Read Jinghpaw Hanson Version Bible HEBRE 11 Bible Online

HEBRE 11 - Jinghpaw Hanson Version Bible bible

HEBRE 11

¹Makam masham ngu ai gaw, myit mada ai arai ni a lam myit mu myit hkut nga ai hte, garai n mu yu ai arai ni a lam tau chye tawn lu ai hpe, ngu ai, rai nga ai:

²de a majaw mung, moi na ni gaw, sharawng awng ai sakse hkam ya ai, lu la ma ai.

³Nga yawng nga pra gaw Karai Kasang a mungga hte hpajang tawn da nga ai rai nna, mu lu ai arai ni gaw, dandawng nga ai arai ni hta na n byin wa ai hpe, kamsham ai hte anhte dum chye ga ai.

⁴Kamsham ai hte Abela gaw Ka-in hta grau kaja ai hkungga Karai Kasang hpe nawng ya wu ai rai nna, Karai Kasang mung shi a kumhpa ni a lam sakse hkam ya wu ai majaw, shi dinghpring nga ai, nga nna de a gawp e sakse hkam ya ai lu la wu ai: dai hpe yu yang, shi si mat sai rai timung, ga naw a tsun nga ai.

⁵Kamsham ai a majaw Enuk gaw si hkrung si htan n hkrum lu hkra, htawt la ai hkrum wu ai; Karai Kasang shi hpe jahtawt la wu ai majaw, shi n nga sai: kaning rai nme law, shi gaw Karai Kasang a sharawng awng ai wa rai nga ai, nga nna jahtawt la ai garai n hkrum yang, sakse hkam ya ai, lu la wu ai:

⁶makam masham n rawng yang gaw, shi a man e sharawng awng ai lu la na n rai; kaning rai nme law, Karai Kasang kaw sit shang ai wa gaw, Karai kasang nga nga ai mung, shi e hkan tam ai ni hpe chyeju htang jaw lu ai mung, kamsham lu na rai nga ai.

⁷Kamsham ai hte Noa gaw garai n mu yu ai arai ni a lam shadum jahprang ai hkam la lu ai rai nna, shi a nta masha ni hpe hkye hkrang la na matu hkrit hkungga ai myit hte sanghpaw li shachyaw wu ai: shing rai kamsham ai hte shi mungkan ga hpe jeyang nna, makam masham hte seng ai dinghpring ai a sali wunli hkam la ai wa, rai wa ai.

⁸Abraham gaw, sali wunli hkam la lu na ra ai mung de pru hkawm wa na lam shaga la ai hkrum yang, gade sa wa ai shi n chye timung, kamsham ai hte madat mara nna pru hkawm wa ai.

⁹Ga ndat hte seng ai mung hta e, masha tsasam a mung hta zawn, kamsham ai hte shi manam sa tai nga ai rai nna, ga ndat lam langai sha hta Sali wunli jawm hkam la lu ai Isak yan Yaku hte rau, sum hta sha rawng nga ma ai:

¹⁰kaning rai nme law, npawt nhpang grin nga ai hte, Karai Kasang de da ai shachyaw ngut sai mare hpe, shi myit mada nga ai.

¹¹Kamsham ai hte Sara pyi, prat lai mat sayang, na-um nasin rai wa lu na atsam lu la wu ai: kaning rai nme law, ga ndat tawn da ai wa kangka rai nga ai, ngu nna myit la wu ai.

¹²Dai re ai majaw, la chyasi zawn re ai wa langai hta na sha, sumsing lamu a shagan ni hte, nammukdara makau na n dang hti ai zaibru made, law htam wa ai kashu kasha ni pra wa masai.

¹³Ndai ni nlang hte gaw, ga ndat hte seng ai sali wunli n hkam la lu ai hte, tsan kaw na dai hpe tau mu nna shaga gintan let, ndai ga ntsa e tsasam hte malet, nhprang manam sha tai nga ai hpe yin la nna, dai makam masham hta si wa masai.

¹⁴Shing rai yin la ai ni gaw, tinang nga na buga tam nga ma ai hpe, leng leng madun dan nga ma ai.

¹⁵Shanhte pru kau da ai buga hpe nan, bai dum ma ai rai yang gaw, nhtang wa lu na aten naw nga malu ai.

¹⁶Ya chyawm gaw, dai hta grau ai, sumsing lamu na buga ngu ai hpe, shanhte marit nga ma ai: dai re ai majaw Karai Kasang gaw, shanhte a Karai Kasang ngu na hpe, kaya wu ai n rai; kaning rai nme law, shanhte a matu mara shanu nga na mare, shi lajang da nu ai.

¹⁷Abraham gaw chyam yu hkrum ai shaloi, kamsham ai hte Isak hpe hkungga di nna nawng kau ya wu ai; Isak hta e na a amyu matu tai nga na ra ai,

¹⁸nga nna ga ndat ni hpe hkap hkam la ai wa gaw, shi a kasha shingtai hpe nan nawng kau ya wu ai;

¹⁹shing di nawng kau timung, Karai Kasang gaw si mat ai ni kaw na pyi bai sharawt ya lu ai, ngu nna myit kam wu ai: dai rai nna ga shadawn hku tsun yang, si mat ai ni kaw na shi hpe bai lu la wu ai.

²⁰Kamsham ai hte Isak mung, garai n byin yu ai arai ni a lam, Yaku yan Esaw hpe shaman ya wu ai.

²¹Kamsham ai hte Yaku gaw, shi si wa magang yang, Yawsep a kasha yan hpe shaman ya nna, shi a dawhkrawng matu hta madi let nawku wu ai.

²²Kamsham ai hte Yawsep gaw, prat htum wa magang yang, Israela a kashu kasha ni a pru wa na lam tsun jahprang da nna, shi a nra la lung wa na lam, ga madat tsun da wu ai.

²³Mawshe hpe shangai ngut yang, shi a kanu yan kawa gaw kamsham ai hte shata masum tup shi hpe makoi da mu ai; kaning rai nme law, dai ma gaw hpraw tsawm nga ai hpe, shan mu mu ai rai nna, hkawhkam a hkang da ai mungga hpe n hkrit ma ai.

²⁴Mawshe gaw kaba wa jang, kamsham ai hte Hpara-u a shayi sha a kasha ngu na hpe ndang kau wu ai;

²⁵tawng marang mi yubak a pyaw daw kadaw na hte, Karai Kasang a amyu masha ni hte rau tsin-yam tsindam hkrum na hpe shi grau ra nga ai rai nna,

²⁶Hkristu a matu aroi arip hkrum ai gaw, Egutu mung na sutgan hta grau kaja ai sutgan rai nga ai, myit nawn wu ai: kaning rai nme law, bai lu la na ra ai shabrai hpe shi myit tau mada nga ai.

²⁷Kamsham ai hte, Egutu hkawhkam a masin pawt ai hpe n hkrit ai sha, dai mung na pru kau da wu ai, kaning rai nme law, myi hte n mu lu ai wa hpe mu lu ai hpe zawn, shakut sharang nga ai.

²⁸Kasha alat ni hpe sat kau ai wa, Israela masha ni hpe n hkra u ga, shi kamsham ai hte dai Shalai wa ai poi hte asai lapri bun ai lam, galaw hpang wu ai.

²⁹Kamsham ai hte shanhte gaw dai hkyeng ai nawng hta hkarang ntsa e zawn, rap lai wa ma ai: Egutu masha ni mung, dai zawn rap chyam yu ma yang, lup si ai hkrum ma ai.

³⁰Yerihko mare hpe sanit ya tup wang kawai hkawm ngut jang, kamsham ai hte de a bunghku ni daw ru hkrat mat wa ai.

³¹Shawa num Rahab gaw, kin-yu ni hpe hkap hkalum la wu ai majaw, kamsham ai hte n madat n mara ai ni hte rau hten bya n hkrum wu ai.

³²Dai hta kaga ngai hpa naw tsun na rai ta? kaning rai nme law, Gidon, Barak, Samson, Yephta, Dawi, Samuela hte hte myihtoi ni a lam hkai dan na nga yang, nye a aten n dang law nga ai:

³³dai ni gaw, kamsham ai hte masha mungdan ni hpe dang kau lu ma ai, dinghpring ai lam shachyen lu ma ai, ga ndat ni hkam la lu ma ai, hkanghkyi a n-gup pat tawn lu ma ai:

³⁴wan nsa hpe sat kau lu ma ai, ri nhtu hta na lawt lu ma ai, gawng kya ai shani e n-gun shaja ya ai lu la ma ai, majan shani e share lu ma ai hte masha tsasam ni a luksuk ni hpe jahtaw kau lu ma ai.

³⁵Numsha ni mung shanhte hte seng ai si mat ai ni hpe hkrung sharawt ai lam langai mi hte bai lu la ma ai: nkau mi chyawm gaw, gawng hte gang jen sharim ai hkrum ma ai, rai timung, grau reng htum ai hkrung sharawt la ai hpe dep la lu hkra, tinang hpe raw dat kau na n yin la hkraw ma ai.

³⁶Bai kaga nkau mi gaw, asawng asang, anu kayat re ai hta n-ga, gyit hkang sharen ai hte htawng hta bang da ai di nna chyam yu dinglik ai hkrum ma ai:

³⁷shanhte gaw, nlung hte kabai sat ai, nhtum nni zingri zingrat ai, zingret hte ret dut sat ai hte nhtu e htau kau ai hkrum ma ai: matsan mayan rai nna, nni nkri, aroi arip re ai hkrum let, sagu hpyi, bainam hpyi bu hpun nna htawt hkawm nga ma ai:

³⁸nam mali hkan e, bum alang, ga na ginlawng hku hte lungpu hkan e, shanhte let hkawm ma ai: rai timung, mungkan ga gaw shanhte hte n ging n dan nga malu ai.

³⁹Dai ni nlang hte gaw, makam masham a majaw sharawng awng ai sakse hkam ya ai lu la ma timung, ga ndat ni a akyu ara garai n hkam la ma ai.

⁴⁰Kaning rai nme law, anhte n lawm yang gaw, shanhte mung jahkum jatsup ai n dep lu mu ga nga, Karai Kasang gaw anhte a matu grau kaja ai lam hpang da ya sai.