Read Jinghpaw Hanson Version Bible HEBRE 2 Bible Online

HEBRE 2 - Jinghpaw Hanson Version Bible bible

HEBRE 2

¹Dai re ai majaw na la sai lam hta na anhte n yit mat wa u ga, dai hte hpe grau nna madat mara shara rai nga ai.

²Kaning rai nme law, lamu kasa ni a n-gup hte tsun da ai ga gaw, agrin nga ai rai nna, shut hpyit tawt lai ai hte n madat n mara ai lam yawng hte gaw, dai hte ging ang ai ari hkrum lu ai rai yang gaw,

³ndai hte wa galu kaba ai hkye hkrang la ai chyeju hpe n gawn n sawn di ga yang, anhte kaning rai lawt lu na ga ta? dai chyeju gaw shawng npawt e madu a n-gup hte nan tsun dan nna, na la ai ni gaw anhte hpe bai htawn tsun shangang da ai hte,

⁴Karai Kasang mung shi myit ra ai hte maren, lamik kumla, mauhpa amu, atsam rawng ai amu amyu myu hte mung, Chyoi pra ai Wenyi a karan jaw ai chyeju kumhpa hte mung, shanhte hte rau sakse dan ya ai.

⁵Kaning rai nme law, ya anhte tsun nga ga ai htawm hpang na mungkan ga hpe, lamu kasa ni a npu e, shi tawn da wu ai n rai.

⁶Langai wa mi shara mi hta sakse hkam wu ai gaw, “Nang adum nga ai shinggyim masha hte, Nang kawan yu nga ai masha kasha gaw, hpa wa mi rai nga a hka?

⁷Lamu kasa ni hta nang shi hpe loi mi sha shagrit da nna, Hpung shingkang hte arawng sadang ka-up ya nu ai. Na lata amu a ntsa e nang shi hpe up shangun wu ai.

⁸Nang yawng hte hpe shi a lagaw npu e tawn da nit dai,” nga ai. Dai rai nna, shi a npu e yawng mayawng hte hpe ap tawn da ai, nga ai gaw, shi a npu e n tawn da ai arai langai mi mung n ngam nga ai. Rai timung, arai yawng mayawng shi a npu e tawn da nga ai gaw, anhte ya garai n mu ga ai.

⁹Lamu kasa ni hta loi mi sha shagrit kau hkrum ai Yesu chyawm gaw, si hkrung si htan a nni nkri hkam la wu ai majaw, hpung shingkang hte arawng sadang ka-up nga ai hpe, anhte mu lu ga ai; shing rai shi gaw, Karai Kasang a chyeju majaw, masha yawng mayawng a matu, si hkam ai hkrum nga ai.

¹⁰Kaning rai nme law, kashu kasha law law hpe hpung shingkang hkam la ai de woi wa yang, shanhte a hkye hkrang la ai lam a agyi wa hpe nni nkri hte jahkum shatsup na yawng hpe up nna, yawng a npawt rai nga ai Karai Wa gaw, mai di nga ai.

¹¹Shing rai shachyoi shapra ya ai wa hte, shachyoi shapra hkrum ai ni gaw, langai sha hta rum nga ma ai: dai re ai majaw shanhte hpe hpunau ngu na shi n kaya ai sha,

¹²“Na amying nye a hpunau ni hpe ngai shana ya na nngai, Hpawng shingra ka-ang e nang hpe mahkawn mangoi na nngai,” nga nna mung,

¹³“Shi hta ngai shamyet shanat nga na nngai,” nga nna mung, “Yu u, ngai hte Karai Kasang ngai hpe jaw ya ai kashu kasha ni nga nga ga ai,” nga nna mung, shi tsun nga ai.

¹⁴Dai re ai majaw, kashu kasha ni asai ashan hkan dagraw ai zawn, shi mung, si lam up ai wa ngu ai Nat wa hpe shabyak kau lu na hte,

¹⁵si lam hpe hkrit nna, prat tup yamnga ai ni yawng hpe shalawt dat lu na lam si hkam ai hte shabyin lu hkra, dai hte maren asai ashan hta shang dagraw wu ai.

¹⁶Gaja wa teng teng, lamu kasa ni hpe hkap karum na shi sa ai n rai, Abraham a aru arat hpe hkap karum na she, sa ai rai nga ai.

¹⁷Dai re ai majaw, shi gaw Karai Kasang hte seng ai lam hta, matsan dum chye ai hte kangka re ai hkinjawng agyi tai nna, shinggyim masha ni a matu mara gawng malai hkungga jaw lu u ga, lam shagu hta kahpu kanau ni hte bung lu na, sun ang nga ai.

¹⁸Kaning rai nme law, agung alau hkrum let shi hkum nan nni nkri hkrum yu sai majaw, agung alau hkrum ai ni hpe shalan shabran lu nga ai.