Read Jukuna Marcos 7 Bible Online

Marcos 7 - Jukuna bible

Marcos 7

¹E caja fariséona naquiyana jahuacaño Jesús nacojé. Tupana puráca'alo nacú jehuíña'atajeño i'imaño caja najhua'até. Jerusalén eyájena ne'emacá.

²Necá amaño Jesús ja'apiyatéjena naquiyana ajñaca na'ajnehuá. Uncá nepala nayáte'ela chiyá pamineco, peñahuilánami chuna quemájica que.

³Uncachu fariséona ipala nayáte'ela chiyá pamineco cajrú, peñahuilánami chuna quemájica que, uncá najñaque na'ajnehuá. Piyuque ajopana judíona la'aqueño ñaqueja caja.

⁴Nephácachu le'ejepelaji ñacarelana eyá nañacaré chojé, nepaque cajrú nayáte'ela chiyá pamineco. Rejomi najñaque na'ajnehuá. Cajrú apú nacaje nala'ajica nachi'inami chuna quemacá najló que. Majopeja nepájica nachiyélane chiyá, napero'ojlone chiyá, ne'eté chiyá caje macá. Ñaqué caja nepájica napero'ojlone palani sereni naquiyá la'acanami chiyá.

⁵E caja fariséona, Tupana puráca'alo nacú jehuíña'atajeño, quele iphaño Jesús nacú. Nemá rijló: —¿Naje chi uncá pa'apiyatéjena la'alaño peñahuilánami chuna quemájica que? Uncá nepala nayáte'ela chiyá najñaca na'ajnehuá piyá, peñahuilánami chuna la'ajica que caja —que nemacá rijló.

⁶E rimá najló: —Pajlácachina huani icá. Icá la'añó icó palá la'ajeño que ajopana ijlú chu. E'iyonaja uncá ñaqué calé icá. Palá huani Tupana puráca'alo ja'apátajerimi chu, Isaíasmi chu, i'imacá iyucuna júpimi que. Marí que rilana'acá papera chojé iyucuna rihuacajé:Marí que Tupana quemacá ina'uqué nacú:Mariruna ina'uqué pura'añó palá huani nunacu nanuma chiyaja calé.E'iyonaja nahuajhué nacú, uncá nahuátala nucá.

⁷Uncá na penaje calé nahuacono pajhua'atéchaca nahuacáca'alo ñacarelana chojé, nala'acáloje pu'ují napéchuhua nunacu penaje.Peñahuilánami chuna puráca'alomi nacuja calé nehuíña'ata huani ina'uqué.Tupana puráca'alo ricá japi que nehuíña'ataca necá rinacu, que ripuráca'alo lana'aquéjami quemacá, Isaíasmi chu lana'acare i'imacá.

⁸Jesús quemari piño najló: —Icá yuriño Tupana puráca'alo a'acana inacojó, ila'acáloje peñahuilánami chuna quemacá que rilanaquiya penaje. Peñahuilánami chuna la'ajica que caja ila'acá cajrú nacaje. Majopeja ipaca ipero'ojlone chiyá, ichiyélane chiyá caje macá.

⁹Palá ihue'epica Tupana puráca'alo yurícana iliyó, ila'acáloje peñahuilánami chuna quemacá que penaje.

¹⁰Marí que Moisesmi chu quemacá nayani nacú i'imacá: “Iphá ichi'iná ja'apí. Eyá pura'ajero pu'uhuaré richi'iná nacú, inoje”, que rimacá najló rihuacajé.

¹¹Eyá icá me'etení uncá a'alaño inacojó ricá. Re nayani naquiyana maárohua, quemaño marí que nachi'inajlo: “Uncá meño'ojó hua'alá iñaté liñeru aú. Caja hua'á Tupánajlo hualiñérute”, que nemacá najló.

¹²Majopeja nemacá, uncale nephala nachi'iná ja'apí. E'iyonaja icá uncá quemalaño najló, nephaca piyá na'apihuá nachi'inajlo.

¹³Marí que la'acana aú uncá a'alá inacojó Tupana puráca'alo. Cajrú nacaje ila'acá ñaqueja caja ricá. Peñahuilánami chuna puráca'alomi ja'apátacana nacuja ihue'epí itucumó. Apujlo, apujlo que, i'imacá riyucuna. Yuhuanajlo hua'ató que i'imacá riyucuna. Uncá huani paala ricá —que rimacá najló.

¹⁴Ejomi Jesús quemari ajopana ina'uquejlo, nahuacácoloje rahua'ajé penaje. Raú nahuacó rejo. E rimá najló: —Chuhua jema'á marí meque quemacánaca ricá:

¹⁵Iná numá chojé iná a'á a'ajnejí, iná ajñácaloje ricá penaje. Uncá iná la'alá pu'uhuaré raú. Eyá iná numá chiyá iná pura'ó pu'uhuaré. Raú calé iná la'á pu'uhuaré.

¹⁶Icá que'ejhuiruna, jema'á meque quemacánaca numacare nacú ijló —que rimacá najló.

¹⁷Ejomi Jesús ja'apáñari necá, mujlúca'ari pají chojé. Re ra'apiyatéjena quemaño rijló: —¿Meque ricá quele pimíchaca nacú huajló?

¹⁸Rimá najló: —¿Uncá caja chi ihue'epila? ¿Uncá chi ihue'epila a'ajnejí ajñacana nacojé? Iná numá chojé iná a'á a'ajnejí, iná ajñácaloje penaje. Uncá iná la'alá pu'uhuaré raú.

¹⁹Uncá a'ajnejí pachá calé iná la'á pu'uhuaré. Rihuitúca'a iná huo chojé. Caja penaje ra'apá iná e'iyayá. (Marí que rimacá aú rimá piyuque a'ajnejí nacú: Palani ricá, iná ajñácaloje penaje.)

²⁰Rimá piño ra'apiyatéjenajlo: —Uncá iná la'alá pu'uhuaré a'ajnejí a'acana iná numá chojé aú. Eyá iná numá chiyá iná quemá nacaje nacú iná pechu nacú ri'imacá que. Pu'uhuaré péchuruna ina'uqué. Aú calé nala'á pu'uhuaré napechu queja. Ricá pachá pu'uhuaré la'ajeño ina'uqué.

²¹Napechu locópa'alaja ina'uqué la'acá nacaje. Pu'uhuaré péchuruna ne'emacale, ne'ejnatá napéchuhua, nala'acáloje pu'uhuaré raú penaje. Pu'uhuaré péchuruna ina'uqué i'imacale, nala'á namanaicho pajhua'atéchaca. Pu'uhuaré péchuruna ina'uqué i'imacale, nenó pecohuácaca.

²²Pu'uhuaré péchuruna ina'uqué i'imacale, nata'á ajopana liyá nanane. Pu'uhuaré péchuruna ina'uqué i'imacale, nahuata ajopana le'ejé nacaje najluhua. Pu'uhuaré péchuruna ina'uqué i'imacale, nala'á chapú huani. Pu'uhuaré péchuruna ina'uqué i'imacale, uncá ina'uquélaruna necá. Pu'uhuaré péchuruna ne'emacale, chapú nahuó i'imacá nachá'atajeño cha. Pu'uhuaré péchuruna ne'emacale, nachapújra'o ajopana nacú. Pu'uhuaré péchuruna ina'uqué i'imacale, nala'á necó hue'epiño que huani. Pu'uhuaré péchuruna ne'emacale, nala'á namanaicho.

²³Ina'uqué pechu nacuja calé manaíchaji la'acana. Ricá aú nala'á pu'uhuaré najluhua. Pachá pu'uhuaré la'ajeño necá —que Jesús i'imacá najló riyucuna. Ajopana te'eré eyájeru pechu i'imacá caphí Jesús chojé yucuna marí:

²⁴E caja Jesús i'ijnari reyá ají que Tiro, Sidón, quele te'eré ejo. Riphá rejo. E rimujlúca'a pají chojé, ajopana ina'uqué amaca piyá ricá. E'iyonaja uncá meño'ojó rimicho'oló naliyá.

²⁵Apa'ahuelo jema'ayó riyucuna. Ajopana te'eré eyájeru ru'umacá. Rutu e'iyá jiñá pechu i'imari. Rucá iphayo Jesús nacú. E rujláma'o ri'imá nacojé, rumá rijló: —Pila'á nojló nacaje. Pica'á jiñá pechu nutu e'iyayá.

²⁷Raú rimá rojló: —Uncá paala pan ña'acana Israelmi chu laquénami liyá, iná a'acáloje ajopana te'eré eyájenajlo, yáhuinajlo penaje. (“Yáhuina” que judíona quemájica ajopana te'eré eyájena nacú.)

²⁸—Que jo'ó Hue'emacana —que rumacá rijló— yáhuina ajñaño caja pan mujrumi te'erí e'iyajé ja'acó.

²⁹Raú Jesús quemari rojló: —Palá huani pimíchaca nojló. Chuhua pipa'ó piñacaré ejo. Caja jiñá pechu iícharo pitu e'iyayá.

³⁰Ejomi rupa'ó ruñacaré ejo; iphayo; amayo rutu to'ocó mana'íja rucamané chu. Caja jiñá pechu jácho'oro ro'iyayá i'imacá. Jesús lamá'ataca me'ejhuirú, manumarú i'imacare, yucuna marí:

³¹Jesús i'imari pajimila Tiro yámojo. E caja rácho'o reyá. Ra'apá piño ají que pajimila Sidón yámojo. Iyamá té'ela quele pajimila i'imacá rehuá. Rahua'ayá ra'apá, iphari caésa turenaje. Galilea na'acá rií.

³²Rejé ajopana huá'año pajluhuaja me'ejhuirú. Ricaja caja i'imari manumarú. Nephá Jesús nacú. E nemá rijló, rilamá'atacaloje ricá penaje.

³³E Jesús huá'ari ricá a'ajná ño'ojó que ina'uqué liyá. E rarúca'a riyatehuana me'ejhuirú i'ijhuí chojé. Ejomi ratupá rahui riyatehuana nacojé. Raú risapa me'ejhuirú lená nacú.

³⁴Rejomi riyacá'o yenoje je'echú chojé. Ra'amá re'iyohuá. E rimá: —Efata. Marí que rimacá napura'acó chu: “Pijme'etó” que.

³⁵Reyá a'ajná ño'ojó palá rema'acá, palá caja ripura'acó.

³⁶E Jesús quemari najló, ne'emacá piyá riyucuna ajopánajlo. Marí que rihuacára'ajica ee necá, richaje na'apátaque riyucuna ajopánajlo.

³⁷Piyuque riyucuna jema'ajeño quemaño: —Palá huani rila'acá piyuque nacaje. Me'ejhuiruna rilamá'ata, nema'acáloje penaje. Manumaruna rilamá'ata caja, napura'acóloje penaje.