Read Jukuna Marcos 4 Bible Online

Marcos 4 - Jukuna bible

Marcos 4

¹Ejomi ri'ijná piño caesa turenajo. Rejé cajrú huani ina'uqué jahuacaño piño rinacojé. Iqui'iruna ne'emacale, rihuitúca'a jita chojé yá'ajo. Ajopana yuriño que'epé nacú. E caja rehuíña'ata necá cajrú Tupana puráca'alo nacú.

²Nacaje yucuna i'imacana nacú rehuíña'ata necá rinacu. Ehuá Jesús i'imacá yucu najló marí que:

³—Jema'á. Pajluhuaja ina'uqué i'ijichari nacaje icha ijí ejátaje. Riqui'ichá richa ijí te'erí lamá'ataqueja jimahua.

⁴Rejátacana nacú ri'ijichá. Richa ijí, riqui'ichaje naquiyana, ja'acharo iñe'epú chojé. E caja cupira'aphana iphíchaño rajmílo'otaje.

⁵Apú richa ijí, riqui'ichaje naquiyana, ja'acharo jipa nacojé. Huejápaja te'erí i'imichari rinacu. Quiñaja riphíchaca, huejápaja te'erí i'imichácale rinacu.

⁶Camú moco'ochaca aú rimeríyi'icho, uncale ra'apare i'imalacha.

⁷Apú richa ijí, riqui'ichaje naquiyana, ja'acharo pu'uhuareni jimichi e'iyajé. Pu'uhuareni jimichi iphíchari nacaje icha ijí rejáchiyaje hua'até. Pu'uhuareni jimichi tahuá'añachari ricá. Raú rihuaji'ichá re'iyajé. Aú calé uncá rarúca'alacha.

⁸Eyá apú richa ijí, riqui'ichaje naquiyana, ja'acharo palani te'erí e'iyajé. Ilé calé iphíchari palá. Palá caja rarúqui'ichaca. Re'iyajé ejátacanami icha i'imari treinta ca'alá. Apú arúqui'ichari richahuá sesenta ca'alá. Apú arúqui'ichari piño richahuá cien ca'alá. Caja quetana riyucuna.

⁹Marí que ri'imacá yucu najló. Ejomi rimá rema'ajéñojlo: —Icá que'ejhuirúnajlo numá: A'á inacojó riyucuna. Jesús quemari ne'iyajénajlo nájeca ri'imacá yucu ina'uquejlo. Riyucuna marí:

¹⁰Jesús i'imacá ee ricó apojó, riyucuna jema'ajeño naquiyana i'ijnaño richaje riyucuna quejá'aje riliyá. Iyamá iphata ji'imaje nacojé quele ra'apiyatéjena i'imaño caja najhua'até. Nemá rijló: —¿Meque quemacana chi quele yucu pi'imichaje huajló?

¹¹E rimá najló: —Me'echuje ina'uquejlo méqueca Tupana la'acá, ina'uqué naquiyana i'imacáloje rijhua'atéjena penaje. Chuhua icá ihue'epíjica rinacojé. Eyá ajopana, uncá nujhua'atéjena calé necá, uncá hue'epílajeño rinacojé. Najló yucu queja ricá.

¹²Tupana puráca'alo ja'apátajerimi chu i'imari riyucuna júpimi i'imacá. Rimacá nanacu que necá. Marí que ri'imacá riyucuna i'imacá:Namaje nacaje. E'iyonaja uncá nahue'epílaje meque quemacánaca nacaje namájicare.Nema'ajé riyucuna. E'iyonaja uncá nahue'epílaje meque quemacánaca ricá.Ripháquela napechu nacojé, napajno'otácajla napéchuhua Tupana ejo pu'uhuaré nala'acare liyá.Raú ramojla nachaje pu'uhuaré nala'acare liyá —que rimacá riyucuna i'imacá. Jesús quemaca najló meque quemacánaca nacaje icha ijí ejátajeri yucuna marí:

¹³E rimá piño najló: —Uncachu ihue'epila meque quemacánaca cari yucu, uncá caja ihue'epílaje meque quemacánaca apa'amá yucu nu'umajícare ijló —que rimacá najló—. Marí que quemacánaca ricá:

¹⁴Tupana yucuna i'imajeri que caja nacaje icha ijí ejátajeri.

¹⁵Ri'imá Tupana yucuna cajrú ina'uquejlo. Ne'iyajena jema'añó riyucuna. E'iyonaja Jiñá Chi'ináricana ca'arí napechu naquiyá Tupana puráca'alo nema'acare. Richa ijí naquiyana ja'acó iñe'epú chojé, que caja najló ricá.

¹⁶Eyá richa ijí naquiyana ja'aró jipa nacojé, huejapa te'erí i'imacare nacojé. Mequetánaja calé rijña'acá panacu riphaca ejomi. Ñaqué caja ina'uqué naquiyánajlo ricá. Nema'á Tupana puráca'alo, pu'ují napechu la'acó raú.

¹⁷Mequetánaja calé napechu i'imacá palá ripuráca'alo nacú. Nahuátacale Tupana puráca'alo ja'apiyá i'imacana, ajopana ca'ajná la'añó necá chapú. Napura'ó ca'ajná nanacu pu'uhuaré. Namá ca'ajná chapú caje yajhué. Marí caje aú nayurí naliyó ricá, uncale napechu i'imalá caphí najluhua.

¹⁸Eyá richa ijí naquiyana ja'aró caja pu'uhuareni jimichi e'iyajé. Riphaca ejomi rihuaja'acá re'iyajé. Uncá rarúca'ala. Ñaqué caja ina'uqué naquiyánajlo ricá. Nema'á Tupana puráca'alo; naqueño'ó ra'apiyá i'imacana.

¹⁹E'iyonaja cajrú na'acá nanacojó nacaje marí eja'ahuá chu i'imacare. Cajrú nacaje huátacana najluhua nahue'epí natucumó. Napechu nacú ri'imá: “Palá hue'emajica cajrú liñeru hua'até, ñó'ope le'ejepelaji caje hua'até”. E'iyonaja uncá ñaqué calé ricá ina'uquejlo. Marí que péchuruna ne'emacale, uncá na'alá nanacojó Tupana puráca'alo, nala'acáloje palá ra'apiyá i'imacana aú penaje.

²⁰Eyá richa ijí naquiyana ja'aró caja palani te'erí e'iyajé. Ricá iphari palá; ritahuá'o; rarúca'a palá. Ñaqué caja ina'uqué naquiyánajlo ricá. Nema'á Tupana puráca'alo; na'á caja nanacojó ricá. Raú nala'á palá ra'apiyá i'imacana aú. Richa ijí naquiyana arúca'ari richahuá treinta ca'alá, sesenta ca'alá, cien ca'alá que. Ñaqué caja ricá Tupana puráca'alo ja'apiyá i'imacáñojlo. Ne'iyajena la'añó palá huejápaja. Richaje, richaje que ajopana la'acá palá —que ra'apátaca najló riyucuna. Iná camaré yucuna marí:

²¹Rimá piño najló: —Iná lucúna'acachu iná camaré, uncá iná yá'atala ricá me'echú i'ichí lájma'ataqueja ja'apejé. Uncá caja iná yá'atala ricá iná camané ja'apejé. Yenú iná yá'ata ricá, ripatacáloje palá iná camaré penaje.

²²Re Tupana puráca'alo naquiyana me'etení, me'echuje ricá ina'uquejlo. Quéchami nahue'epíjica rinacojé.

²³Jema'á, icá que'ejhuiruna —que rimacá najló.

²⁴Rimá piño najló: —Jema'á palá Tupana puráca'alo. A'ajeño nanacojó ricá pechu rila'ajé palá, nahue'epícaloje richaje, richaje que rinacojé penaje. Eyá necá uncá a'alaño nanacojó ricá, Tupana ca'ajeri naliyá huejápaja nahue'epícare rinacojé. Jesús i'imari najló nacaje ejátacanami tahuá'aco yucuna, nahue'epícaloje me'echuje inajlo méqueca Tupana la'acá nacaje penaje. Riyucuna marí:

²⁵

²⁶Jesús quemari piño najló: —Ina'uqué naquiyana huacára'ajeri Tupana. Chuhua nu'umajica yucu ijló, ihue'epícaloje rinacojé raú penaje: Apú i'ijnari nacaje icha ijí ejátaje te'erí lamá'ataqueja e'iyajé.

²⁷Lapí ricamato, lapiyami rapó risápaca'ala nacojé. Muní, muní que ñaqueja hua'até ricá. Hua'até que nacaje rejátacare iphaca, tahuá'aro rijló. Uncá rihue'epila naca tahuá'ataca ricá.

²⁸Te'erija calé tahuá'atari ricá. Pamineco rihuirulá jeño'orí. Ricá huicho'oró ripaná penaje. Ejomi rihuí jeño'orí, ricá chiyá richa jeño'orí caja. E caja penaje richa iphari rená chojé, paminá ña'acáloje richa penaje.

²⁹Raú ri'ijná richa ña'ajé. Caja quetana riyucuna. Jesús i'imari najló mostaza ijí yucuna nahue'epícaloje méqueca rijhua'atéjena ñaté a'acó richaje, richájeno que penaje. Riyucuna marí:

³⁰Jesús i'imari piño najló yucu marí que: —Ina'uqué naquiyana huacára'ajeri Tupana. Re rijhua'atéjena huejápaja. Ehuá richaje, richaje que íqui'irunaca necá rijhua'atéjena. Chuhua nu'umajica yucu ijló, ihue'epícaloje méqueca ricá penaje.

³¹Mostaza ijí que ricá, iná ejátacare iná i'icacapere e'iyá. Capajé nojé huani rijí. Uncá apú i'imalá ra'apejé marí eja'ahuá chu.

³²Rejátacana ejomi riqueño'ó iphácaje. Richaje, richaje que ritahuá'aco. Jíma'alami yenuna quetana ritahuá'aco. Cajrú nojé caja ri'iché. Ripaná e'iyá cupira'aphana, camejérina cayuphéruna, cajena la'añó nañacaró re'iyá.

³³Marí que Jesús jehuíña'atajica necá cajrú Tupana nacú yucu i'imacana aú. A'ajná nahue'epíjica ricá ejená, ri'imaqué najló yucu.

³⁴Necámica que ne'emajica ra'apiyatéjena hua'até ee rihuicho'oqué piyuque riyucuna najló. Jesús quemari carenajlo, ra'apaca piyá yucuna marí:

³⁵E caja najúhua'a. Raú rimá ra'apiyatéjenajlo: —I'ijná, huacuhuá'achi caesa pa'anajo pitá. —Je —que nemacá.

³⁶Ne'emá nayucuno ina'uquejlo. Ejomi ra'apiyatéjena huitúca'año jita chojé, Jesús yá'acaro chu chojé nahuitúca'a. E naqueño'ó caesa cuhuá'acana pa'anajo pitá. Cha'apá ajopana, ajopana que cuhuá'año caja netane chu najhua'até.

³⁷Pe'iyojechá nacuhuá'aca ricá. Ejéchami mana'í chiyó carená noca necá caphí huani. Carená yoco'orí juni na'apiyá, amo'oró jita chojé cajrú juni. Ujú caje chiyó nejácajla.

³⁸E'iyohuá que Jesús camátaco ri'ipala chu. Rihuíla'aru ja'apí ja'ajona e'iyá ricamato. Huajé naqueño'ocá ejácaje ee napótaca ricá. —Huehuíña'atajeri —que nemacá—. ¿Uncá chi pa'alá pinacojó huacapichaco chuhuaca?

³⁹E Jesús jácho'oro, raca'á carená, rimá carenajlo: —Pa'apániya. Júnijlo rimá: —Piyoco'oniyo. Raú uncá carená ja'apala. Hua'ató que uncá juni yoco'oló. Mana'íja ri'imacá reyá.

⁴⁰E rimá ra'apiyatéjenajlo: —¿Naje chi iquero'ochó? ¿Uncá jo'ó chi ipechu i'imalá caphí nochojé? —que rimacá najló.

⁴¹Quero'ocajo nacú jo'ó ne'emacá. E nemá pajlocaca: —¿Na ca'ajná cari? Carená, juni hua'até jema'arí ra'apiyá.