ai.

³²Rai timung, jahtoi la hkrum manit dai hpang, tsin-yam tsindam kaba hte katut gasat hkrum ai shaloi na nanhte sharang lu ai, shawng de na nhtoi ni hpe bai dum nga mu:

³³Dai shaloi e, asawng asang hte zingri zingrat ai hkrum let, masha ni a man e yu chyai hpa mung, dai zawn hkrum ai ni hte jawm hkam ai manang ni mung, nanhte tai yu manit dai,

³⁴Dai hta n-ga, bawng dung ai ni hpe mung nanhte matsan dum manit dai; nanhte a arung arai kashun kashe la ya ai hpe mung, nanhte kabu gara ai myit hte hkam mana kau nna, dai hta grau reng ai dinggrin anga nga ai arung arai nanhte lu nga ai gaw, gaja wa chye dum myit dai.

³⁵Dai re ai majaw, shabrai kaba hte hpu ging ai nanhte a nden ja ai myit hpe, hkum kau hkum tat myit.

³⁶Kaning rai nme law, Karai Kasang a myit ra ai hku hkan shachyen ngut jang, ga ndat a akyu hkam la lu hkra, shakut sharang ai myit nanhte naw ra nga myit dai.

³⁷“Loi hkring sha mi rai jang, du sa na ra ai wa gaw N hkring n sa du sa na ra ai.

³⁸Nye a dinghpring ai wa chyawm gaw, kamsham ai hte hkrung na ra ai. Shi sit kanut mat wa yang gaw Nye a myit masin, shi hta sharawng awng na n rai,” nga ai.

³⁹Anhte chyawm gaw hten byak ai de sit kanut wa ai ni n rai; myit masin hpe hkye hkrang la lu hkra, makam masham rawng ai ni gaw, anhte rai nga ga ai.