Read Jukuna Marcos 13 Bible Online

Marcos 13 - Jukuna bible

Marcos 13

¹Jesús jácho'oro Tupana ñacaré chiyá. Aú pajluhuaja ra'apiyatéjeri quemari rijló: —Huehuíña'atajeri, pamala marí Tupana ñacaré. Jipa naquiyá la'acanami ricá. ¡Meque palani huani ricá!

²Jesús quemari rijló: —Tupana ñacaré pamácare me'etení, jipa naquiyá la'acanami ricá. Uncá ri'imalaje maare. Aquijñojo ajopana, chapú péchuruna, cajya'atájeño piyuqueja ricá. Ejomi uncá pajluhuaja ñani jipa yurílajo pachácaca —que rimacá rijló. Jesús quemari najló méqueca ri'imajica eja'ahuá chu, eja'ahuá capichájico piyá. Riyucuna marí:

³E Jesús i'ijnari yenuri Olivos ejo. Re ri'ihuata nacú riyá'o Tupana ñacaré ejo pumitá. E caja Pedro, Santiago, Juan, Andrés, quele i'ijnaño Jesús chaje. Necámica que ne'emacá re. E nemá rijló:

⁴—Pimá huajló méquechamica ri'imajica quele pimíchaje nacú huajló. ¿Na aú chi ina'uqué hue'epéjeño méquechamica riphájica rená chojé? —que nemacá rijló.

⁵Jesús quemari najló: —Jema'aniya ajopana ja'apiyá; napajlájica ijhua'até.

⁶Iqui'iruna ina'uqué iphájeño. Na'ajé nuí, neí hua penaje. Apú, apú que nemájica nanacuhuá: “Ricá Tupana huacára'acare majó ina'uqué i'imatájeri penaje nucá”, que nemájica nanacuhuá. Napajlájica najhua'até raú. Cajrú ina'uqué jema'ajeño na'apiyá.

⁷’Marí que nemájica ijló: “Nenócaco pajhua'atéchaca maárohua que, ya'ajnárohua que”, iquero'oniyo raú. Caja queja ri'imajica. Uncá jo'ó eja'ahuá tajnálajo nenócajico huacajé.

⁸Ajopana te'eré eruna nócajeño ajopana te'eré eyájena hua'até. Ajopana huacára'ajeri hua'atéjena nócajeño ajopana huacára'ajeri hua'atéjena hua'até. Cajrú te'erí ñaca'ajico apú eyá, apú eyá que rihuacajé. Cajrú caja ina'uqué taca'ajica me'epejí nacú rihuacajé. Marí caje aú ina'uqué queño'ojeño chapú caje yajhué ña'acana panacu.

⁹Ihue'epí méqueca nala'ajica ricá. Najña'ajé icá ihuacára'ajeño ejo, no'opiyá jema'ajeño i'imacale. Naña'ataje icá ina'uqué jahuacáca'alo ñacarelana chu. Itára'ajo caja ihuacára'ajeño jimaje, ajopana, ajopana que jimaje, naculácatacoloje inacu penaje. Marí que nala'ajica icá, no'opiyá jema'ajeño i'imacale. Marí caje aú i'imajé nuyucuna najló.

¹⁰Tupana i'imatájeri ina'uqué capichácajo liyá. Rená tajnaco piyá ne'emajé riyucuna piyuqueja ina'uqué eja'ahuá chu i'imacáñojlo.

¹¹Najña'ajica icá ihuacára'ajeño ejo huacajé, ihuó la'aniyo méqueca imájica najló piyá. Tupana Pechu quemájeri ijló méqueca imájica najló, riphájicaja rená chojé ijló. Uncá imalaje najló ipechu queja. Ripechu aú Tupana quemájeri ijló méqueca imájica nacaje nacú najló —que Jesús quemacá najló.

¹²Ne'iyajena ina'uqué a'ajeño nejena chapú nanacu péchurunajlo, nenócaloje necá penaje. Nachi'iná naquiyana a'ajeño najló nayani, nenócaloje necá penaje. Nayani naquiyana a'ajeño najló nachi'iná, nenócaloje necá penaje, que ne'iyajena la'ajica rihuacajé.

¹³Piyuqueja ina'uqué pechu i'imajé inacu chapú, jema'acale no'opiyá. Uncájica ee jácho'o Tupana puráca'alo ja'apiyá i'imacana itaca'ajica ejená, Tupana i'imatájeri icá capichácajo liyá.

¹⁴Danielmi chu i'imari Tupana puráca'alo ja'apátajeri i'imacá. Ricami chu lana'arí marí que papera chojé i'imacá: “Amájica ee nacaje pu'uhuareni huani tára'aco Tupana ñacaré chu, icá Judea te'eré eruna ñaajeño ipuré e'iyajé. (Marí papera amájeño, ihue'epí meque quemacánaca ricá.)

¹⁵Rihuacajé ca'ajná e'iyajena i'imajeño pají i'ihuata chu. Pu'ucuja iñaajico reyá. Uncá imujlúca'alaje pají chojé nacaje ña'ajé pamineco.

¹⁶Apala e'iyajena i'imajeño imena e'iyá. Icá caja ñaajeño pu'ucuja. Uncá caja ipa'alajo iñacaré chojé a'arumacaji ña'ajé pamineco.

¹⁷Chapú huani ri'imajica canupana inaánajlo rihuacajé. Chapú huani caja ri'imajica inaana cayaniquérunajlo. Ejo'ocaja i'iracaño chu'uchú nayani, quelejlo ri'imajé chapú rihuacajé.

¹⁸Cajrú iñaajico rihuacajé. Ipura'ó Tupana hua'até, ri'imacá piyá ipe'ení i'imajica huacajé.

¹⁹Rihuacajé cajrú ina'uqué ña'ajica chapú caje yajhué panacu. Tupana queño'ótaca eja'ahuá huacajé eyá uncá ina'uqué amálaño chapú caje yajhué, cajrú huani ri'imajica rihuacajé que caja. Uncá caja ri'imalaje ñaqué reyá a'ajná ño'ojó.

²⁰Tupana huitúca'atajeri najló rená, ri'imacá piyá júpija huani najló. Iqui'ija rihuátaca ina'uqué, ri'ihuapacárena rijluhua ajopana ina'uqué e'iyayá. Najló rihuitúca'ataje rená. Uncáquela rihuitúca'atajla rená najló, uncá na calé i'imarojla.

²¹Nemájica ijló: “Iyacá'o, maare ricá Tupana huacára'acare majó ina'uqué i'imatájeri penaje”. Marí que nemájica ee ijló, jema'aniya na'apiyá. Nemájica ee ijló: “Iyacá'o, a'ajnare ricá” que, jema'aniya caja na'apiyá.

²²Cajrú ina'uqué i'imajica, majopeja napajlájica. Majopeja nemájica apú, apú que nanacuhuá: “Nucá Tupana huacára'acare majó ina'uqué i'imatájeri penaje”. Ajopana caja quemájeño nanacuhuá: “Huecá ja'apátaño Tupana puráca'alo ina'uquejlo ra'apiyá que”. Nala'ajé caja cajrú nacaje uncá meño'ojó iná la'alare nená que'ená penaje, ina'uqué jema'acáloje nanacojó napuráca'alo penaje. Cajrú napajlájica najhua'até. Tupana ja'apiyá jema'ajeño hua'até caja nahuata pajlácana. Uncá meño'ojó napajlálaje najhua'até, uncale nema'alaje na'apiyá.

²³Ihue'epí numacare nacú. Uncá chiyó ri'imá ñaqué nu'umá riyucuna ijló —que rimacá najló. Jesús pa'ajico piño majó yucuna marí:

²⁴’Ina'uqué amájeño cajrú huani chapú caje yajhué i'imajica. Rihuacajé uncá camú camaré i'imalaje. Uncá caja queri amálajo, uncá ricamaré i'imalaje.

²⁵Ihuijrina caje ja'ajeño je'echú chiyá. Piyuque nacaje je'echú chu i'imacare ñaca'ajero.

²⁶Ejéchami namájica nucá huaíchaca juni suhuáca'ala e'iyohuá. Ina'uquéjloje penaje i'imacá nucá. Piyuque ina'uqué huacára'ajeri penaje nuphaje majó rihuacajé. Cajrú mejáma'atani i'imajica nohua'ó, hua'até nuphaje.

²⁷Nuphájica penaje nuhuacára'aje nujhua'atéjena je'echú chiyájena, ina'uqué huá'aje. Ina'uqué, nu'uhuapacárena nujluhua ajopana ina'uqué e'iyayá, huá'aje ne'ejnajé. Piyuqueja huani eja'ahuá e'iyayá nahuá'aje necá.

²⁸’Ihue'epí nupa'ajico nacojé. Caja ihue'epí a'ahuaná higuera nacojé. Ri'iché pitúca'ari, ripaná moto'ocáloje rinaquiyá penaje. Ri'iché pitúca'aca aú iná hue'epí jarechí iphaca rená chojé.

²⁹Ñaqué caja ihue'epíjica nupa'ajico majó nacojé. Amájica aú piyuque nacaje numíchaje nacú, ihue'epeje yehuicha riphaca rená chojé caja penaje.

³⁰Jema'á marí: Marí que ri'imajica ina'uqué tajnájico yámona.

³¹Je'echú, eja'ahuá hua'até tajnájero. E'iyonaja calé uncá nupuráca'alo tajnálajo. Numacá rinacu queja nacaje i'imajica.

³²Uncá na calé hue'epiri méquechamica nupa'ajico piño je'echú chiyá majó. Uncá caja Tupana hua'atéjena je'echú churuna, hue'epílaño noná. Ricaja calé Nora'apá, Tupana, hue'epiri noná.

³³’I'imá nupé maare. Ipura'ó Tupana hua'até. Uncá ihue'epílaje méquechamica nupa'ajico piño majó.

³⁴Marí que ricá: Apú i'ijnari ca'ajná ya'ajnaje. Riyurí riñacaré. Ri'ijnacá yámona rimá rijhua'até sápajeñojlo, nala'acáloje rijló nacaje, ya'ajná ri'imacá quetana penaje. Apujlo, apujlo que rimacá najló, nala'acáloje nacaje rihuátacare caje penaje. Pají hua'aphejlo rimá, rihuátacaloje ricá penaje. Ejomi ri'ijná ya'ajnaje.

³⁵Jesús quemari piño najló: —Ihuata nucá maare. Uncá ihue'epila méquechamica nupa'ajico majó. Nuphaje lapí ca'ajná, lapí jenaji que ca'ajná, capere apoca ee ca'ajná nuphaje, lapiyami ca'ajná nuphaje. Uncá iná hue'epila méquechamica nuphájica.

³⁶Apala quiñaja ca'ajná nupa'ajico. Uncá paala nomájica icá majopeja, uncá nuhuátacana nacú calé.

³⁷Numá ijló, ihuátacaloje nucá penaje. Ñaqué huánija numacá piyuque ina'uquejlo, nahuátacaloje nucá nuphájica majó ejena penaje —que Jesús quemacá najló.