Read Jinghpaw Hanson Version Bible HEBRE 5 Bible Online

HEBRE 5 - Jinghpaw Hanson Version Bible bible

HEBRE 5

¹Kaning rai nme law, masha hta na lata la ai hkinjawng agyi shagu gaw yubak a jaw e kumhpaw kumhpa hte shagu hkungga nawng ya u ga, Karai Kasang hte seng ai lam hta e, shinggyim masha ni a matu mara aya dang da ai wa rai nga ai:

²shi hkum dai mung gawng kya ai hte shinggrup nga ai majaw, n chye n chyang ai ni hte lam dam mat wa ai ni hpe, galu kaba ai myit chye madun ai wa rai nga ai;

³shing rai, mung masha ni a yubak a matu hkungga nawng ya ra ai zawn, tinang dai a yubak a matu mung nawng la ra nga ai.

⁴Dai hta kaga, kadai wa mung dai aya a arawng hpe tinang dai dang la lu ai n rai; Arun hpe zawn Karai Kasang shaga yang she, dang ya lu ai:

⁵Dai hte maren Hkristu mung, hkinjawng agyi tai na matu, shi hkum dai shagrau la wu ai n re ai sha, “Ngai sha nang rai nga ndai, Dai ni ngai nang hpe shaprat sade ai,” nga nna shi a lam tsun ai wa she, shi hpe shagrau wu ai.

⁶Dai hta kaga, “Nang gaw Melhkizedek a hkringhtawng lam hte maren, Htani htana hkinjawng rai nga ndai,” nga nna shara kaga mi hta shi naw tsun nga ai.

⁷Dai hkinjawng wa gaw, dinghta hkum shan hte naw pra nga ai nhtoi hte hta, si ai kaw na shi hpe mawai la lu ai wa kaw, akyu hpyi ai ga hte tawngban ai ga hpe, hkrap ngu hkrap ngoi nna myi prwi law law hte nawng ya ngut yang, shi a hkum tsup ai myit majaw hkap madat la ya ai hkrum nhtawm,

⁸Kasha wa teng nga ai rai timung, nni nkri hkrum ai hte madat mara ai lam sharin la yu ai;

⁹dai hte hkum tsup wa lu ngut jang, shi gaw, shi a ga madat mara ai ni yawng mayawng a matu, htani htana hkye hkrang la ai a npawt tai wa ai hte,

¹⁰Melhkizedek a hkringhtawng lam hte maren hkinjawng agyi rai nga ai, ngu nna Karai Kasang gaw shi hpe amying dang da wu ai.

¹¹Dai Melhkizedek a lam anhte tsun shara law law wa nga ai rai timung, nanhte a na dabang tsan nga malit dai majaw, ga lachyum tsun dan na yak la nga ai.

¹²Kaning rai nme law, aten hpe tau yu yang gaw, nanhte sara tai ram manit dai, rai timung, Karai Kasang a mungga hta na shawng na ga kanu hpe pyi, marai langai ngai e nanhte hpe naw sharin ya ra ai ni rai nga myit dai rai nna, ja ai shahpa hte n ram ai ni, chyu sha naw lu ra ai ni, tai wa manit dai.

¹³Chyu naw lu ai wa kadai mung, ma chyangai naw rai nga ai rai nna, mungga a dinghpring ai lam hta n man nga ai.

¹⁴Ja ai shahpa chyawm gaw, kaja ai hte n kaja ai hpe chye ginhka lu hkra, tinang a myit mang ai lam hpe len shaman ai hte shakung jahpan chye nna, hkum tsup nga ai ni a matu rai nga ai.