Read Jukuna Mateo 12 Bible Online

Mateo 12 - Jukuna bible

Mateo 12

¹Huatána'acaje huacajé Jesús ja'apari ají que iñe'epú chuhuá ra'apiyatéjena hua'até. Iñe'epú ja'apari ajopana mená e'iyohuá. Re'iyá cajrú trigo i'imacá. Quehuí me'epejí i'imacá ra'apiyatéjenajlo. Aú nachira'acó nacú najña'á huejapa trigo naquiyana. Natojro'ó nacápojo ricá, najñácaloje penaje.

²Fariséona naquiyana amaca aú nachíra'aca trigo naquiyana nemá Jesusjlo: —Piyacá'o. Chuhuajá huatána'acaje huacajé. E'iyonaja ajona pa'apiyatéjena sapaño. Uncá nala'alá Moisesmi chu puráca'alomi quemacá que.

³E Jesús quemari najló: —Icá hue'epiño méqueca Tupana puráca'alo lana'aquéjami quemacá Davidmi chu nacú. Quehuí rijló me'epejí i'imacá. Ñaqué caja me'epejí i'imacá quehuí rijhua'até chira'acáñojlo.

⁴A'acuhuaná namujlúca'a Tupana ñacaré chojé. Najñá pan, Tupánajlo a'acanami ri'imacá. Najñá ricá, uncá nayurila ajopana ajñaca ricá. E'iyonaja najñá ricá. Necaja calé, sacerdótena, ajñaño ricá.

⁵Ihue'epí caja méqueca Tupana puráca'alo, Moisesmi chu lana'acare, quemacá sacerdótena nacú. Rimá nanacu: “Uncá nahuatána'alaje huatána'acaje huacajé. Rihuacajé nala'á nasápaca'ala Tupana ñacaré chu. E'iyonaja calé uncá nala'alá pu'uhuaré raú”, que rimacá nanacu.

⁶Ñaquele numá ijló: Re apú maare, Tupana ñacaré chaje ricá.

⁷Marí que piño Tupana puráca'alo lana'aquéjami quemacá: “Icá a'añó nojló pirajina nenócarena pu'uhuaré ila'acare chaya. Richaje huani ila'acá nuhuátacare caje, ina'uqué mu'ují hue'epícana aú”, que Tupana quemacá i'imacá. Uncá caja ihue'epila meque quemacánaca ricá. Ihue'epíquela meque quemacánaca ricá, uncá imalajla ajopana nacú majopeja: “Pu'uhuaré la'ajeño necá” que. Uncá la'alaño pu'uhuaré, necá nacú imá marí que.

⁸Ina'uquéjloje penaje i'imacá nucá. Tupana quemari nunacu, numacáloje méqueca iná la'acá huatána'acaje huacajé penaje —que Jesús quemacá fariséona naquiyánajlo. Jesús lamá'ataca caja yáte'ela a'amitacó rijló yucuna marí:

⁹E caja Jesús i'ijnari ají que a'ajná ño'ojó nahuacáca'alo ñacarelana chojé.

¹⁰Re caja pajluhuaja ina'uqué i'imari najhua'até. Caja riyáte'ela a'amitaró rijló i'imacá. Re caja ajopana i'imaño. Nahuata Jesús nacú quemacana: “Pu'uhuaré la'ajeri ricá” que. Ñaquele nemá rijló: —Chuhuajá huatána'acaje huacajé. ¿E palani ca'ajná, uncá ca'ajná, riyáte'ela lamá'atacana chuhuajá huatána'acaje huacajé? ¿Meque chi Tupana puráca'alo lana'aquéjami quemacá rinacu? —que nemacá Jesusjlo.

¹¹Jesús quemari najló: —Pajluhuaja ipirá ohueja i'imaquela, ja'arojla ulahuí juniphuni chojé huatána'acaje huacajé. Icá jácho'otajla ricá richiyá rihuacajé.

¹²Ohueja chaje íqui'ica iná huátaca ina'uqué. Aú iná la'á palá necá huatána'acaje huacajé hua'ató —que rimacá najló.

¹³E rimá yáte'ela a'amitarojlo: —Piya'atá nojló piyáte'ela. Riya'ataca rijló ricá aú ja ripala'ó. Palá riyurico raú, apojó pitari riyáte'ela que caja.

¹⁴Marí que rila'acale ricá huatána'acaje huacajé, fariséona hue'epiño rinacu uncá ina'uquélari que. E caja nácho'o nahuacáca'alo ñacarelana chiyá, napura'acóloje ajopana hua'até Jesús nócana nacú penaje. Nacaje Tupana puráca'alo ja'apátajerimi chu quemacá Jesús nacú júpimi que yucuna marí:

¹⁵Jesús hue'epiri napura'acó rinócana nacú. Aú calé ri'ijná reyá. Cajrú ina'uqué i'ijnaño rijhua'até. Natámina ritejmo'óta piyuque.

¹⁶Rimá najló nemacá piyá ajopánajlo na huánica ri'imacá.

¹⁷Tupana puráca'alo ja'apátajerimi chu, Isaíasmi chu, i'imari riyucuna jupejé i'imacá. Rimacá que rila'acá rehuá i'imacá. Ri'imá Jesús yucuna uncá chiyó riphá eja'ahuá nacojé. Marí que Tupana quemacá rinacu:

¹⁸Nojló nacaje la'ajeri ricá.Ajopana e'iyayá nu'uhuapá nujluhua ri'imacá.Iqui'ija nuhuátacare ricá.Pu'ují nupechu i'imacare nacú ricá.Rijló no'ojé Nupechu.Palá nula'acare ina'uqué nacú, ricá yucuna ri'imajé najló.Ajopana jema'ajeño caja riyucuna, uncá judíona naquiyana calé necá.

¹⁹Uncá raca'ácalajo ajopana hua'até.Uncá caja rahuíyo'olaje ina'uquejlo.Uncá mejrí calé ripuráca'alo i'imajica.

²⁰Ra'ajé chapú caje yajhué amájeño ñaté.Ra'ajé caja ujhuí péchuruna ñaté.Marí que rila'ajica, palá la'ajeño huacára'ajeri ri'imajica ejená.Ejomi uncá pu'uhuaré la'acana i'imalaje.Ejéchami palá ina'uqué i'imajica pajhua'atéchaca reyá a'ajná ño'ojó.

²¹Piyuque ina'uqué eja'ahuá chu i'imajícaño pechu i'imajé caphí richojé, que Isaíasmi chu lana'acá riyucuna jupejé i'imacá. Nanaquiyana quemaño Jesús nacú: “Jiñá pechu hua'ateje ricá.” Riyucuna marí:

²²Nahuá'a pajluhuaja ina'uqué Jesús ejo. Mejlurú huani ri'imacá. Uncá caja ripura'aló. Jiñá pechu i'imari caja re'iyá. Nahuá'a ricá Jesús ejo. E Jesús lamá'atari ricá. Ejéchami ripura'acó palá. Ramá caja reyá a'ajná ño'ojó.

²³Ramájeño pechu i'imá: “¡Meque piyuque huani rila'acá!” Nemá pajlocaca: —¿Ricá chi quele jupichúnami quemacare nacú, huaícha majó ina'uqué i'imatájeri penaje?

²⁴Fariséona jema'añó nemacá ilé que. Aú nemá najló: —Beelzebú, jiñana huacára'ajeri pechu aú rica'á jiñana pechu ina'uqué e'iyayá.

²⁵Jesús hue'epiri méqueca napechu i'imacá rinacu. E rimá najló: —Ajopana ina'uqué huacára'ajeri hua'atéjena nócaquelo pajhua'atéchaca, nacapichátajla pecohuácaca raú. Ñaqué caja iná ejena nóquelo pajhua'atéchaca, nacapichátajla pecohuácaca raú.

²⁶Ñaqué caja ricá Satanás, Jiñá Chi'ináricanajlo. Jiñana pechu rijhua'atéjena. Rica'aquela necá ina'uqué e'iyayá, rila'ájla chapú ricó. Uncá meque rila'alajla rejomi, uncale rijhua'atéjena i'imalajla raú.

²⁷Icá calé quemaño nunacu: “Beelzebú, jiñana huacára'ajeri pechu aú rica'á jiñana pechu ina'uqué e'iyayá”. Eta, ja'apiyatéjena ca'añó caja jiñana pechu ina'uqué e'iyayá. ¿Ñaqué caja chi imacá nanacu? Necá hue'epiño uncá paala ipechu.

²⁸Nucá ca'arí jiñana pechu ina'uqué e'iyayá Tupana Pechu aú. Aú iná hue'epí caja Tupana queño'ocá ina'uqué naquiyana huacára'ajeri i'imacana.

²⁹E Jesús i'imari yucu najló, nahue'epícaloje raú richá'ataca Jiñá Chi'ináricana penaje ri'imá najló yucu marí que: —Uncá na calé mujlúca'ari catejmuni ina'uqué ñacaré chojé rinane ña'ajé riliyá. Apú richaje catejmuca ipháquela rinacu, ricá jepo'otárijla ricá. Quéchami rijña'atácajla rinane riliyá —que Jesús i'imacá yucu najló.

³⁰Rimá piño najló: —Uncachu ina'uqué naquiyana huátalaño nucá, chapú napechu nunacu. Uncachu nala'alá ina'uqué palá nujhua'até, napajno'otá napechu Tupana liyá apojó.

³¹Tupana amaro ina'uqué chaje piyuqueja pu'uhuaré nala'acare liyá, namanaicho nala'acare liyá hua'ató. Pu'uhuaré nemacare nacú liyá hua'ató ramó nachaje. Eyá pu'uhuaré nemacare Tupana Pechu nacú, ricaja calé uncá ramalo nachaje riliyá.

³²Ina'uquéjloje penaje i'imacá nucá. Pu'uhuaré ina'uqué quemacare nunacu, Tupana amárojla nachaje, pu'uhuaré nemacare liyá. Eyá pu'uhuaré nemacare Tupana Pechu nacú, uncá Tupana amálajo nachaje riliyá. Ñaqué ricá me'etení. Ñaqué caja ri'imajica reyá a'ajná ño'ojó i'imajícañojlo. Iná hue'epí ina'uqué nacojé mecajenaca necá nacaje nemacare nacú aú, nacaje nala'acare aú hua'ató. Riyucuna marí:

³³Palani inarí a'ahuaná arúca'ari palani richa. Pu'uhuareni inarí a'ahuaná arúca'ari pu'uhuareni caja richa. Richa aú iná hue'epí a'ahuaná nacojé, palani ricá, pu'uhuareni ca'ajná ricá. Ñaqué caja ina'uqué.

³⁴Pu'uhuaré péchuruna icá. Ñaqué i'imacale uncá meño'ojó imalá palá nacaje nacú. Iná pechu que caja iná quemacá nacaje nacú.

³⁵Palá péchuri quemari palá nacaje nacú. Ripechu locópa'alaja rimá nacaje nacú palá. Eyá pu'uhuaré péchuri quemari pu'uhuaré nacaje nacú.

³⁶Pa. Tupana quemájeri ina'uqué nacú mecajenaca necá. Rihuacajé rihuajájica pu'uhuaré pura'ajeño. Piyuqueja pu'uhuaré caje nemacare nacú chona rihuajaje necá.

³⁷Iná puráca'alo aú Tupana quemájeri iná nacú mecajeca iná. Uncá pu'uhuaré pura'ajero calé iná i'imajica ee, iná i'imajó rihuajájica iná liyá. Pu'uhuaré pura'ajero iná i'imajica ee, rihuajaje iná. Uncá ina'uquélaruna quemaño Jesusjlo, rila'acáloje nacaje uncá meño'ojó ina'uqué la'alare penaje. Riyucuna marí:

³⁸E caja fariséona naquiyana, Tupana puráca'alo nacú jehuíña'atajeño naquiyana quele quemaño marí que Jesusjlo: —Pila'á huajló nacaje uncá meño'ojó ina'uqué la'alare, huahue'epichi picá raú.

³⁹Jesús quemari najló: —Uncá ina'uquélaruna, uncá huátalaño Tupana, cajena quemaño nojló, nula'acáloje nacaje uncá meño'ojó iná la'alare penaje. Tupana la'arí Jonasmi chujlo nacaje júpimi i'imacá. Tupana puráca'alo ja'apátajeri ri'imacá. Rila'acá rijló nacaje i'imacá que caja rila'ajica piño nojló nacaje. Ricá aú ja calé ihue'epeje nucá. Uncá nula'alaje apú nacaje ijló, ihue'epichi nucá raú.

⁴⁰Jiña cajruni ajmílo'ori Jonasmi chu i'imacá. Rihuó chu ri'imá hueji que cala quetana. Ñaqué caja nu'umajica liri chu hueji que cala quetana. Ina'uquéjloje penaje i'imacá nucá.

⁴¹Jonasmi chu i'imari Tupana yucuna Nínive e i'imacáñomi chúnajlo i'imacá. Aú napajno'otá napéchuhua pu'uhuaré nala'acare liyá Tupana ejo. Eyá maare nucá me'etení ijhua'até. Jonasmi chu i'imacá chaje nucá, i'imari ijló Tupana yucuna. E'iyonaja uncá ipajno'otala ipéchuhua pu'uhuaré ila'acare liyá Tupana ejo raú. Rijimaje Nínive e i'imacáñomi chuna quemajeño inacu, Tupana huajácaloje icá penaje. Me'etení i'imacaño nacú nemaje rihuajájica ina'uqué huacajé.

⁴²Júpimi apa'ahuelo i'imayo i'imacá. Cahuacajo te'eréruna i'imacánaru ru'umacá. Rucá i'ijnayo ya'ajnajo Salomonmi chu chaje ripuráca'alo jema'ajé. Hue'epiri huani ri'imacale, ru'ujná rejo i'imacá. Eyá maare nucá me'etení ijhua'até. Salomonmi chu chaje hue'epica nucá. E'iyonaja uncá a'alá inacojó nupuráca'alo. Rijimaje ne'emacánarumi cholo quemajeyo inacu, Tupana huajácaloje icá penaje. Me'etení i'imacaño nacú rumaje rijló, rihuajájica ina'uqué huacajé. Jesús i'imari najló jiñá pechu pa'acó yucuna, nahue'epícaloje raú ñaquejénaca necá, uncá pachá nahuátala ricá. Marí que Jesús i'imacá najló yucu:

⁴³—Jiñá pechu jácho'ocharo pajluhuaja ina'uqué e'iyayá. E ra'apicha te'erí macajreni nacuhuá. Riculicha rijluhua pucunaji, rihuatána'acaloje richojé penaje. E'iyonaja uncá riphátalacha ricá.

⁴⁴E rimicha: “Nupa'ajícoja nuñacaremi ejo, ilé ina'uqué nócho'ocaro e'iyayá ejo. Aú ripi'ichó rapumí chuhuá. Rimujlúqui'icha ina'uqué e'iyajé piño. Amíchari palani ri'imichaca. Lamá'ataquejami ri'imichaca rijló.

⁴⁵Raú ri'ijichá piño ajopana jiñana pechu huá'aje. Iyamá cuhuá'ata quele rihuá'icha rijhuáque'ena penaje. Richaje chapújne'equenaca ne'emichaca. Necá piyuqueja mujlúqui'ichaño ilé ina'uqué e'iyajé, ne'emacáloje rihuacára'ajeño penaje. E caja penaje chapújne'eque huani ilé ina'uqué i'imichaca na'apiyá i'imacana aú. Júpimi ri'imacá chaje huani chapújne'equeca ri'imichaca na'apiyá —que Jesús i'imacá najló yucu. Ejomi rimá najló: —Ñaqué caja ri'imajica pu'uhuaré la'acáñojlo, me'etení i'imacáñojlo. Richaje ila'acá pu'uhuaré me'etení, uncale a'alá inacojó Tupana puráca'alo. Jesús jaló, rijmerémina, quele i'ijnacá Jesús amaje yucuna marí:

⁴⁶Pachu Jesús i'imari cajrú ina'uqué hua'até. Yucu ri'imá najló. E Jesús jaló, rijmerémina, quele iphaño rejo. Nahuata Jesús hua'até pura'acano. Huaca'apeja ne'emacá.

⁴⁷E apú quemari Jesusjlo: —Paló, pejena, quele iphíchaño. Huaca'apé necá. Nahuata pijhua'até pura'acano.

⁴⁸Rimá rijló: —¿Mecajena chi necá nojena, noló, quele?

⁴⁹Aú riya'atá ra'apiyatéjena chaje. —Mariruna nojló noló, nojena que i'imacaño.

⁵⁰Nora'apá, je'echú chu i'imacare, huátaca que la'acaño, nojena que nojló necá. No'ohué que, no'ohueló que, noló que nojló necá.