Read Jinghpaw Hanson Version Bible HEBRE 7 Bible Online

HEBRE 7 - Jinghpaw Hanson Version Bible bible

HEBRE 7

¹Abraham gaw hkawhkam ni hpe sat kau ai kaw na bai wa yang, shi hpe sa tau nna shaman ya wu ai hte, Abraham mung lanep yawng hta na htamshi hta htammi karan sak wu ai Melhkizedek ngu ai wa chyawm gaw:

²Salem hkawhkam hte Tsaw Htum ai Karai Kasang a hkinjawng wa rai nga ai rai nna, ga lachyum hku hkan yang, shawng na gaw, dinghpring ai a Hkawhkam, bai, Salem hkawhkam ngu ai gaw, ngwipyaw ai a Hkawhkam, ngu ai rai nga ai:

³shi gaw kawa n nga, kanu n nga, ahtik labau ngu ai n nga, nhtoi ladaw nhpang mung, asak aprat htum ai mung n ngu lu ai majaw, Karai Kasang a Kasha hte bung hkra tai wa ai rai nna, dinggrin anga nga ai hkinjawng rai nga ai.

⁴Wa daju Abraham e, reng htum ai lanep hta na, htamshi hta htammi karan sak ya ai wa gaw, gade galu kaba nga ai hpe, myit sumru yu mu.

⁵Hkinjawng aya lu la ai Lewi a kashu kasha ni gaw, Abraham a nshang na hkrat ai ni, ngu ai, tinang a hpunau ni kaw na, tara hte maren htamshi hta htammi, hta sha na ahkang lu ma ai.

⁶Rai timung shanhte hte ahtik labau n rum ai wa gaw, Abraham kaw na htamshi hta htammi hkam la nna, ga ndat ni lu la ai wa hpe nan, shaman ya dat wu ai.

⁷Grau kaba ai wa mahtang, kaji ai wa hpe shaman ya ga ai gaw, hpa ndang shara n nga ai.

⁸Nang e gaw, si chye ai ni htamshi hta htammi, hkam la ma ai; wonang chyawm gaw, sakse nga ai hte maren ahkrung nga ai wa gaw, hkam la nu ai.

⁹Dai re ai majaw, htamshi hta htammi hkam sha ai Lewi amyu mung, Abraham a lata hte htamshi hta htammi jaw nu ai, ngu mai nga ai:

¹⁰kaning rai nme law, Melhkizedek gaw Abraham hpe tau la ai shaloi e, Lewi gaw shi kawa a nshang e naw rai nga ai.

¹¹Bai, lam mi gaw, Lewi a amyu hkinjawng ni a aprat e, mung masha ni gaw dai jep ai tara hpe lu la ma ai rai nna, dai hkinjawng aya a gawp e hkum tsup re ai lam dep la lu ai teng yang gaw, Arun a hkringhtawng lam hte maren n re ai sha, Melhkizedek a hkringhtawng lam hte maren re ai hkinjawng wa kaga gaw, hpa majaw paw pru shara naw nga a ta?

¹²Kaning rai nme law, dai hkinjawng amyu galai mat lu yang gaw, dai jep ai tara mung n galai ai, nga lu na n rai:

¹³ning ngu tsun ai gaw, ndai ga matsun hte seng ang ai wa gaw, amyu kaga hta lawm nga ai rai nna, dai amyu hta na kadai mung, tawn hkungri hta daw jau yu ai n rai,

¹⁴Gaja wa, anhte a Madu, Yuda amyu hta na paw pru wa sai gaw, dan dan leng leng rai nga ai; dai amyu hpe hkinjawng aya a lam Mawshe gaw hpa mung n tsun da wu ai.

¹⁵Dai hta n-ga, Melhkizedek a hkringhtawng lam hte maren hkinjawng kaga paw pru nga ai teng yang gaw, hkinjawng amyu galai mat sai gaw, grau nna dan leng wa sai:

¹⁶shi gaw hkum shan hte seng ai tara matsun hte maren dang da hkrum ai wa n rai, galoi n mat chye ai asak a atsam hte maren, dang da hkrum ai wa rai nga ai;

¹⁷kaning rai nme law, “Nang gaw Melhkizedek a hkringhtawng lam hte maren, Htani htana hkinjawng rai nga ndai,” nga nna shi a lam sakse hkam ya nga ai.

¹⁸Jep ai tara gaw, hpa lam hpe mung n shatsup lu ai rai nna, shawng na ga matsun gaw n-gun kya nga ai hte akyu n rawng nga ai a majaw, yeng kau hkrum nna,

¹⁹de a malai grau kaja ai myit mada shara jashawn ya ai lam rai nga ai; de a majaw anhte gaw Karai Kasang hpang de sit shang lu ga ai.

²⁰Bai, shanhte gaw dagam ai ga hte n re ai sha hkinjawng aya lu la ma ai:

²¹Yesu chyawm gaw, “Dai Madu dagam nhtawm, myit bai kayin na n rai. Nang gaw htani htana hkinjawng rai nga ndai,” nga nna shi hpe sha-ang tsun ai dagam ai wa a ga majaw, hkinjawng aya lu la nu ai rai nna,

²²ning nga dagam ai ga hte aya hkam la lu ai wa gaw grau nga ai hte maren, Yesu gaw grau kaja ai ga shaka a ama hkam tai wa sai.

²³Shanhte gaw si hkrung si htan e numdan ai hte n grin lu ma ai majaw, hkinjawng aya hkam la ai ni marai law law wa rai wa ma ai:

²⁴shi chyawm gaw htani htana agrin nga ai majaw, shi a hkinjawng aya galai mat chye ai n rai.

²⁵Dai rai nna, shi gaw shinggyim masha ni a matu mara tawngban ya nga na, tutnawng e ahkrung nga ai majaw, shi a marang e Karai Kasang kaw sit shang wa ai ni hpe hkum tsup wa hkra, mawai la lu na atsam, shi lu nga ai.

²⁶Kaning rai nme law, shing rai chyoi pra ai, san seng ai, ra n rawng ai hte yubak kap ai ni hte ran ai wa rai nna, sumsing lamu hta shatsaw shagrau hkrum ai hkinjawng agyi wa gaw anhte a matu ram nga ai;

²⁷shi gaw hkinjawng agyi gale ni zawn, shawng e tinang yubak a matu, dai hpang e, mung masha ni a yubak a matu, shani shagu hkungga nawng ya ra ai n rai; shi hkum nan hpe nawng ya kau ai shaloi jang, dai lam hpe lang lata sha e shangut kau nu ai.

²⁸Jep ai tara gaw, hkinjawng agyi aya hta mara kap ai masha hpe dang da nga ai; jep ai tara a hpang e pru ai dagam ai ga chyawm gaw, tutnawng e hkum hkum tsup tsup re ai Kasha wa hpe dang da nga ai.