Read Jukuna Marcos 5 Bible Online

Marcos 5 - Jukuna bible

Marcos 5

¹E caja nephá caesa pa'anajo pitá, Gerasa te'eré ejo.

²E Jesús jácho'oro jita chiyá. Ejéchami apú ina'uqué iphaca rinacu. Jiñá pechu i'imari re'iyá. Támijimina ca'aquelana, jipa e'iyá i'imacare, chiyá riphá.

³Támijimina ca'aquelánaja i'imari rapucuna.

⁴Catejmuni huani ri'imacá. Pulapé nepo'otajla ricá curete aú. E'iyonaja rimata'á curete ta rinacojó. Uncá repo'ojona i'imalá; uncá caja na calé jepo'otárijla ricá. Na'aqué caja pejru'uhuá ra'anapitá nacojé, ritajné nacojé hua'ató. Rimajáca'ataque rinacojó ricá, rijítaminoja yuríquero raú. Uncá na i'imaqué ritejmú e'ehué; uncá na calé chá'ataqueri ricá.

⁵Hue'echú ca'alá queja, lapí hua'ató richira'acó ahuíyo'ocaje nacú ipuré e'iyohuá, támijimina ca'aquelana e'iyohuá hua'ató. Ritujla'aqué ricó jipa aú. Ricá penaje iphari Jesús nacú.

⁶Ramaca aú Jesús júcaya recho'ó riloco'opani. Riphá rinacu ee ritára'o ri'irúpachi aú rijimaje.

⁷E Jesús quemari jiñá péchu re'iyá i'imacárejlo: —Pácho'o re'iyayá. Cajrú rahuíyo'oca raú, rimá rijló: —Jesús, Tupana I'irí picá. Tupana je'echú churí i'irí picá. ¿Naje picahuíla'a nunacu? Pijló numá: Pila'aniya chapú nucá, uncá paala Tupánajlo ricá —que rimacá Jesusjlo.

⁹Jesús quemari rijló: —¿Na pií? —Nuí íqui'iruna, íqui'iruna hue'emacale.

¹⁰Mahuó rimacá Jesusjlo, rihuacára'aca piyá necá reyá.

¹¹A'ajnare que cajrú je'eruna piracana chira'acó yenuri nacuhuá na'ajnehuá culácana nacú.

¹²Raú jiñana pechu quemaño rijló: —A'ajnáruna e'iyajé pihuacára'a huecá.

¹³—Je —que Jesús quemacá najló. Raú jiñana pechu jácho'oño ilé ina'uqué e'iyayá, ja'añó je'eruna piracana e'iyajé. Dos mil je'eruna ne'emacá. Jiñana pechu ja'acó aú ne'iyajé necho'ó ají que a'ajná ño'ojó. Yenuri ji'ihuátaya na'ó caesa acojé. Rejeja nacapichó piyuqueja junápeje.

¹⁴Marí caje aú nalamára'ajeño penájemina ñaañó reyá. Ne'emá riyucuna pajimila erúnajlo, ajopana rehuá i'imacáñojlo hua'até. Raú cajrú ina'uqué i'ijnacá rejo ramaje.

¹⁵E nephá Jesús nacú. Amaño ilé ina'uqué Jesús jácho'otacare e'iyayá jiñana pechu. Re riyá'o Jesús hua'até. Ca'arumacani ri'imacá; palá ripechu i'imacá. Marí que namaca aú ricá naquero'ó ripiyá.

¹⁶Re i'imacaño amaño maapami que Jesús jácho'otaca jiñana pechu re'iyayá. Namá caja je'eruna capichaco junápeje. Necá penájena i'imaño riyucuna huajé iphácañojlo.

¹⁷E caja nemá Jesusjlo: —Pácho'o huate'eré naquiyá. —Je —que rimacá.

¹⁸E rihuitúca'a jita chojé. Ejéchami jiñana pechu i'imacare e'iyá penájemi quemacá rijló mahuó: —Nu'ujná pijhua'até.

¹⁹—Uncá pi'ijnalaje nujhua'até —que Jesús quemacá rijló—. Pipa'ó piñacaré ejo, pi'imacáloje pejena hua'até penaje. Palá huani Tupana li'ichaca picá. Cajrú rihue'epíchaca pimu'ují. Eco pi'imá riyucuna najló —que rimacá rijló.

²⁰—Je —que rimacá. E ripa'ó. Riqueño'ó riyucuna i'imacana rite'eré ehuájenajlo. Re'iyohuá iyamá té'ela quele pajimila i'imacá. Re ri'imá palá Jesús la'acare ricá yucuna najló. Riyucuna jema'ajeño pechu i'imá Jesús nacú: “¡Meque piyuque huani rila'acá!” Jesús macápo'oca Jairo itu yucuna. Quecha apa'ahuelo tejmo'otaco Jesús a'arumacá nacú sápacana aú yucuna marí:

²¹E caja Jesús cuhuá'ari jita chu ají que rapumí chuhuá piño caesa pa'anajo pitá. Narúca'aco ejé cajrú ina'uqué jahuacaño rinacojé.

²²E apú iphari rinacu, Jairo rií i'imacá. Nahuacáca'alo ñacarelana chiyá huacára'ajeri ri'imacá. Riphá rinacu. E rijláma'o ri'imá nacojé.

²³Rimá rijló: —Aquíchajeru huani nutu, yehuíchaja rupechu capichaco. Pi'ijná nujhua'até nuñacaré ejo, pito'ochíyachi piyáte'ela runacojé, ru'umacóloje raú penaje —que rimacá rijló.

²⁴—Je —que Jesús quemacá rijló. E ri'ijná rijhua'até. Cajrú ina'uqué i'ijnaño rápumi chu. Cajrú namajra'acá ricá.

²⁵Najhua'até caja apa'ahuelo ja'apayo, rutami ru'umacá. Iyamá iphata ji'imaji nacojé quele jarechí quetana ru'umacá rutami. Jirá ja'apáqueri runaquiyá.

²⁶Caja cajrú pusána'ajeño atá'añojla rupusána'acana. Cajrú huani rujña'ajica quehuini yajhué panacu raú. Ruca'á ruliñérute piyuqueja, napusána'acaloje rucá penaje. E'iyonaja ñaqueja hua'até ru'umaqué. Richaje, richájeno que romájica quehuini yajhué.

²⁷Ehuá ne'emacá rojló Jesús yucuna. Aú ru'ujná ramaje. Ajopana hua'até ro'opá rápumi chu. Eyá rusapa ina'uqué ihuami chiyá ra'arumacá ji'imá nacú.

²⁸Rupechu i'imá: “Nusápajica ee ra'arumacá nacú, nutejmo'otajo raú.”

²⁹E rusapa rinacu. Hua'ató que jirá ja'apácare runaquiyá mata'acó runacojé. Caja peyajhueru ru'umacá rejeja. Raú ruhue'epí runapona tejmo'otaco rojló.

³⁰Jesús hue'epiri ritejmo'ótaca rucá ripechu aú ja. Raú ripajno'ó riyámojo nachaje yacá'ajo. Rimá najló: —¿Na sápichari no'orumacá nacú?

³¹E ra'apiyatéjena quemaño rijló: —¿Uncá chi pihue'epílacha cajrú ina'uqué majri'ichaca picá? ¿Eta naje chi pimá nanacu?: “¿Na sápichari no'orumacá nacú?”

³²Jesús yacá'aro ne'iyohuá piyuqueja, ramácaloje naca sápari ra'arumacá nacú.

³³Ilerú inanaru hue'epiyo caja rutejmo'otaco. Aú ru'ujná riloco'opani quero'ocajo nacú. Cajrú rucurúcaca. E rutára'o ru'urúpachi aú rijimaje. E ru'umá rijló riyucuna piyuqueja. Aú Jesús quemari rojló:

³⁴—Caja pitejmo'ochiyo chuhua, pipechu i'imacale caphí nochojé. Pipechu i'imichá nunacu: “Ricá ja'apátajeri nutami caje nuliyá” que. Aú calé pitejmo'ochiyo. Chuhua pi'ijná palá ca'ajnó. Caja pitejmo'ochiyo piyaripune liyá —que rimacá rojló.

³⁵Marí que rimacá rojló ee ajopana iphaño Jairo nacú. Riñacaré eyá nahuacára'a ne'emacá. Nephá rinacu. E nemá rijló: —Caja pitu taqui'ichayo; caja rupechu capiícharo. Uncá na penaje calé picahuíla'a Jesús Huehuíña'atajeri nacú ruchaya —que nemacá rijló.

³⁶Uncá Jesús a'alá rinacojó napura'acó. Rimá nahuacáca'alo ñacarelana chiyá huacára'ajerijlo:

³⁷—Pila'aniya picó camu'ují. Pila'á pipéchuhua caphí nochojé. E rimá ajopánajlo: —I'ijnaniya nujhua'até, maáreja iyuró. Pedro, Santiago, re'ehué Juan, queleja rihuá'a rijhua'ató.

³⁸E caja nephá riñacaré ejo, amaño cajrú ina'uqué i'imacá re. Cajrú namejé i'imacá. Nahuinano la'acana nacú cajrú neyaca rucá.

³⁹E rimujlúca'a rejo, rimá najló: —¿Naje ila'á ihuinano cajrú huani maare? ¿Naje chi iyá rucá? Uncá rutaca'alacha, rucamáchiyacoja calé —que rimacá najló.

⁴⁰Raú ne'echá rinacu. E Jesús quemari najló piyuque, namujlúca'acaloje a'ajná ño'ojó penaje. Rihuá'a rijhua'ató rora'apami, rolomi, rijhuáque'ena, queleja rihuá'a rijhua'ató. E namujlúca'a ucapú támijimi i'imacare chojé.

⁴¹E ripatá rucá ruyáte'ela naquiyá. Rimá támijimijlo: —Talita cumi —que. Napura'acó chu rimá rojló: “Yuhualó, pijló numá, pácho'o.”

⁴²Raú ja rócho'o; ruchira'ó. Iyamá iphata ji'imaji nacojé quele jarechí ru'umacá. Rijhua'até i'imacaño pechu i'imá rinacu: “¡Meque piyuque huani rila'acá!”

⁴³Raca'acó rimacá najló nemacá piyá rimacápo'oca rucá yucuna ajopánajlo. E rimá najló: —A'á rojló a'ajnejí.