Read Jinghpaw Hanson Version Bible HEBRE 12 Bible Online

HEBRE 12 - Jinghpaw Hanson Version Bible bible

HEBRE 12

¹Ya ndai hte wa law la ai sakse ni gaw, anhte hpe sumwi zawn wang kawan da mi ai majaw, anhte mung, numdaw numdan re ai lit nlang hte hte, kap loi la ai yubak hpe kau da nna, makam masham a npawt nhpang hte jahkum shatsup ya ai wa Yesu hpe azi yu let, anhte gat na matu san da ai lam hpe shakut sharang rai, gat shadu wa ga:

²dai madu gaw, shi a man e ang wa ai kabu gara ai lam majaw, kaya kahpa hkrum ai hpe hpa zawn n nawn ai sha, wudang lam hpe hkam nu ai rai nna, Karai Kasang a tingnyang hkra maga de wa dung nga sai.

³Nanhte a myit masin gawng run ai hte hki ba ai n hkrum malit ga, yubak kap ai ni a lata hte dai hte wa ndang kalang di kau hkrum sha ai wa hpe, myit dum nga mu.

⁴Nanhte gaw yubak hpe katut gasat na matu asai pru hkra garai n hkap daw yu myit dai:

⁵dai hta kaga, “Ngai sha e, dai Madu sharin ai hpe n gawn n sawn hkum rai et; Shi nang hpe daru yang gawng hkum run et;

⁶Madu gaw tsawra ai wa hpe sharin ga ai, Hkap la ai kasha nlang hpe kayat ga ai,” nga nna ma hpe sharin ai zawn, nanhte hpe shadum jahprang ai ga hpe nanhte malap kau manit dai.

⁷Daru sharin ya ai akyu lu la na matu, hkam sharang nga mu: Karai Kasang gaw nanhte hpe kasha zawn woi di da myit dai: kaning rai nme law, kawa e n daru sharin ai kasha, kanang nga a ta?

⁸Yawng mayawng hkam ga ai daru sharin la ai nanhte n hkrum myit yang gaw, nanhte kasha majing n rai, n-gyi sha rai nga myit dai.

⁹Bai lam mi gaw, anhte hpe daru sharin ya na matu, hkum shan hte seng ai kanu kawa anhte lu ga ai rai nna, anhte shanhte hpe hkungga lara di ga ai: dai hta grau nna, asak hkrung nga lu hkra, wenyi ni a Kawa npu e anhte mai taw nga ga ai, n rai ni?

¹⁰Shanhte gaw tinang ra ai hku hte maren tawng marang mi sha daru sharin ya lu mi ai; shi chyawm gaw, shi a chyoi pra ai anhte hkam la lu u ga, anhte a akyu matu daru sharin nga ai.

¹¹Daru sharin ya ai lam magup gaw hkam sha ai shaloi e, pyaw hpa zawn n rai, yawn hpa zawn rai nga ai: rai timung, dai gaw htawm hpang e she dai hta sharin hkam sha ai ni a matu mara, dinghpring ngu ai ngwipyaw ai asi si shapraw ya nga ai.

¹²Dai re ai majaw, kya noi nga ai lata ni hte lapyin n rawng ai lahput ni hpe sharawt da ting mu;

¹³lagaw hten ai ni hkrihkraw n kashai ai sha, shamai ai hkrum lu mu ga, nanhte sa wa na matu, ding ai lam masun lajang mu.

¹⁴Masha yawng mayawng hte ngwipyaw lu hkra mung, chyoi pra ai hpe dep lu hkra mung, hkan tam nga mu; chyoi pra ai n rawng yang gaw, kadai mung dai Madu hpe mu lu na n rai.

¹⁵Nanhte hta na langai ngai, Karai Kasang a chyeju hkam la ai hta n yet mat myit ga mung, nanhte hpe sharu shatsang lu hkra, hka la ai ru tu pru nna, law malaw hpe awu asin di kau ai n hkrum myit ga mung,

¹⁶shat ma mi a matu sha hte kasha alat a akyu dut kau ai Esaw zawn, shut hpyit ai hte tara n hkungga ai wa n rawng nga malit ga mung, hkap yu sadi nga mu:

¹⁷kaning rai nme law, hpang e dai shaman ya ai akyu lu la mayu yang, shi shinggan kau ai hkrum nga ai hpe, nanhte chye nga myit dai: myi prwi pru ai hte myit malai shara nhtang tam katu timung, kanang na n mu la nu ai.

¹⁸Kaning rai nme law, nanhte gaw lata e ahtawk hkrum lu ai hte wan grung nga ai bum de mung, achyang amang re ai, nsin chyip mak re ai, laru ru ai,

¹⁹pahtau ngoi ai hte ga jahtau ai nsen wu ai shara de mung, du yu manit dai n rai; dai nsen hpe na yu ai ni gaw, ga hkaw mi muk shanhte hpe bai n tsun kahtap nu ga, hpyi nem ma ai:

²⁰kaning rai nme law, Yamnga pyi dai bum hpe hkra yang, nlung hte kabai sat kau mu, nga nna jep dat ai mungga hpe shanhte n jan lu ma ai;

²¹shing rai dan pru wa ai gaw dai hte wa hkrithpa rai nga ai majaw, Mawshe pyi Ngai nachying hkrit gari mat nngai, nga ai.

²²Nanhte chyawm gaw, Ziun bum hte hkrung nga ai Karai Kasang a mare ngu ai sumsing lamu na Yerusalem mare de mung, hti n dang lu ai lamu kasa wunawng wuwa ni hpang de mung,

²³sumsing lamu na jahpan hta lawm ai shawa zuphpawng hte kasha alat ni a Hpung de mung, yawng mayawng a tara agyi wa Karai Kasang hpang de mung, jahkum shatsup hkrum sai dinghpring ai ni a wenyi ni hpang de mung,

²⁴ga shaka ningnan a htinglu wa Yesu hpang de mung, Abela asai hta grau kaja ai lam chye tsun ai lapri bun ai asai hpang de mung, du manit dai.

²⁵Nanhte gaw dai mungga tsun dat ai wa hpe n ningdang kau myit ga, sadi nga mu; kaning rai nme law, ga ntsa na shadum jahprang ai wa hpe ndang kau ai ni yubak n lawt lu ma ai teng yang gaw, sumsing lamu de na shadum jahprang ai wa hpe nawng kau ai ni anhte gaw, dai hta grau nna n lawt lu na ga ai:

²⁶dai shadum jahprang ai wa a nsen gaw, dai shaloi e ginding aga hpe a shun dat wu ai; ya tawn da ai ga ndat chyawm gaw, Ginding aga hpe sha n rai, sumsing lamu hpe mung ngai lang mi naw anawn shangun dat na we ai, nga nna tawn da nu ai.

²⁷Lang mi naw, nga ai ga a lachyum gaw, n shamu n shamawt lu ai arai ni gaw dinggrin anga nga u ga, shamu shamawt lu ai arai ni hpe galaw da ai arai ni hpe zawn, yeng kau na nga ai, rai nga ai.

²⁸Dai rai nna, n shamu n shamawt lu ai mungdan lu ga ai majaw, anhte gaw hkungga lara nna agam ai myit hte Karai Kasang sharawng awng ai hku daw jau lu hkra, chyeju dum chye ai myit rawng nga ga:

²⁹kaning rai nme law, anhte a Karai Kasang gaw, hkru wa ai wan rai nga ai.