Read Jinghpaw Hanson Version Bible HEBRE 8 Bible Online

HEBRE 8 - Jinghpaw Hanson Version Bible bible

HEBRE 8

¹Ya, anhte tsun dan ai lam ni a ga madung chyawm gaw, da ndai rai nga ai: Shing re ai hkinjawng agyi wa gaw anhte lu ga ai; shi gaw sumsing lamu na daru magam a tingnyang hkra maga de, wa dung nga nna,

²chyoi pra ai arai ni hte, masha e n gap ai, dai Madu she gap tawn da ai nawku sum majing hte seng ai amu gun hpai ai wa, tai nga ai.

³Kaning rai nme law, hkinjawng agyi shagu gaw kumhpaw kumhpa hte shagu hkungga jaw ya na matu dang da nga ai; dai re ai majaw, ndai hkinjawng agyi wa mung, lama ma jaw ya lu na, ra nga ai.

⁴Ya shi gaw, ga ntsa e she nga taw gaw, gaja wa hkinjawng tai na n rai; kaning rai nme law, jep ai tara hku hte maren, kumhpaw kumhpa daw jau ai ni nga nga ma ai:

⁵Mawshe gaw dai nawku ai sum hpe gap magang nga ai shaloi e, Bum ntsa e nang hpe madun dan sade ai kasi hte maren, yawng mayawng hpe galaw lu hkra sadi nga u, nga nna Karai Kasang shi hpe tsun shadum ai hku hkan ai majaw, shanhte gaw sumsing lamu na arai ni a kanan hte shingna hpe sha, daw jau ma ai.

⁶Ya chyawm gaw, grau kaja ai ga ndat hta jung da ai ga shaka a htinglu ya ai wa shi rai nga ai hte maren, grau reng ai daw jau ai aya shi lu la wu ai.

⁷Shawng na ga shaka hta ra n rawng ai teng yang gaw, hpang na ga shaka hpe jashawn na lam, tam shara kanang na mi n nga ai.

⁸Kaning rai nme law, shanhte hpe mara shagun let, dai Madu tsun wu ai gaw, “Yu mu, Israela a nta hte Yuda a nta ntsa e, Ga shaka ningnan ngai tawn da na nhtoi du na ra ai;

⁹Shanhte a kaji kawoi ni hpe lata hta dun la nna, Egutu mung na woi wa ai shaloi na, Shanhte hte tawn da ai ga shaka hte maren, n rai: Kaning rai nme law, nye a ga shaka hta shanhte maju n jung ma ai. Ngai mung shanhte hpe n yu n gawn mawe ai nga nna, dai Madu tsun nga ai.

¹⁰Da ndai gaw, dai nhtoi ni a hpang e Israela a nta hte ngai shaka na ga shaka rai nga ai: Nye a tara hpe shanhte a myit hta ngai bang da nna, Shanhte a kraw lawang hta ka da na we ai; Ngai shanhte a Karai Kasang tai na we ai, Shanhte mung nye a amyu tai na mara ai;

¹¹Dai ni gaw, ‘Dai Madu hpe chye u,’ nga nna langai hte langai Tinang a manang wa hte, tinang a hpunau wa hpe, sharin achyin ya nga na ma ai n rai: Kaning rai nme law, kaji htum ai wa kaw nna, shanhte a kaba htum ai wa du hkra, Nlang hte gaw, ngai hpe chye ma na mara ai.

¹²Shanhte a mara hpe ngai matsan dum nna, Shanhte a yubak hpe bai dum ya na ni ai n rai, nga nna dai Madu tsun nga ai,” nga ai.

¹³Ya, ga shaka ningnan, nga nna shi tsun ai gaw, shawng na ga shaka hpe ningsa shatai kau wu ai; ningsa hte aprat kaba ai arai chyawm gaw, wai mat magang nga ai.