Read Jukuna Lucas 8 Bible Online

Lucas 8 - Jukuna bible

Lucas 8

¹E caja apú huacajé piño Jesús ja'apari ají que a'ajná ño'ojó apú pajimila nacojé, apú pajimila nacojé que. Pajimila cajruni nacojé, pajimila camu'ujuni nacojé que ra'apaca Tupana yucuna i'imacana nacú. Tupana i'imatari ina'uqué capichácajo liyá, ne'emacáloje rijhua'atéjena raú penaje. Riyucuna ri'imaqué najló. Ra'apiyatéjena i'ijnaño caja rijhua'até. Iyamá iphata ji'imaji nacojé quele ne'emacá.

²Inaana naquiyana i'ijnaño caja rijhua'até. Rica'acárena ne'iyayá jiñana pechu nanaquiyana i'imacá. Necá i'ijnaño caja rijhua'até. Ñaqué caja ajopana ritejmo'ótacarena i'ijnaño rijhua'até. Quele necá chira'añó rijhua'até. Apa'ahuelo i'imayo María Magdalena. Jesús ca'acáreru e'iyayá iyamá cuhuá'ata quele jiñana pechu i'imacayo ru'umacá.

³Apa'ahuelo i'imayo Juana. Cuza yajalo ru'umacá. Cuza i'imari Herodes hua'até sápajeri. Apa'ahuelo i'imayo Susana. Ajopana i'imaño caja najhua'até. Cha'apá ne'emacá. Necá piyuque a'aqueño Jesús ñaté. Na'aqué rijló, ra'apiyatéjenajlo hua'até a'ajnejí majopeja nale'ejó aú. Nacaje icha ijí ejátajeri yucuna marí:

⁴E caja cajrú ina'uqué jahuacaco Jesús nacojé. Apú pajimila eyá, apú pajimila eyá que nephaca rinacu. Cajrúchami ina'uqué jahuacaco rejé i'imacá. E ri'imá najló yucu, rehuíña'atacaloje necá Tupana nacú raú penaje. Marí riyucuna:

⁵—Pajluhuaja ina'uqué i'ijichari nacaje icha ijí ejátaje. Riqui'ichá richa ijí te'erí lamá'ataqueja jimahua. Rejátacana nacuja ri'ijichá. Richa ijí riqui'ichaje naquiyana ja'acharo iñe'epú chojé. Richuhuá ina'uqué ja'apaño richó. E caja cupira'aphana iphíchaño rajmílo'oje.

⁶Apú richa ijí riqui'ichaje naquiyana ja'acharo jipa nacojé. Huejápaja te'erí i'imichari rinacu. Riphíchaca ejomi rimeríyi'icho, uncale isani te'erí i'imalá jipa nacú.

⁷Apú richa ijí riqui'ichaje naquiyana ja'acharo pu'uhuareni jimichi e'iyajé. Pu'uhuareni jimichi iphíchari nacaje icha ijí rejáchiyaje hua'até. Pu'uhuareni jimichi tahuá'añachari ricá. Raú rihuajri'ichá re'iyajé.

⁸Eyá apú richa ijí naquiyana ja'acharo palani te'erí e'iyajé. Ilé iphíchari palá. Palá ritahuá'ichaco. Palá caja rarúqui'ichaca; que'iyapé rarúqui'ichaca. Re'iyajé arúqui'ichari cien ca'alá. Marí que Jesús i'imacá yucu najló. Ejomi caphí rimacá najló: —Icá que'ejhuirúnajlo numá, a'á inacojó riyucuna. Jesús quemari ne'iyajénajlo nájeca ri'imacá yucu ina'uquejlo. Riyucuna marí:

⁹Caja ri'imá najló yucu. Ejomi ra'apiyatéjena quemaño rijló: —¿Meque quemacánaca chi cari yucu pi'imichaje huajló huajé?

¹⁰Rimá najló: —Me'echuje ina'uquejlo méqueca Tupana la'acá, ina'uqué naquiyana i'imacáloje rijhua'atéjena penaje. E'iyonaja Tupana la'arí ipechu palá, jema'acáloje penaje. Eyá ajopánajlo me'echuje jo'ó ricá. Nu'umá yucu najló, nohuíña'atacaloje necá Tupana nacú raú penaje. E'iyonaja uncá nahue'epila meque quemacánaca ricá riyucuna jema'acana aú. Uncá caja nahue'epila meque quemacánaca nacaje namácare. Jesús jehuíña'ataca necá riyucuna nacú yucuna marí:

¹¹E rimá najló: —Marí que quemacánaca ricá: Richa ijí rica'acare te'erí jimahua rejátacana nacú, Tupana puráca'alo na'apátacare ina'uquejlo que caja ricá.

¹²Richa ijí naquiyana ja'aró iñe'epú chojé. Ñaqué caja riyucuna jema'ajeño naquiyánajlo ricá. Nema'á riyucuna. E'iyonaja Jiñá Chi'ináricana ca'arí napechu naquiyá Tupana puráca'alo nema'acare. Rica'á napechu naquiyá ricá, napechu i'imacá piyá caphí Tupana chojé ne'ematájeri penaje.

¹³Eyá richa ijí naquiyana ja'aró jipa nacojé, huejapa te'erí i'imacare nacojé. Mequetánaja calé rijña'á panacu riphaca ejomi. Ñaqué caja ina'uqué naquiyánajlo ricá. Nema'á Tupana puráca'alo. Pu'ují napechu la'acó raú. Mequetánaja calé napechu i'imacá palá rinacu. Nahuátacale Tupana puráca'alo ja'apiyá i'imacana, ajopana ca'ajná la'añó necá chapú. Napura'ó ca'ajná nanacu pu'uhuaré. Namá ca'ajná chapú caje yajhué. Marí caje aú nayurí naliyó ricá, uncale napechu i'imalá caphí najluhua.

¹⁴Eyá richa ijí naquiyana ja'aró caja pu'uhuareni jimichi e'iyajé. Riphaca ejomi rihuaja'acá re'iyajé. Uncá rarúca'ala. Ñaqué caja ina'uqué naquiyánajlo ricá. Nema'á Tupana puráca'alo. Naqueño'ó ra'apiyá i'imacana. E'iyonaja cajrú na'acá nanacojó nacaje marí eja'ahuá chu i'imacare. Ñó'ope liñeru, le'ejepelaji, caje macá nahuacata najluhua. Ricá nahue'epí natucumó. Marí que péchuruna ne'emacale, uncá na'alá nanacojó Tupana puráca'alo, nala'acáloje palá ra'apiyá i'imacana aú penaje.

¹⁵Eyá richa ijí naquiyana ja'aró palani te'erí e'iyajé. Riphá, ritahuá'o, rarúca'a palá. Ñaqué caja ina'uqué naquiyánajlo ricá. Nema'á Tupana puráca'alo, nahue'epí caja meque quemacánaca ricá, na'á caja nanacojó ricá. Uncá caja naya'aló ra'apiyá i'imacana nacú. Raú calé nala'á palá ra'apiyá i'imacana aú. Iná camaré yucuna marí:

¹⁶Iná lucúna'acachu iná camaré, uncá iná yá'atala ricá i'ichí lájma'ataqueja ja'apejé. Uncá caja iná yá'atala ricá iná camané ja'apejé. Yenú iná yá'ata ricá, pají chojé mujlúca'ajeño amácaloje ricamare chojé penaje.

¹⁷Re Tupana puráca'alo naquiyana me'etení, me'echuje ricá ina'uquejlo. Quéchami nahue'epíjica rinacojé.

¹⁸Ñaquele jema'á palá. Ra'apiyá jema'ajeño pechu rila'ajé palá, nahue'epícaloje richaje, richaje, que rinacojé penaje. Eyá necá, uncá jema'alaño ra'apiyá, naliyá Tupana ña'ajeri ricá huejápaja nahue'epícare nacojé. Napechu i'imá nanacuhuá: “Huahue'epícare ricá” que. E'iyonaja uncá ñaqué calé napechu nacú ricá. Jesús jaló, rijmerémina, quele i'ijnacá Jesús amaje yucuna marí:

¹⁹Pachu Jesús i'imari cajrú ina'uqué hua'até. E Jesús jaló, rijmerémina, quele iphaño rejo. Nahuata rijhua'até pura'acano. Cajrú ina'uqué nacojé uncá meño'ojó nephala rinacu.

²⁰E apú quemari Jesusjlo: —Paló iphíchayo pejena hua'até. Nahuá'icha pimaná, pi'ijnacáloje rejo penaje.

²¹E Jesús quemari najló: —Re ina'uqué, nema'á nupuráca'alo. Nala'á caja numacá que. Necá calé nojena que, noló que. Jesús quemari carenajlo, ra'apaca piyá yucuna marí:

²²Muní que Jesús huitúca'aca jita chojé ra'apiyatéjena hua'até. Rimá najló: —I'ijná huacuhuá'achi caesa pa'anajo pitá. Aú nacuhuá'a.

²³Nacuhuá'aca nacú Jesús camátaro. Ejéchami mana'í chiyó carená i'imacá nachá caphí huani. Carená yocola amo'oró jita chojé cajrú juni. Ujú caje chiyó na'acojla junápeje raú.

²⁴Yehuíchami na'acó junápeje napótaca Jesús, nemá rijló: —Huehuíña'atajeri, chuhuaca huejaca. Raú Jesús jácho'oro. Raca'á carená, juni hua'até. Raú carená mata'aró, juni piya hua'até. Uncá huani riyoco'oló rejomi.

²⁵E rimá ra'apiyatéjenajlo: —¿Naje chi uncá ipechu i'imalá caphí nochojé? Quero'ocajo nacú ne'emá. Napechu i'imá: “¡Meque piyuque huani rihue'epica!” Nemá pajlocaca: —Ripuráca'alo aú carená, juni hua'até jema'arí ra'apiyá. Jesús ca'acá apú e'iyayá jiñana pechu yucuna marí:

²⁶E caja nephá pa'anajo pitá, Gerasa te'eré ejo. Galilea te'eré loco'opani ricá.

²⁷Narúca'o. E Jesús jácho'oro jita chiyá. E apú ina'uqué iphari rinacu. Pajimila eyaje ri'imacá. Caja júpicha Jiñana pechu i'imacare re'iyá ri'imacá. Aú richira'acó ma'arumacaru i'imajica. Uncá caja ri'imaqué pají chu. Támijimina ca'aquelana ehuaja ri'imaqué.

²⁸Ricá iphari Jesús nacú. Ramaca aú Jesús, rijláma'o ri'imá nacojé. Caphí rimacá rijló: —¿Naje picahuíla'a nunacu? Tupana, je'echú churí i'irí picá. Jesús picá. Pijló numá, pila'aniya nucá chapú huani me'etení.

²⁹Marí que rimacá Jesusjlo i'imacá, Jesús quemacale jiñá péchujlo, ra'apácaloje re'iyayá penaje. Pulapé jiñá pechu patajica ilé ina'uqué. Yurí huani ri'imajica raú. Ñaquele na'á ajopana ramájeri penaje i'imacá. Nepo'otá ricá curete aú riyáte'ela naquiyá, ri'imá naquiyá hua'até. E'iyonaja rimata'atá curete. Ejomi jiñá pechu huá'ari ricá ají que pu'uteni meñaru chojé. Re Jesús iphátari ri'imacá.

³⁰E Jesús quemari rijló: —¿Na pií? —Nuí íqui'iruna. Marí que rimacá rijló, íqui'iruna jiñana pechu i'imacale re'iyá.

³¹Jiñana pechu quemaño Jesusjlo: —Pihuacára'aniya huecá ulahuí uncá tajáca'alo i'imalá chojé.

³²A'ajnare que cajrú je'eruna piracana chira'añó yenuri nacuhuá na'ajnehuá culacana nacú. Mahuó jiñana pechu la'acá ricá. Nemá rijló: —A'ajnáruna je'eruna e'iyajé pihuacára'a huecá. —Je —que Jesús quemacá najló.

³³Raú jiñana pechu jácho'oño re'iyayá je'eruna piracana e'iyajé. Jiñana ja'acó aú ne'iyajé je'eruna jecho'oñó ají que a'ajná ño'ojó. Yenuri ji'ihuátaya na'ó ají que caesa acojé. Rejeja nacapichó piyuqueja junápeje.

³⁴Nalamára'ajeño penájenami amaca aú nacapichaco neñaó reyá. Ne'emá riyucuna rehuá i'imacáñojlo, pajimila erúnajlo hua'até.

³⁵Raú ne'ejná ramaje, iphaño Jesús nacú. Amaño ilé ina'uqué, jiñana pechu i'imacare e'iyá penájemi. Re riyá'o Jesús ji'ilá. Ca'arumacani ri'imacá. Palá caja ripechu i'imacá. Marí que namaca aú ricá naquero'ó.

³⁶Re i'imacaño amaño maapami que Jesús ca'acá jiñana pechu re'iyayá. Necá penájena i'imaño huajé iphácañojlo riyucuna.

³⁷Piyuqueja Gerasa te'eré ehuájena quero'oñó Jesús piyá cajrú, aú nemá rijló: —Pácho'o huate'eré naquiyá. —Je —que rimacá. E Jesús huitúca'ari piño jita chojé, ripa'acóloje penaje.

³⁸Ejéchami, rica'acare e'iyayá jiñana pechu penájemi, huátaca mahuó Jesús hua'até i'ijnacana. E'iyonaja Jesús quemari rijló:

³⁹—Pipa'ó piñacajela ejo, pi'imacáloje méqueca Tupana la'acá palá picá yucuna najló rehuá penaje. —Je —que rimacá. E ripa'ó. Ri'ijná piyuque pajimila nacuhuá riyucuna i'imacana nacú najló. Jesús macápo'oca Jairo itu yucuna. Quecha apa'ahuelo tejmo'otaco Jesús a'arumacá nacú sápacana aú yucuna marí:

⁴⁰E caja Jesús iphari piño rapumí chuhuá caesa pa'anajo pitá. Pu'ují napechu i'imacá namaca aú ricá. Re ne'emá rihuátacana nacú.

⁴¹E caja apú iphari rinacu. Jairo rií i'imacá. Nahuacáca'alo ñacarelana chiyá huacára'ajeri ri'imacá. Riphá Jesús nacú. E rijláma'o Jesús ji'imá nacojé, rimá rijló: —Pila'á nojló nacaje. Pi'ijná nuñacaré ejo, pitejmo'óchiyachi nutu nojló.

⁴²Aquíchajeru huani rucá. Uncá apa'ahuelo i'imalá, rucaja calé pajluhuájaru nutu. Iyamá iphata ji'imaji nacojé quele jarechicha rucá —que rimacá rijló. Aú Jesús i'ijnari rijhua'até. Cajrú ajopana i'ijnaño caja rijhua'até. Cajrú netaca Jesús cha.

⁴³Najhua'até caja apa'ahuelo ja'apayo, rutami caja ru'umacá. Jirá ja'apáqueri runaquiyá. Caja iyamá iphata ji'imaji nacojé quele jarechí quetana ru'umacá rijhua'até. Ruca'aqué piyuque ruliñérute rupusána'acana huemí. E'iyonaja ñaqueja hua'ateja ru'umaqué.

⁴⁴Ro'opá najhua'até. E ru'ujná ají que ina'uqué ihuami chiyá Jesús loco'opani. Rutejmo'ocóloje penaje, rusapa ra'arumacá ji'imá nacú. Rejeja jirá ja'apácare runaquiyá mata'aró.

⁴⁵E Jesús quemari najló: —¿Na sápichari nunacu? —Uncá nucá calé —queja nemacá piyuqueja. Eyá Pedro quemari rijló: —Huehuíña'atajeri, cajrú ina'uqué ichíyaca pichá. Eta pimá: “¿Na sápichari nunacu?” que.

⁴⁶Jesús quemari najló: —Nápajaca sápichayo nunacu. Nuhue'epí nutejmo'óchiyaca pajluhuájaru inanaru nupechu aú.

⁴⁷Sápayo rinacu pechu i'imá: “Caja rihue'epicha méqueca nucá.” Cajrú rucurúcaca hua'até ru'ujná rijimajo. Rutára'o ru'urúpachi aú rijimaje. Re piyuque i'imacaño ahua'á ru'umá riyucuna rijló nájeca rusápaca ra'arumacá nacú. Rumá caja najló méqueca rutejmo'otaco raú.

⁴⁸E Jesús quemari rojló: —Caja pitejmo'ochiyo, pipechu i'imacale caphí nochojé. Pipechu i'imichá nunacu: “Ricá tejmo'ótajeri nucá” que. Aú calé pitejmo'ochiyo. Chuhua pi'ijná ca'ajnó, pipechu i'imá palá.

⁴⁹Marí que rimacá rojló ee apú iphari nanacu. Jairo ñacaré chiyaje ri'imacá. Rimá Jáirojlo: —Caja pitu taqui'ichayo. Caja rupechu capiícharo. Uncá na penaje calé picahuíla'a Huehuíña'atajeri nacú ruchaya.

⁵⁰Jesús jema'arí méqueca rimacá rijló. Aú rimá Jáirojlo: —Pihuó ca'aniyo, pila'á pipéchuhua caphí nochojé. Pitu i'imajeyo.

⁵¹E na'apá piño, iphaño riñacaré ejo, amaño cajrú nahuinano la'ajeño i'imacá re. Cajrú nala'acá nahuinano rucá. E Jesús quemari najló: —Iyániya rujhua'até. Uncá rutaca'alacha, rucamáchiyacoja calé. Raú ne'echá rinacu, nahue'epícale caja rutaca'acá i'imacá. E rimujlúca'a támijimi i'imacare ucapú chojé. Uncá riyurila ajopana mujlúca'aca rijhua'até. Pedro, Santiago, Juan, rora'apami, rolomi, quele ja calé riyurí mujlúca'aca rijhua'até.

⁵³

⁵⁴E Jesús iphari támijimi ahua'ajé, patarí rucá ruyáte'ela naquiyá. Caphí rimacá támijimijlo: —Yuhualó, pácho'o.

⁵⁵Raú ja rócho'o. E Jesús quemari ajopánajlo: —A'á rojló a'ajnejí, rojñachi.

⁵⁶Ruchi'iná pechu i'imá: “¡Meque piyuque huani la'acá ricá!” E rimá najló: —Pa. I'imaniya riyucuna ajopánajlo.