Read Jukuna Mateo 14 Bible Online

Mateo 14 - Jukuna bible

Mateo 14

¹Caja cajrú huani Jesús yucuna jema'acó rehuá i'imacá. Riyucuna iphari caja nahuacára'ajeri Herodes nacú. Galilea te'eré eruna i'imacana ri'imacá rihuacajé.

²E rimá rahua'á i'imacáñojlo marí que Jesús nacú: —Juan bautizar la'ajeri ricá. Caja rimacápo'o. Penájemi ricá. Aú calé rihue'epí piyuque nacaje la'acana, uncá meño'ojó iná la'alare —que rimacá najló Jesús nacú.

³Ejo'ocaja Juanmi chu i'imacá huacajé Herodes huacára'ari rica'acana ina'uqué huajáquelana chojé i'imacá. Jepo'oqueja nayurí ricá richu. Marí que rila'acá ricá chapú riyajalo puráca'alo aú. Riyajalo ií i'imari Herodías. Re'ehué, Felipe, yajalo ru'umacá pamineco.

⁴Rica'á riliyá rucá. Richona Juanmi chu aca'arí Herodes i'imacá. Rimá rijló: —Pe'ehué yajalo penájerumi ilerú pi'imá hua'até. Uncá Tupana huátala iná la'acá ilé que —que rimacá rijló i'imacá.

⁵Rijimaje Herodes huátari rinócana. E'iyonaja riquero'ó ina'uqué piyá, palá napechu i'imacale Juan nacú. “Tupana puráca'alo ja'apátajeri ricá,” que napechu i'imacá rinacu.

⁶E caja Herodes iphátari rile'ejé jarechí. Aú caja rila'á fiesta. Cajrú riyucupéra'acarena ina'uqué iphaño rinacu. Aú rihuacára'a riyajalo itu arápa'aca najimaje piyuque. Aú rorápa'a rocó najimaje. Palá huani ri'imacá Herodes nacú.

⁷E rimá rojló: —Piquejá'a nuliyá pihuátacare caje, no'ochí pijló ricá. Tupana hue'epiri quehuaca numacá.

⁸—Je —que rumacá. E ru'ujná roló amaje pamineco. —Marí que rimíchaca nojló. ¿Meque numájica rijló? Aú rumá rojló: —Eco pimá rijló, ra'acáloje pijló Juan bautizar la'ajeri huíla'aru pachiya chojé. “Je” que. E rupa'ó piño ropumí chuhuá rijló quemaje. Rumá rijló: —Pa'á nojló Juan bautizar la'ajeri huíla'aru pachiya chojé.

⁹Aú camu'ují huani ripechu la'acó, Herodes pechu la'acó. E'iyonaja uncá meque rila'alá. Caja rimá rojló i'imacá: “No'ojé pijló pihuátacare caje. Tupana hue'epiri quehuaca numacá,” que rimacá rojló i'imacá. Ina'uqué, riyucupéra'acarena, jimaje que rimacá rojló. Ñaqué i'imacale rihuacára'a na'acá rojló ri'imacá.

¹⁰Rihuacára'a ne'ejnacá ina'uqué huajáquelana chojé Juanmi chu núru'upi mata'ajé. Namata'á ricá.

¹¹Quéchami nayá'ata rihuíla'arumi pachiya chojé. Ne'ematá rojló ricá. Ejomi ro'ó rolojlo ricá. Raú ruhue'epí caja nenóchaca ricá. Marí que nenoca Juanmi chu i'imacá.

¹²Nenoca ricá ejomi ra'apiyatéjenami i'ijnaño ina'uqué huajáquelana chojé ritami ña'ajé. Najña'á ritami. E nasa'á ricá. Ejomi ne'ejná riyucuna i'imajé Jesúsjlo. Jesús a'acá cinco mil ina'uquejlo a'ajnejí yucuna marí:

¹³Caja ne'emá Jesusjlo riyucuna. E ri'ijná reyá ra'apiyatéjena hua'até. Necoja ne'ejnacá jita chuhuá a'ajná ño'ojó, ne'emacáloje necoja ajopana ina'uqué liyá penaje. E'iyonaja ajopana hue'epiño meño'ojoca ne'ejnacá. Cajrú pajimila i'imacá rehuá. Re i'imacaño i'ijnaño pe'iyoóhua ají que ne'ejnacá ejo; iphaño natucumá.

¹⁴E caja narúca'o. E Jesús jácho'oro jita chiyá; amari cajrú huani ina'uqué. Rihue'epí namu'ují. Ritejmo'óta natámina nahuá'acarena rejo i'imacá.

¹⁵Natejmo'ótacana nacú najúhua'a. E ra'apiyatéjena i'ijnaño rahua'ajé; quemaño rijló: —Caja huajúhui'ichaca. Uncá nañacaré i'imalá maárohua. Pihuacára'a necá pajimila ejo, nahuarúhua'acaloje a'ajnejí najluhua reyá penaje.

¹⁶E'iyonaja Jesús quemari najló: —Uncá ne'ejnalaje. Icá a'ajeño najló a'ajnejí.

¹⁷Nemá rijló: —Uncá a'ajnejí i'imalá maare, najñácaloje penaje. Pajluhua té'ela ca'alá pan maare, iyajmela jíñana hua'até. Queleja calé maare.

¹⁸Jesús quemari najló: —Iji'ichá ricá majó. —Je.

¹⁹E rihuacára'a ajopana yá'aco jimichi palani e'iyajé. Ejomi rijña'á ricápojo pajluhua té'ela ca'alá pan, iyajmela jíñana hua'até. E riyacá'o ají que je'echú chojé. Rimá Tupánajlo: —Palá pili'ichaca huecá marí a'ajnejí aú. E ritupa'á pan naquiyana. Riyupa'atá caja jiña naquiyana najló. Ejomi ra'á ra'apiyatéjenajlo ricá, natamáca'atacaloje ina'uquejlo ricá penaje.

²⁰Piyuqueja necá ajñaño na'ajnehuá namano'ocá ejé. Cinco mil ca'ajná ne'emacá achiñana, ajñaño na'ajnehuá inaana, yuhuaná hua'até. Uncá nalapa'atala inaana, yuhuaná, quele. Najñaca na'ajnehuá ejomi ra'apiyatéjena huayo'oñó rijlupemí yurícaro. Iyamá iphata ji'imaji nacojé ca'alá cuhuá'ala namano'otá pu'uteno raú. Jesús ja'apaca juni jimó yucuna marí:

²²E caja Jesús huacára'ari ra'apiyatéjena huitúca'aca jita chojé, nacuhuá'acaloje pa'anajo pitá ritucumá penaje. E caja rihuacára'a ina'uqué pa'acó.

²³Caja napa'ó. E caja Jesús i'ijrari yenuri i'ihuátaje, ripura'acóloje Tupana hua'até penaje. Caja calajerúhuaca ne'emacá. Jesús i'imari ricoja.

²⁴Ra'apiyatéjena i'imaño caesa pe'iyó leñacaje nacú. Carená ja'apari ají que najimajo caphí. Caja cajrú juni yoco'ocó. Riyocola ña'arí jita nacojé caphí.

²⁵E caja ehuaja najme'etá. Luhuíchipica ee Jesús i'ijnari nápumi chu. Juni jimó ra'apá.

²⁶Ra'apiyatéjena amaca aú ricá huaíchaca, cajrú naquero'ocó. —¡Yee, ilé ina'uqué ñacami ta huaícha! —que nahuíyo'oca.

²⁷E Jesús quemari najló: —Ipechu i'imá caphí. Iquero'oniyo, Jesús nucá —que rimacá najló.

²⁸E Pedro quemari rijló: —Picá pi'imajica ee, pihuacára'a no'opaca ñaqué caja juni jimó pijimajo.

²⁹—Majó pi'ijná —que rimacá rijló. Aú Pedro jácho'oro jita chiyá juni jimaje. Riqueño'ó juni jimó ja'apácana ají que Jesús jimajo.

³⁰Rimá: “¡Meque caphí huani ta carená!” Aú riquero'ó. Hua'ató que caja ra'acó junápeje. Eja rahuíyo'o: —Pihue'epí numu'ují.

³¹Ejéchami Jesús patacá ricá ra'anapitá naquiyá. Rácho'ota junápiya ricá. Rimá rijló: —¡Huejapa nochojé péchuri picá! ¿Naje piyuricha caphí nochojé i'imacana?

³²E caja nahuitúca'a jita chojé. Hua'ató que carená mata'acá.

³³E jita chu i'imacaño tára'año ne'erúpachi aú Jesús jimaje. Nemá rijló: —Tupana I'irí jo'ó picá.

³⁴Caja nacuhuá'a pa'anajo pitá, Genesaret te'eré ejo.

³⁵Ina'uqué amaca aú Jesús na'apata riyucuna apú nacojé, apú nacojé que nate'eré ehuá. Aú caja nahuá'a cajrú natámina ri'imacá ejo.

³⁶Natámina quemaño rijló, riyurícaloje nasápaca ra'arumacá ji'imá nacojé penaje. Piyuqueja rinacu sápajeño tejmo'otaño raú.