Read Jinghpaw Hanson Version Bible HEBRE 4 Bible Online

HEBRE 4 - Jinghpaw Hanson Version Bible bible

HEBRE 4

¹Dai re ai majaw, shi a ban sa ai de shang lu na, ga sadi naw nga nga dingsa, nanhte hta na langai ngai dai de hkoi n dep lu na hpe, anhte myit tsang nga ga.

²Kaning rai nme law, shanhte hpe kabu gara shiga hkaw dan ai zawn, anhte hpe mung hkaw dan ma ni ai; rai timung, dai na la ai mungga gaw, na la ai ni hta kamsham ai hte n kayau gumhpawn ai majaw, shanhte a matu akyu n byin malu ai.

³Anhte kamsham saga ai ni chyawm gaw, dai ban sa ai de shang wa nga ga ai; dai hte maren, “Nye a ban sa ai hta shanhte n shang lu na ma ai, ngu nna pawt bu ai hte ngai dagam we ai shi nga ai;” rai timung, ban sa ai gaw, ginding aga ningnan lat yang, shi a magam bungli ni ngut ma ai kaw nna, rai nga sai.

⁴Kaning rai nme law, Karai Kasang gaw sanit ya nhtoi e shi a magam bungli ni mahkra ngut ma nna ban sa nga ai, nga nna sanit ya nhtoi a lam shara mi hta tsun da nga ai;

⁵bai, ndai yang e mung, Nye a ban sa ai hta shanhte n shang lu na ma ai, nga nna bai rawng nga ai.

⁶Dai rai nna, dai kabu gara shiga hpe shawng e na yu ai ni gaw, n madat mara ai a majaw dai ban sa ai de n shang lu ma ai rai timung, dai de shang lu ai ni nkau mi rai nga ma ai majaw,

⁷shawng de tsun ni ai hte maren, “Nanhte dai ni shi a nsen na myit yang gaw, Nanhte a myit masin hpe hkum shaja myit,” nga nna, aten dai hte wa na la sayang, Dawi a n-gup hte, Dai ni, ngu ai nhtoi hpe bai daw da wu ai.

⁸Kaning rai nme law, Yawshu gaw shanhte hpe ban sa shara jaw manu ai rai yang gaw, htawm hpang e nhtoi kaga a lam hpa tsun na nu ai n rai.

⁹Dai rai nna, Karai Kasang a amyu masha ni a matu mara laban ban sa ai nhtoi naw nga nga ai.

¹⁰Kaning rai nme law, Karai Kasang gaw shi a magam bungli ngut ma nna ban sa nga ai zawn, shi a ban sa ai hta shang lu ai wa mung, tinang a amu bungli ngut mat nna ban sa lu nga ai.

¹¹Dai re ai majaw, kadai wa mung n madat mara ai a ningli hkan nna, kataw kadawng n rai u ga, dai ban sa ai de shang lu hkra, anhte shakut shaja nga ga.

¹²Kaning rai nme law, Karai Kasang a mungga gaw, ahkrung nga ai hte alet nga ai rai nna, nshan lahkawng maga dai ai hpa baw ningtawng nhtu hta mung grau dai ai hte, myit masin hte wenyi hpe mung, nra hkrihkraw hte laswi hpe mung, dinghkren ginhka chye nna, kraw lawang na myit mamyit hte maw mawn ai hku hpe jeyang hparan ya lu ai.

¹³Shi a man e n dan n leng ai hpan da ai arai langai mi mung n nga ai; yawng mayawng gaw shi myi a man e dan leng nga ai hte asan brang lang rai nga ai rai nna, anhte shi a man e jahpan dan lu na ga ai.

¹⁴Dai rai nna, sumsing lamu de hkrang shang wa sai hkinjawng agyi kaba ngu ai, Karai Kasang a Kasha Yesu gaw anhte lu ga ai majaw anhte yin la ai nawku htung hta maju jung nga ga.

¹⁵Kaning rai nme law, anhte a gawng kya ai lam hpe matsan n chye dum ai hkinjawng agyi wa anhte lu ga ai n rai; lam shagu hta anhte zawn gunglau hkrum yu timung, yubak mara n kap ai hkinjawng agyi wa she lu ga ai.

¹⁶Dai rai nna, matsan dum ai hkam la lu na hte, kyin dut ai aten e shadaw shalan ai chyeju mu lu hkra, chyeju tingnyang man de, anhte nden ja ai myit hte sit shang wa ga.