Read Jukuna Lucas 14 Bible Online

Lucas 14 - Jukuna bible

Lucas 14

¹Apú huatána'acaje huacajé Jesús i'ijnari apú fariséona huacára'ajeri ñacaré ejo ra'ajnehuá ajñaje. Re caja apú i'imari. Ritami ri'imacá. Ra'anapitá, ritajné hua'até jenátaro. Nacú ri'imá ritami. Ajopana re i'imacaño yacá'año Jesús chaje, namácaloje méqueca rila'ajica ricá huatána'acaje huacajé penaje.

²(null)

³Tupana puráca'alo nacú jehuíña'atajeño, fariséona, quele ne'emacá. E Jesús quemari najló: —¿Meque chi Moisesmi chu puráca'alomi lana'aquéjami quemacá natámina tejmo'ótacana nacú? ¿E iná la'acá chapú necá natejmo'ótacana aú huatána'acaje huacajé? —que Jesús quemacá rijló.

⁴Uncá na'ajipalá rijló. Raú ripatá ritami riyáte'ela naquiyá. Ritejmo'óta ricá, rimá rijló: —Chuhua pi'ijná palá ca'ajnó.

⁵E rimá najló: —Re ca'ajná ulahuí juni phuni. Re caja juni richu. Icahuarute ca'ajná, jematé ca'ajná, ja'aquelo richojé huatána'acaje huacajé. ¿E jácho'otacajla ricá richiyá rihuacajé?

⁶Raú namanúma'o. Jesús quemari najló nala'acá piyá necó chá'atajeño que huani yucuna marí:

⁷Apú quemari ajopánajlo, ne'ejnacáloje richaje penaje. Re ne'emá rijhua'até riñacaré chu. E Jesús amari necá paminá yucupéra'acarena. Palá nojé ñáca'ajori naculá najluhua. Raú rimá najló:

⁸—Apala nayucupéra'aje icá, i'ijnacáloje nahuá'acaco a'ajnená ajñaje najhua'até penaje. Iphájica ee rejo, iyá'aniyo palá nojé ñáca'ajori chu. Apala nahuata ricá apujlo, ichaje naaloje nahuá'acaco a'ajnená ajñaje najhua'até penaje. Majopéjaruna le'ejé ñáca'ajori chojé iyá'ajo pamineco. Raú ca'ajná paminá iphari inacu. Rimá ca'ajná ijló: “Nujhuáque'ena, a'ajná chu iyá'icho palani ñáca'ajori chojé, nuhuátacarenajlo penaje quele ñáca'ajori”. Raú ijhua'até yá'ajicaño pechu i'imajé inacu palá.

¹⁰

¹¹Iná pechu i'imacachu iná nacuhuá marí que: “Nucá chá'atari ajopana ina'uqué”, Tupánajlo iná i'imá ajopana ja'apejé. Iná pechu i'imacachu marí que iná nacuhuá: “Ajopana chá'ataño nucá”, Tupánajlo iná i'imá ajopana chá'atajeri —que Jesús quemacá najló.

¹²E Jesús quemari piño paminajlo: —Pihuacára'ajica ee a'ajnejí la'acana ajopana ina'uquejlo, piyucupéra'aniya pihuátacarena, pejena, pahua'á ñacajelaruna, cajrú le'ejepeláruna i'imacárena, cajena. Pimaniya ilé cajénajlo, najñácaloje na'ajnehuá pijhua'até penaje. Quéchami nemájica caja pijló, pajñácaloje pa'ajnehuá najhua'até penaje. Marí que la'acana aú apiyácaje pajhua'atéchaca.

¹³Marí cajénajlo pimá, najñachi na'ajnehuá pijhua'até: Pimá camu'ují la'acáñojlo, apicháca'alo moto'ocáñojlo, uncá meño'ojó ja'apálaño palajlo, mejlurúnajlo, quelejlo pimá, najñachi na'ajnehuá pijhua'até.

¹⁴Marí que la'acana aú Tupana la'ajeri picá palá. Uncá meño'ojó napiyácala picá ñaqué la'acana aú. Tupana macápo'otajica palá la'ajéñomi chuna huacajé, ra'ajé pijló palá pila'acare huemí —que Jesús quemacá rijló. Tupana quemari ina'uquejlo, ne'emacáloje rijhua'atéjena penaje. Jesús i'imari najló yucu, nahue'epícaloje rinacojé raú penaje. Marí riyucuna:

¹⁵Na'ajnehuá ajñacana nacú ne'emá re. Rahua'á yá'aco jema'arí méqueca rimacá apujlo. Aú rimá Jesúsjlo: —Pu'ují péchuruna ne'emajica, ajñájeño na'ajnehuá Tupana hua'até je'echú chu.

¹⁶Raú Jesús i'imari rijló yucu marí que: —Apú huacári'icha ajopana, nayucupéra'acaloje cajrú ina'uqué penaje.

¹⁷Ehuá caja na'ajnehuá ajñacana iphíchari rená chojé. Raú rihuacári'icha rijhua'até sápajeri riyucupéra'acarenajlo quemaje. Rimicha rijló: “Pimicha najló: ‘Caja a'ajnejí ñapíchari. Chuhua i'ijná rejo, ajíchachi a'ajnehuá’, que pimájica najló.” “Je.”

¹⁸Aú ri'ijichá apú chojé, apú chojé que riyucuna i'imajé najló. E'iyonaja ijnú nahuáchiyaca rejo i'ijnacana. Pamineco riphíchaje nacú quemíchari rijló: “Huajé nuhuarúhui'ichaca apú liyá rimena. Ricá nuhuata amácana me'etení. Ñaquele uncá nu'ujnalaje rejo”, que rimíchaca rijló.

¹⁹E ra'apicha piño apú chaje. Ricá quemíchari rijló: “Nuhuarúhui'icha iyamá té'ela quele jémana piracana. Chuhuaca nuhuata natá'acana, nomácaloje méqueca nachíra'aca nacaje penaje. Ñaquele rihuátaniya nucá ca'ajnó”, que rimíchaca rijló.

²⁰Apú quemíchari piño rijló: “Huajé huani nuhuá'aquichaco. Ñaquele uncá meño'ojó nu'ujnalá rejo”.

²¹“Uncá nu'ujnalaje”, que huánija nemíchaca rijló piyuque. Raú rijhua'até sápajeri pi'icharo ricoja rihuacára'ajeri ñacaré ejo. Ri'imichá riyucuna rijló, meque nemíchaca rijló yucuna. Raú paminá yúchi'icharo nachá. E rimicha rijhua'até sápajerijlo: “Chuhua quiñaja pi'ijnacá apojó pajimila e'iyohuá. Chi'itaje iñe'epú chuhuá, ujú caje ñani iñe'epú chuhuá hua'até pi'ijnajé. Pihuá'icha majó camu'ují la'acaño, apicháca'alo moto'ocaño, uncá meño'ojó ja'apálaño palá, mejluruna, quele pihuá'aje majó”, que rimíchaca rijló.

²²Raú ri'ijichá piño ajopana huá'aje. Ne'ejichá rijhua'até cajrú. Ejomi rijhua'até sápajeri quemíchari rijló: “Caja nuli'ichá pimíchaca que. Re ejo'ocaja pucunaji ajopánajlo”.

²³Rihuacára'ajeri quemíchari rijló: “Pi'ijná piño ilé iñe'epú chuhuá, to'ocó pajimila yámojo chuhuá. Pimicha ajopana ina'uquejlo, ne'ejnachi majó, namano'otachi nuñacaré.

²⁴Numá pijló, ileruna nuyucupéra'acarena pamineco i'imacá, uncá huani najñálaje na'ajnehuá nujhua'até maare”, que rimíchaca rijhua'até sápajerijlo —marí que Jesús i'imacá yucu najló. Jesucristo hua'atéjena huátacaloje íqui'ica Jesús ajopana chaje penaje yucuna marí:

²⁵E caja Jesús ja'apari ají que a'ajná ño'ojó. Iqui'iruna ina'uqué ja'apaño rijhua'até. E ripajno'ó ají que riyámojo, rimá najló:

²⁶—Huátaño nujhua'atéjena penaje i'imacana, ijló numá: Ihuata nucá íqui'ija ajopana chaje. Ihuata nucá íqui'ija ichi'iná chaje. Ihuata caja nucá íqui'ija iyajalo chaje, iyani quele chaje. Ihuata caja nucá íqui'ija ejena chaje. Ihuata caja nucá íqui'ija icó chaje. Uncaja que ihuata nucá íqui'ija ileruna chaje, uncá meño'ojó i'imalá nujhua'atéjena.

²⁷Apala nenoje ca'ajná nujhua'atéjena. Ihue'epíjica ee inacuhuá, uncá meño'ojó i'imalá nujhua'atéjena. Iná i'ijnatácaloje iná péchuhua palá pamineco méqueca inajlo rijhua'ateje i'imacana, penaje ri'imá najló yucu marí que:

²⁸’Apú huátari ca'ajná pají la'acana. Pamineco ri'ijnatá ripéchuhua, ramácaloje mérejeca rihuemí jácho'ojico rijló. Raú rihue'epí riliñérute iphaca riñapátacana loco'opani ca'ajná, uncá ca'ajná.

²⁹Uncachu ri'ijnatala ripéchuhua palá, rica'á ca'ajná piyuque riliñérute jipa ayúma'acana ra'apí huemí. Rejomi uncá riliñérute i'imalá, riñapátacaloje ricá penaje. Ajopana ina'uqué amájica ee ritára'aco mañapátacanaru, ne'echajica rinacu.

³⁰Nemaje rinacu: “Riqueño'ó pají la'acana, e'iyonaja uncá riliñérute iphala rilocópa'ala”, que nemájica rinacu.

³¹Ñaqué caja apú i'ijnataca ripéchuhua. Ajopana ina'uqué huacára'ajeri i'ijnari rile'ejena surárana hua'até najhua'até nócajo. Veinte mil rile'ejena surárana hua'até ri'ijná. Apú le'ejé diez mil. Caja ne'emá rijló nayucuna: “Chuhua necá huaícha ijhua'até nócajo”. Raú ri'ijnatá ripéchuhua: “¿E huachá'atacajla necá diez mil surárana hua'até ca'ajná, uncá ca'ajná?”

³²Rimá ca'ajná: “Uncá meño'ojó huachá'atalaje necá, íqui'iruna necá”. Marí que ripechu i'imajica ee, palani apú huacára'acana rejo rijhua'até pura'ajó, ya'ajná jo'ó ri'imanoja rile'ejena surárana hua'até. Palani rijhua'até pura'acano, naqueño'ocá piyá pajhua'atéchaca nócacano. Marí que ri'ijnataca ripéchuhua palá.

³³Ñaqué caja ricá piyuque ina'uquejlo, huátaño nujhua'atéjena i'imacana. Pamineco ne'ejnatá palá napéchuhua méqueca nahuátaca la'acana nacú. Uncaja que nahuata piyuque nacaje yurícana, ne'emacáloje nujhua'atéjena penaje, uncá meño'ojó ne'emalá nujhua'atéjena —que Jesús quemacá najló. Yuquira i'imacá a'ajnejijlo que caja Jesucristo ja'apiyá jema'ajeño i'imacá ajopana ina'uquejlo, nala'acachu necá palá. Riyucuna marí:

³⁴‘Yuquira, palani rica'acana a'ajnejí e'iyajé. E'iyonaja rila'acochu uhui'ichí, uncá meño'ojó iná pa'atala rapumí chuhuá ricá, rila'acóloje cajipareni penaje.

³⁵Uncá na penaje calé ricá uhui'ichini. Te'erí e'iyajé rica'acana, uncá paala. Uncá ra'alá te'erí ñaté. Nacaje mujrumi e'iyajé rica'acana, uncá caja paala. Ricupácanaja palani. Jema'á icá que'ejhuiruna —que Jesús quemacá najló.