Read Jinghpaw Hanson Version Bible HEBRE 6 Bible Online

HEBRE 6 - Jinghpaw Hanson Version Bible bible

HEBRE 6

¹Dai re ai majaw, Hkristu a shawng npawt na ga kanu ngu ai, si ging ai magam bungli hta na myit malai lu ai lam, Karai Kasang hpe kamsham ai lam,

²baptisma hkam ai hte seng ai sharin shaga ai lam, lata mara jaw ai lam, si ai kaw na bai hkrung rawt ai lam hte htani htana dawdan hkrum ai lam hte hta, anhte npawt nhpang naw n gaw nan nga ai sha, dai hpe tawn da nna, hkum tsup re ai de dep hkra hkan shachyut nga ga.

³Rai sa, Karai Kasang hkraw a yang gaw, anhte shing rai hkan galaw na ga ai.

⁴Kaning rai nme law, jahtoi ya ai lang mi hkrum yu nna, sumsing lamu na chyeju kumhpa hpe chyim yu ai hte, dai Chyoi pra ai Wenyi hpe jawm hkam la nna,

⁵Karai Kasang a kaja htum ai mungga hte htawm hpang prat na hpung shingkang hpe chyim yu nhtawm,

⁶bai htak mat wa ai ni gaw, Karai Kasang a Kasha hpe tinang hkum nan wudang hta bai jen da nna, shi hpe n gawn n sawn di kau mu ai majaw, myit malai ningnan bai lu la na matu, lam kanang mung n hku malu ai.

⁷Kaning nga yang, tinang a ntsa e law law lang htu bun ai marang ntsin hpe lu la nna, shawt hkai ai ni a matu mai ram ai hkai nmai shaprut ya ai aga gaw, Karai Kasang a shaman ya ai hkrum lu nga ai;

⁸ju hpun hte atsing sha shatut yang chyawm gaw, kau da ai hkrum nna, dagam hkrum magang nga ai hte, de a jahtum gaw, wan nat kau hkrum na, rai nga ai.

⁹Anhte ning nga tsun ga ai rai timung, tsawra htum ai ni e, dai hta grau kaja ai hte, hkye hkrang la ai lam hte seng ai baw nanhte lu la na myit dai, ngu nna nanhte a lam anhte myit tawng ya ga ai.

¹⁰Kaning rai nme law, nanhte chyoi pra ai ni hpe galaw daw manit dai hta n ga, galaw daw dingyang rai nga let, Karai Kasang a mying nsang a matu magam bungli gun hpai nna tsawra ai myit madun ai lam hpe, malap kau ya na gaw, shi n ding n hpring nga ai, n rai.

¹¹Dai rai nna, nanhte gaw n lanyan nga ai sha, makam masham hte shakut sharang ai a majaw, ga ndat ni a sali wunli hkam la lu ai ni a hkan sharau ai ni tai myit ga,

¹²myit mada ai lam hpring tup wa na matu, langai hte langai prat htum hkra, dai zawn naw shaja nga na, anhte ra ga ai.

¹³Kaning rai nme law, Karai Kasang gaw Abraham hpe ga ndat da ai shaloi e, shi hta grau ai wa hpe gang nna dagam na n nga ai majaw, tinang hkum hpe gang let,

¹⁴Gaja wa, shaman ai gaw, ngai nang hpe shaman ya na de ai; shalaw ai gaw ngai nang hpe shalaw ya na de ai, ngu nna dagam wu ai.

¹⁵Shing rai, shakut sharang let la nga ai majaw, dai ga ndat a akyu shi hkam la lu wu ai.

¹⁶Shinggyim masha ni gaw, tinang hta grau kaba ai wa hpe gang nna dagam ga ma ai hte, shanhte a ndang kalang shara yawng hpe, dagam ai ga hte shagrin shangut kau lu ma ai;

¹⁷Karai Kasang mung, shi atut agrin nga ai bawng hkut da ai lam hpe, ga ndat ni a sali wunli hkam la ai ni kaw grau nna madun dan mayu ai shaloi e, dagam ai ga hte pahkam hkam da wu ai;

¹⁸shing rai, Karai Kasang gaw galoi mung n masu kau lu ai, tut agrin nga ai lam lahkawng a majaw, anhte a man e tawn da ai myit mada shara hta manoi nga lu hkra, shingbyi shingwung shara de hprawng wa ai ni ngu ai, anhte a matu mara, ngang ngang kang kang re ai shalan shabran ai lam rai nga ai.

¹⁹Dai myit mada shara chyawm gaw, anhte a myit masin a matu hpri chyinghkyi tai nga ai rai nna, dai gaw ngang mung ngang, grin mung grin rai nga ai hte, nba grang a nhku maga de nga ai chyeju du hkra shang manoi nga ai;

²⁰dai kata de gaw, Yesu mung, Melhkizedek a hkringhtawng lam hte maren htani htana hkinjawng agyi wa tai ngut jang, anhte a matu mara lam shawng wa tai nna, shang wa sai.