Read Jinghpaw Hanson Version Bible HEBRE 9 Bible Online

HEBRE 9 - Jinghpaw Hanson Version Bible bible

HEBRE 9

¹Dai shawng na ga shaka hta pyi, nawku htung hte seng ai arawn alai ni hte, mungkan ga na chyoi pra ai nta lawm ga ai.

²Kaning rai nme law, shawng na ngu ai nawku sum langai mi lajang da nga ai rai nna, dai hta e pyengdin shadun, muk mara ai ku hte madun dan ai muk ni rawng nga ai; dai hpe Chyoi pra ai shara, ngu nna shamying wu ai.

³Bai, lahkawng na nba grang kata maga de, Chyoi pra htum ai shara, ngu ai sum, rai nga ai rai nna,

⁴dai hta e manam pyaw ai baw nat ai aja hkungri hte, hkum ting ja sup ai ga shaka sumpu rawng nga ai: dai sumpu kata e, manna rawng ai ja di mung, apu pu ai Arun a dawhkrawng mung, ga shaka lungpa yan mung, rawng nga ai;

⁵de a ntsa e mung hpung shingkang a Hkerubim lahkawng gaw dai chyeju magap hpe ka-up nga ma ai: dai hte a ga lachyum langai hte langai hpe, ya tsun shara n nga ai.

⁶Shing rai yawng hte hpe lajang ngut jang, hkinjawng ni gaw daw jau ai amu gun hpai na matu, shawng na sum kata de tutnawng e shang nga lu ma ai:

⁷lahkawng na shara kata de chyawm gaw, dai hkinjawng agyi wa hkrai sha, tinang a matu mara mung, masha ni a shut hpyit ai a matu mara mung, nawng ya ai asai lang let, laning mi hta e, lang mi sha, shang lu ai:

⁸dai rai nna, shawng na sum naw grin nga dingsa, chyoi pra ai shara de shang lu na lam garai n dan pru nga ai nga nna, Chyoi pra ai Wenyi gaw dai lam hte madun dan wu ai;

⁹dai gaw ndai prat na matu kasi kanan rai nga ai rai nna, de a htung hte maren, kumhpaw kumhpa hte shagu hkungga jaw yu lu nga ai, rai timung, daw jau ai wa a myit masin hpe dai hte jahkum shatsup ya lu ai n rai:

¹⁰dai lam ni gaw, shahpa, luhpa hte kashin kamun ai lam amyu myu hte nawng, htung nnan jashawn na aprat garai n du laman e, gan tawn da ai, hkum shan hte seng ai ahtung ahki sha rai nga ai.

¹¹Hkristu chyawm gaw, lata hte n gap tawn ai rai nna, ndai hpan tawn da ai mungkan ga hte n seng ai grau kaba nna hkum tsup re ai nawku sum hta, du na ra ai ngamu ngamai ai lam ni a hkinjawng agyi tai na matu, du sa ai re ai majaw,

¹²bainam hte dumsu kasha a asai hte n rai, shi hkum nan a asai hte, dai chyoi pra ai shara kata de, lang lata sha shang nna, htani htana hkrang shaw la ai lam lu la nu ai.

¹³Kaning rai nme law, bainam sai, usu sai, nga upra a wan wu hte awu asin hkrum ai ni hpe lapri ya yang, hkum shan hpe san seng hkra shachyoi shapra ya lu ai teng yang gaw,

¹⁴htani htana Wenyi hte Karai Kasang kaw, shi hkum dai hpe ra n rawng ai sha nawng ya ai Hkristu a asai gaw, ahkrung nga ai Karai Kasang hpe daw jau lu hkra, nanhte a myit masin hpe si ging ai arawn alai hta na, grau nna shachyoi shapra ya lu ai, n rai ni?

¹⁵Dai rai nna mung, shaga la hkrum ai ni gaw, ga ndat hte seng ai htani htana sali wunli hkam la lu mu ga nga, shawng na ga shaka kata e tawt lai kau ai hpe hkrang shaw la na matu, si hkam lam byin pru sai majaw, shi gaw ga shaka ningnan a htinglu ya ai wa rai nga ai.

¹⁶Kaning rai nme law, ga madat da ai nga yang gaw, ga madat tsun da ai wa a si ai mung lawm lu na rai nga ai;

¹⁷ga madat ngu ai gaw, si lam byin yang she grin lu ai ga madat tsun da ai wa naw hkrung nga yang gaw, ga madat garai n tai mai ai.

¹⁸Dai rai nna, shawng na ga shaka pyi, asai n lawm ai, tawn da ai, n rai nga ai,

¹⁹Kaning rai nme law, Mawshe gaw jep ai tara hte maren htet da mada yawng hte hpe amyu masha ni e tsun dan ngut jang, dumsu kasha sai, bainam sai hte ntsin, chyaw jahkyeng ai sagu mun, maihkaw nhtan mi la nna, laika hpe mung, amyu masha ni yawng hte hpe mung, lapri bun let,

²⁰“Ndai asai gaw, Karai Kasang nanhte hpe htet da ai ga shaka a asai rai nga ai,” ngu nna tsun wu ai.

²¹Dai hta kaga, nawku sum hte daw jau ai amu a arai ni yawng hpe mung, shi dai hte maren, dai asai hte lapri bun wu ai.

²²Jep ai tara hku hkan yang, arai yawng ganoi ma hkra hpe, asai hte jasan jaseng kau lu nga ai rai nna, asai ru hkaw kau ai n lawm yang gaw, yubak raw dat na lam n hku nga ai.

²³Dai rai nna, sumsing lamu na arai ni a sumla ni hpe shing re ai lam hte jasan jaseng lu mai nga ai; sumsing lamu na arai majing ni hpe chyawm gaw, dai hta grau kaja ai shagu hkungga ni hte jasan jaseng kau lu ai.

²⁴Kaning rai nme law, Hkristu gaw, lamu na kasi a sumla sha rai nga nna, masha lata hte gap tawn ai chyoi pra ai shara kata de n shang ai sha, anhte a matu mara Karai Kasang a man e dan pru nga na nga, sumsing lamu kata de nan shang wa sai:

²⁵shing rai shang yang, hkinjawng agyi ni gaw tinang a asai n re ai asai hte, dai chyoi pra ai shara kata de laning hte laning shang ra ai zawn, shi gaw tinang hkum hpe law law lang nawng ya ai n rai;

²⁶shing rai nawng ya ai rai yang gaw, ginding aga lat kaw nna law law lang si hkam hkam rai na nu ai; ya chyawm gaw, shi hkum dai nawng ya kau ai a marang e, yubak hpe yeng seng kau na matu, ndai prat a jahtum e, shi lang mi sha dan pru wu ai.

²⁷Shinggyim masha ni mung, lang mi sha si wa nna, dai hpang e dawdan hkrum na ra ai zawn,

²⁸Hkristu mung, law law ni a yubak gun hpai kau na, lang mi sha nawng ya kau hkrum sai rai nna, hkye hkrang la ai hkrum lu hkra, shi hpe ala nga ai ni a matu, yubak gun lam hte n seng ai sha, lahkawng lang ngu na hta, dan pru na ra ai.