Read Jukuna Lucas 21 Bible Online

Lucas 21 - Jukuna bible

Lucas 21

¹Jesús i'imari Tupana ñacaré chu. Re ramá cajrú liñeru minana ca'acá liñeru ra'acuná chojé.

²Eyá ramá caja apa'ahuelo ihuacajilomi. Camu'ují la'acayo ru'umacá. Ruca'á iyamata ñánija parata richojé. Huejápaja huani rahuacaco.

³Raú Jesús quemari rahua'á i'imacáñojlo: —Jema'á marí, ilerú inanaru, ihuacajilomi rucá. Camu'ují la'acayo caja rucá. Ilé liñeru huejápaja ruqui'ichaje richojé aú ruchá'achiya ajopana. Raú ruli'ichá palá ajopana chaje.

⁴Ajopana qui'ichaño naliñérute lupemí richojé. Eyá ilerú, camu'ují la'acayo, qui'ichayo piyuque ruliñérute richojé. A'ajnejí huarúhua'ajona penaje ri'imichácajla —que rimacá najló. Jesús quemari najló méqueca nacajya'atájica Tupana ñacaré yucuna marí:

⁵Ra'apiyatéjena naquiyana pura'añó Tupana ñacaré nacú. Nemá rinacu: —Meque palani huani ricá. Meque palá nojé jipa naquiyana la'acanami ricá. Palani caja nacaje pato'oró rinacu, na'acare Tupánajlo —que nemacá rinacu.

⁶E Jesús quemari najló: —Quele Tupana ñacaré amácare me'etení, uncá i'imalaje maare. Aquijñojo ajopana chapú péchuruna cajya'atájeño piyuqueja ricá. Ejomi uncá pajluhuaja ñani jipa yurílajo pachácaca —que rimacá najló. Jesús quemari najló méqueca ri'imajica eja'ahuá chu, yehuicha eja'ahuá capichájico piyá. Riyucuna marí:

⁷Nemá Jesúsjlo: —Huehuíña'atajeri, ¿méquechamica ri'imajica quele pimíchaje nacú huajló? ¿Na aú chi ina'uqué hue'epeje méquechamica riphájica rená chojé? —que nemacá rijló.

⁸Jesús quemari najló: —Jema'aniya ajopana puráca'alo ja'apiyá, napajlájicare aú ijhua'até. Iqui'iruna ina'uqué iphájeño. Na'ajé nuí, neí hua penaje. “Ricá Tupana huacára'acare majó ina'uqué i'imatájeri penaje nucá. Caja noná iphari rená chojé”, que nemájica nanacuhuá apú, apú que. Pa. I'ijnaniya ilé cajena hua'até.

⁹Yucu i'imajé marí que: “Chuhua nenócaco pajhua'atéchaca”. Ajopana nacú nemaje: “Nenócaco pajhua'atéchaca necámica que”. Marí que yucu i'imajica rihuacajé. Pa. Iquero'oniyo raú. Caja queja ri'imajica. Uncá jo'ó eja'ahuá tajnálajo rihuacajé —que rimacá najló.

¹⁰Rimá piño najló: —Ajopana te'eré eruna nócajeño ajopana te'eré eyájena hua'até. Ajopana i'imacana hua'atéjena nócajeño ajopana i'imacana hua'atéjena hua'até.

¹¹A'apona que cajrú te'erí ñaca'ajico apú eyá, apú eyá que rihuacajé. Cajrú caja ina'uqué taca'ajica me'epejí nacú rihuacajé apú eyá, apú eyá que. Cajrú huani natami caje nójica ina'uqué. Je'echú chiyá amaje cajrú nacaje. Ricá quero'ótaje ijló.

¹²Marí que ri'imajica piyá, nala'ajé icá chapú. Napataje icá, najña'ajé icá jahuacáca'alo ñacarelana chojé. Re nemaje inacu: “Pu'uhuaré la'ajeño necá” que. Ejomi naca'ajé icá ina'uqué huajáquelana chojé. Najña'ajé icá i'imacánana ejo. Nachaje huacára'ajeño ejo hua'ató najña'ajé icá, narucátacaloje rijló icá majopeja penaje. Marí que nala'ajica icá chapú, no'opiyá jemaaté, i'ijnatániya ipéchuhua: “¿Marí que chi huapura'ajico huachayo, nahuajaca piyá huecá?”

¹⁵Nucá a'ajeri ijló puráca'aloji. Raú capechú imájica najló, nemacá piyá inacu: “Napajlaca” que.

¹⁶Ñaqué caja ejena naquiyana la'ajica icá chapú. Ichi'iná ca'ajná, ejena naquiyana ca'ajná, e'ehuelona naquiyana ca'ajná, ijhuáque'ena naquiyana ca'ajná a'ajeño icá ajopánajlo, chapú inacu péchurunajlo. Necá nójeño inaquiyana.

¹⁷Piyuqueja ina'uqué huo i'imajica ichá chapú, jema'acale no'opiyá.

¹⁸Uncá na calé ila'ajico.

¹⁹Uncájica ee jácho'o no'opiyá jema'acana chiyá, Tupana i'imatájeri icá capichácajo liyá.

²⁰Pu'uhuacá amájica cajrú surárana itaca pajimila Jerusalén cha, aú ihue'epeje mequetánaja i'imajemi nacajya'ataje pajimila.

²¹Aú Judea te'eré eyájena ñaajeño ipuré e'iyajé. Jerusalén eruna jácho'ojeño reyá. Pu'uteni chu i'imajícaño uncá pa'alájeño piño pajimila ejo. Marí que ila'ajica.

²²Huajácaje queja ri'imajica rihuacajé. Tupana puráca'alo lana'aquéjami quemacá que rinacu, que ri'imajica rihuacajé.

²³Chapú huani ri'imajica canupana inaánajlo rihuacajé. Chapú huani caja ri'imajica inaana cayaniquérunajlo, re caja jo'ó i'iracaño chu'uchú nayani. Cajrú ina'uqué amájica chapú caje yajhué rihuacajé ite'eré ehuá. Cajrú Tupana huajájica mariruna ina'uqué.

²⁴Nenójica ne'iyajena nócacajo e'iyá. Ajopana najña'ajé, naca'acáloje necá ina'uqué huajáquelana chojé penaje. Ina'uqué huajáquelana chu ne'emajé ajopana te'eré nacú, ajopana te'eré nacú que. Ajopana cajya'atájeño pajimila Jerusalén, uncá judíona naquiyana calé necá. Tupana yurica najló ricá quetánaja nala'ajica marí que. Jesús pa'ajico piño majó yucuna marí:

²⁵Jesús quemari piño najló marí que: —Apojó camú, queri, ihuijina caje amajo rihuacajé. Cajrú caja juni jalomi mejé i'imajica; cajruni huani riyocola i'imajica. Raú piyuque eja'ahuá chu i'imajícaño quero'ojeño.

²⁶Cajrú ne'emajica quero'ocajo nacú. Nahue'epeje eja'ahuá i'imacá capichácajo nacú. Jimaje napojlo'ojó. Piyuque nacaje je'echú chu i'imacare ñaca'ajero.

²⁷Marí que ri'imajica ee namájica nucá iphaca majó juni suhuáca'ala e'iyohuá. Ina'uquéjloje penaje i'imacá nucá. Piyuque ina'uqué huacára'ajeri penaje nuphaje majó. Cajrú mejáma'atani i'imajica nohua'ó. Marí caje hua'ató nuphaje.

²⁸Amájica ee nacaje i'imacá numacá que ijló me'etení, ila'á ipéchuhua caphí. Mequetánaja yuréjero ijló. Rejomi Tupana i'imatájeri icá capichácajo liyá —que Jesús quemacá najló.

²⁹Jesús jehuíña'atari necá piño marí que: —Caja ihue'epí a'ahuaná nacojé, a'ahuaná higuera nacojé hua'até.

³⁰Ri'iché pitúca'ari, ripaná moto'ocáloje rinaquiyá penaje. Ri'iché pitúca'aca aú iná hue'epí yehuicha jarechí iphaca rená chojé.

³¹Ñaqué caja ihue'epíjica nupa'ajico majó nacojé. Amájica aú nacaje numíchaje nacú, ihue'epeje yehuicha riphaca rená chojé, Tupana i'imacáloje piyuque ina'uqué huacára'ajeri penaje.

³²’Jema'á marí. Ricá numíchaje nacú ijló i'imajeri re caja ina'uqué i'imanoja.

³³Je'echú, eja'ahuá hua'até tajnájero. E'iyonaja calé uncá nupuráca'alo tajnálajo. Numacá rinacu queja nacaje i'imajica.

³⁴’Pa. I'imaniya cajrú a'ajnehuá ajñacana nacú. I'imaniya caja quehuini caje i'iracana nacú. Ihuó ca'aniyo caja nacaje marí eja'ahuá chu i'imacare hua'até. Apala huajátacajo ri'imajica numíchaje nacú ijló.

³⁵Mahue'epícanaru camejérina ja'acó napatáca'aruna chojé. Ñaqué caja ri'imajica piyuque huani ina'uquejlo, eja'ahuá chu i'imacáñojlo. Huajátacajo nu'umajica nachá.

³⁶I'imá nupé maare. Ipura'ó Tupana hua'até hue'echú ca'alá queja, i'imacóloje chapú caje i'imajícare liyá penaje, itára'acoloje nujimaje rejomi penaje. Ina'uquéjloje penaje i'imacá nucá —que Jesús quemacá najló.

³⁷Hue'echú Jesús jehuíña'ataque necá Tupana ñacaré chu. Lapí ri'ijnaqué yenuri Olivos ejo. Re ri'imaqué lapí.

³⁸Lapiyami ca'alaja cajrú ina'uqué i'ijnajica Tupana ñacaré chojé ripuráca'alo jema'ajé.