Read Jukuna Mateo 15 Bible Online

Mateo 15 - Jukuna bible

Mateo 15

¹Ajopana iphaño Jesús nacú i'imacá. Fariséona, Tupana puráca'alo nacú jehuíña'atajeño, quele naquiyana ne'emacá. Jerusalén eyájena ne'emacá. Caja nephá rinacu; nemá rijló:

²—¿Naje uncá pa'apiyatéjena la'alaño peñahuilánami chuna quemajica que? Uncá nepala nayáte'ela chiyá najñaca na'ajnehuá piyá, peñahuilánami chuna la'ajica que caja.

³Jesús quemari najló: —Eyá icá yuriño Tupana puráca'alo ja'apiyá i'imacana, ila'acáloje peñahuilánami chuna quemacá que penaje.

⁴Marí que Tupana quemacá: “Iphá ichi'iná ja'apí”. Pu'uhuaré pura'ajícaño nachi'iná nacú inoje”, que rimacá.

⁵Eyá me'etení maare nayani quemaño marí que nachi'inajlo: “Uncá meño'ojó no'olá iñaté liñeru aú. Caja no'ó Tupánajlo nuliñérute”, que nemacá najló.

⁶Majopeja nemacá. Uncá nephala nachi'iná ja'apí raú. E'iyonaja uncá na calé imá najló. Caja majopéjari que ila'acá Tupana puráca'alo ijluhua, ila'acáloje peñahuilánami chuna puráca'alomi quemacá que penaje.

⁷Pajlácachina huani icá. Icá la'añó icó palá la'ajeño que ina'uquejlo. E'iyonaja uncá ñaqué calé icá. Palá huani Tupana puráca'alo ja'apátajerimi chu, Isaíasmi chu, i'imacá iyucuna júpimi i'imacá. Marí que rilana'acá papera chojé ri'imacá.

⁸Marí que Tupana quemacá ina'uqué nacú:Mariruna ina'uqué pura'añó palá nunacu nanuma chiyaja calé.E'iyonaja nahuajhué nacú, uncá nahuátala nucá.

⁹Uncá na penaje calé nahuacono pajhua'atéchaca nahuacáca'alo ñacarelana chojé, nala'acáloje pu'ují napéchuhua nunacu penaje.Peñahuilánami chuna puráca'alomi nacuja calé nehuíña'ata ina'uqué.Tupana puráca'alo que japi ricá nehuíña'ataca necá rinacu, que Tupana quemacá i'imacá.

¹⁰E Jesús quemari piño ina'uquejlo, ne'ejnacáloje rahua'ajé penaje. E rimá najló: —Chuhua jema'á marí meque quemacánaca ricá:

¹¹Iná numá chojé iná a'á a'ajnejí, iná ajñácaloje ricá penaje. Uncá iná la'alá pu'uhuaré raú. Eyá iná numá chiyá iná pura'ó pu'uhuaré. Raú calé iná la'á pu'uhuaré —que rimacá najló.

¹²E Jesús ja'apiyatéjena i'ijnaño Jesús ahua'ajé. Nemá rijló: —Ilé pimíchaje nacú jimaje fariséona yúchi'ichaño pichá. ¿E pihue'epica ricá?

¹³Rimá najló: —Nora'apá, je'echú chu i'imacare, capichátajeri piyuque ina'uqué uncá i'imalaño rile'ejena.

¹⁴Reja ne'emareja ñaqueja. Caja uncá nahue'epila Tupana nacojé. Ñaquejena jehuíña'atajeño necá. Mejluruna que necá. Pajluhuaja mejlurú pacóro'otacachu apú mejlurú, pajñacani na'acó ulahuí chojé rijhua'até.

¹⁵E Pedro quemari rijló: —¿Meque quemacánaca chi a'ajnejí ajñacana pimíchaje nacú?

¹⁶Jesús quemari rijló: —¿Uncá caja chi pihue'epila?

¹⁷Iná a'á iná numá chojé a'ajnejí, iná ajñácaloje penaje. Rihuitúca'a iná julá chojé. Caja penaje ra'apá iná e'iyayá.

¹⁸Eyá iná numá chiyá iná quemá nacaje nacú, iná pechu nacú ri'imacá que. Pu'uhuaré péchuruna ina'uqué.

¹⁹Aú calé nala'á pu'uhuaré napechu locópa'alaja. Pu'uhuaré péchuruna ne'emacale, ina'uqué i'ijnatá napéchuhua pu'uhuareni nacú. Pu'uhuaré péchuruna ne'emacale, nenó ina'uqué. Pu'uhuaré péchuruna ne'emacale, achiñana, inaana quele la'añó namanaicho pajhua'atéchaca. Pu'uhuaré péchuruna ne'emacale, nata'á ajopana liyá nanane. Pu'uhuaré péchuruna ne'emacale, majopeja napajlaca, nachapújra'aco ajopana nacú.

²⁰Marí que la'acana aú ina'uqué la'añó pu'uhuaré, namanaicho hua'até. Uncá iná la'alá pu'uhuaré, uncachu iná a'alá iná nacojó peñahuilánami chuna puráca'alo. Uncachu iná ipala iná yáte'ela chiyá, nemacá que, iná ajñaca iná a'ajnehuá piyá, uncá iná la'alá pu'uhuaré raú —que Jesús jehuíña'ataca necá. Ajopana te'eré eyájeru pechu i'imacá caphí Jesús chojé yucuna marí:

²¹E caja Jesús i'ijnari reyá ají que Tiro, Sidón, quele te'eré ejo.

²²Re pajluhuájaru i'imayo. Canaan te'eré eyájeru ru'umacá. Ru'ujná Jesús amaje, iphayo rahua'ajé. Jahuíyo'oqueja rumacá rijló: —Hue'emacana, Tupana huacára'acare majó ina'uqué i'imatájeri penaje picá. Pihue'epí numu'ují. Jiñá pechu nutu e'iyá. Chapú caje yajhué romaca raú —que rumacá rijló.

²³Uncá Jesús ja'ajipalá rojló. E ra'apiyatéjena i'ijnaño rahua'ajé. Nemá rijló: —Pihuacára'a rupa'acó. Huápumi chu ro'opaca, cajrú huani rohuíyo'oca.

²⁴E Jesús quemari rojló: —Tupana huacára'ari nucá majó Israelmi chu laquénami ñaté a'ajé. Capichájeño necá Tupana liyá. Necaja calé ñaté a'ajeri nucá —que rimacá rojló.

²⁵E'iyonaja ru'ujná rijimaje. Rutára'o rijimaje ru'urúpachi aú. Rumá rijló: —Hue'emacana, pa'á nuñaté.

²⁶Rimá rojló: —Uncá paala pan ña'acana Israelmi chu laquénami liyá, iná a'acáloje ricá ajopana te'eré eyájenajlo, yáhuinajlo penaje. (“Yáhuina” que judíona quemaqueño ajopana te'eré eyájena nacú.)

²⁷—Que jo'ó, Hue'emacana —que rumacá rijló—, yáhuina ajñaño caja pan mujrumi te'erí e'iyajé ja'acó.

²⁸Raú Jesús quemari rojló: —¡Meque caphí huani pipechu nochojé! Pihuátaca queja ri'imajica pijló. Marí que rimacá rojló a'apona que Jiñá pechu jácho'oco rutu e'iyayá. Raú richuhuaja rutejmo'otaco. Jesús tejmo'ótaca cajrú natámina yucuna marí:

²⁹E caja Jesús i'ijnari reyá. Ra'apá ají que caesa turenó. Galilea caesa ií. E rácho'o yenuri i'ihuata nacú. Re riyá'o.

³⁰Yenuri i'ihuata nacú riyá'aco ejé cajrú ina'uqué iphaca rinacu. Nahuá'a najhua'ató cajrú natámina. Uncá meño'ojó ne'iyajena ja'apálaño palá. Mejluruna ajopana i'imacá. Ajopana piño uncá pura'alaño. Ajopana piño i'imaño apicháca'alona. Que'iyapejé nayaripune i'imacá najló. Marí que yaripune i'imacaño nahuá'a Jesús chaje. Nato'otaque necá ri'imá nacojé, ritejmo'ótacaloje necá penaje. Ritejmo'óta piyuqueja necá que'iyapejé nayaripune liyá.

³¹Uncá pura'alaño penájenami pura'añó palá. Apicháca'alona i'imacaño penájenami pala'añó palá. Uncá ja'apálaño palá penájenami ja'apaño caja palá. Mejluruna penájenami amaño caja palá. Marí cajé aú napechu i'imá: “¡Meque piyuque huani la'acá ricá!” Palá napura'acó Tupana nacú raú. Tupana, Israelmi chu pechu i'imacare chojé caphí, nacú napura'ó palá. Jesús a'acá cuatro mil ina'uquejlo a'ajnejí yucuna marí:

³²E caja Jesús huá'ari ra'apiyatéjenajlo, ne'ejnacáloje richaje penaje. Rimá najló: —Nuhue'epí mariruna ina'uqué mu'ují. Caja hueji que cálicha nujhua'até necá. Caja na'ajné tajícharo. E'iyonaja uncá numalaje najló, napa'acóloje penaje. Apala uncá natejmú i'imalá, napa'acóloje me'epejí hua'até penaje.

³³E ra'apiyatéjena quemaño rijló: —Eta, ¿mere eyá chi huajña'ájla najló a'ajnejí? Iqui'iruna huani necá. Uncá nañacaré i'imalá maárohua.

³⁴Rimá najló. —¿Me ca'alá pan maare? —Iyamá cuhuá'ata ca'alá, huejápaja jíñana le'epé hua'até —que nemacá rijló.

³⁵E rihuacára'a nayá'aco te'erí e'iyajé.

³⁶Quéchami rijña'acá ricápojo iyamá cuhuá'ata ca'alá pan, jiña hua'até. E rimá Tupánajlo: —Palá pili'ichaca huecá marí a'ajnejí aú. Quéchami ritupa'ataca pan naquiyana najló. Ra'á ra'apiyatéjenajlo ricá, natamáca'atacaloje ina'uquejlo penaje.

³⁷Piyuqueja necá ajñaño rinaquiyana namano'ocá ejé. Cuatro mil achiñana ajñaño na'ajnehuá inaana, yuhuaná quele hua'até. Achiñánaja calé nalapa'atá i'imacá. Uncá nalapa'atala inaana, yuhuaná, quele. Piyuque necá ajñaño na'ajnehuá re. Quéchami nahuacata rijlupemí. Iyamá cuhuá'ata ca'alá cuhuá'ala namano'otá pu'uteno huánija rijlupemí aú.

³⁹Nañapátaca na'ajnehuá ajñacana ejomi Jesús quemari najló napa'acóloje penaje. E rihuítuca'a jita chojé. Ne'ejná ají que Magadán te'eré ejo.