Read Jinghpaw Hanson Version Bible HEBRE 13 Bible Online

HEBRE 13 - Jinghpaw Hanson Version Bible bible

HEBRE 13

¹Hpunau shada tsawra ai myit tutnawng rai nga myit ga.

²Manam daw ai lam hkum malap kau myit: dai lam hta nkau mi gaw ndum n chye ai she, lamu kasa hpe daw hkrup masai.

³Sharen rau hkrum ai ni zawn, bawng dung ai ni hpe mung; nanhte hkumhkrang hte naw rai nga myit dai majaw, nhtum nni hkrum ai ni hpe mung, adum nga mu.

⁴Hkungran ai lam gaw, yawng mayawng a man e arawng lu u ga; hkungran ai yup ra mung, san seng nga u ga: kaning rai nme law, hpye ai amu galaw ai ni hte num shaw la shaw ai ni hpe, Karai Kasang tara dara na wu ai.

⁵Gumhpraw marin ai lam hkum hkan myit; nanhte lu ai made hte myit dik nga mu: kaning rai nme law, Ngai nang hte teng teng n hka na nngai, gaja wa teng teng n kau da na nngai, nga nna shi nan tsun nga ai.

⁶Dai re ai majaw, “Dai Madu ngai hpe karum ai wa rai nga ai, Ngai hpa mung n hkrit nga nngai: Masha wa ngai hpe hpa di lu na a ta?” ngu nna nden ja ai myit hte anhte tsun nga ga ai.

⁷Karai Kasang a mungga nanhte hpe tsun dan ai, nanhte a lam woi ningshawng ni hpe, adum nga mu: shanhte prat lai hkra hkan wa sai lailen ningli hpe myit sumru yu nna, shanhte a kamsham ai hpunda hkap hkra, hkan sharau nga mu.

⁸Yesu Hkristu gaw, mani, dai ni, htawm prat dingsa mung, maren anga nga ai.

⁹Sharin shaga ai lam tsasam amyu myu de hkum htawt hkum hkan myit: hkan nang ai ni a matu hpa akyu n shabyin ya lu ai shahpa lam hte n rai, chyeju lam hte she myit masin hpe shangang shakang lu na, mai kaja nga ai.

¹⁰nawku ai sum hta daw jau ai ni, sha na ahkang n lu ai hkungri langai mi gaw, anhte lu ga ai.

¹¹kaning rai nme law, hkinjawng agyi wa gaw yubak raw ai hkungga a asai hpe chyoi pra ai shara de la jashawn ngut jang, dai hkungga mang ni hpe dap shinggan e nat kau wu ai.

¹²Dai hte maren Yesu mung, shi hkum nan a asai hte dinghta masha ni hpe shachyoi shapra lu na matu, mare chyinghka shinggan e nni nkri hkam nu ai.

¹³Dai rai nna, anhte mung, shi hte rau aroi arip hkam let, dai dap shinggan shi hpang de pru sa wa saga.

¹⁴Kaning rai nme law, ndai dinghta ga e dinggrin nga na mare, anhte n lu ga ai; htawm hpang du na ra ai mare hpe, anhte tam nga ga ai.

¹⁵Dai rai nna, Karai Kasang a mying ningsang kajai tsun hkai nga ai n-gup n-gau a asi ngu ai shakawn kungdawn hkungga hpe anhte Yesu a gawp e, Karai Kasang kaw tutnawng e nawng ya nga ga.

¹⁶Mai kaja ai amu galaw na hte gam jaw gam ya ai lam, hkum malap kau myit; shing re ai hkungga hpe, Karai Kasang gaw sharawng awng nga ai.

¹⁷Nanhte a lam woi ningshawng ni a ga madat mara nna, shanhte a npu e taw nga mu: kaning rai nme law, shanhte gaw jahpan dan na ni rai ma ai rai nna, nanhte a myit masin a matu mara a maja nga ma ai: jahpan dan ai shaloi e, nanhte a matu akyu n shabyin lu ai yawn madai ai hte n rai, kabu gara ai myit hte dan lu mu ga, shanhte a npu e taw nga mu.

¹⁸Anhte a matu mara akyu hpyi ya mi; kaning rai nme law, lam shagu hta arawn alai kaja hkan mayu ga ai majaw, anhte a myit dum chyalu san pra mali ai, ngu nna myit mu nga ga ai.

¹⁹Ngai nanhte kaw alawan du lu na ahkang lu la n ga, shing rai hpyi ya na grau nna shadut dat made ai.

²⁰Anhte a Madu Yesu ngu ai, sagu hpung ni a sagu rem wa kaba hpe, htani htana ga shaka asai hte si ai ni kaw na bai woi wa ai, ngwipyaw ai a npawt Karai Kasang gaw,

²¹Yesu Hkristu a marang e, shi a man e sharawng awng ai lam anhte hta shachyen ya let, shi a myit hkan nang lu hkra, kaja ai amu bungli shagu hta nanhte hpe jahkum shatsup myit ga; Yesu Hkristu kaw htani htana prat dingsa hpung shingkang anga nga u ga law. Amen.

²²Bai, lam mi gaw, hpunau ni e, dai shadum jahprang ga nanhte hkam sharang la na, ngai shadut jahkat dat made ai: kaning rai nme law, ga gadun hte sha ngai nanhte hpe ga shagun dat made ai.

²³Anhte a hpunau Timohti gaw raw dat hkrum sai hpe, chye nga manu; shi alawan du yang gaw, ngai shi hte rau sa nna, nanhte hte hkrum na ring ngai.

²⁴Nanhte a lam woi ningshawng ni nlang hte hte, chyoi pra ai ni yawng mayawng hte hpe, shakram ya mi: Itali mung na ni, nanhte hpe shakram dat ma ai.

²⁵Chyeju gaw nanhte mahkra hte rau anga nga u ga law. Amen.