Read Jukuna Hechos 25 Bible Online

Hechos 25 - Jukuna bible

Hechos 25

¹E caja Festo iphari. Caja na'á ri'imacá ne'emacana penaje. Hueji que cala i'imajemi rácho'o piño pajimila Cesarea eyá, i'ijnari ají que Jerusalén ejo.

²Re sacerdótena huacára'ajeño, ajopana judíona huacára'ajeño, quele arucátaño rijló Pablo, rihuajácaloje ricá penaje.

³Nemá rijló: —Pila'á huajló nacaje. Eco pihuacára'a Pablo ña'acana majó, Jerusalén ejo, hualamá'atachi puráca'aloji rijhua'até maare —que nemacá rijló. Marí que napechu nacú i'imacá: “Rihuá'acana majó nacú iñe'epú chu huenoje ricá.”

⁴E'iyonaja Festo quemari najló: —Ilé Pablo imá nacú, rejo'ocaja ricá ina'uqué huajáquelana chu Cesarea e. Meque cala i'imajemi nupa'ajó piño rejo.

⁵Ihuacára'ajeño huátajica ee nujhua'até i'ijnacana, palani. Reco ne'emajé nojló pu'uhuaré rila'acare yucuna —que rimacá najló. —Je —que nemacá rijló.

⁶Festo i'imari Jerusalén e hueji que cuhuá'ata que cálaja ca'ajná, iyamá té'ela que cálaja ca'ajná ri'imacá re. Ejomi ripa'ó piño rapumí chuhuá Cesarea ejo. Muní que riyá'o, rema'acáloje meque napura'acó panacuhuácaca penaje. Rilamá'atacaloje najló puráca'aloji penaje. E rihuá'a Pablo maná.

⁷Aú Pablo iphari rejé nanacu. Ejéchami judíona, Jerusalén eyájena, jahuacaco rinacojé. Rejé cajrú narucátaca rijló ricá. E'iyonaja uncá iná hue'epila raú méqueca nemacá, quehuaca ca'ajná, uncá ca'ajná.

⁸E Pablo pura'aró richayo, rimá najló: —Uncá na calé nula'á pu'uhuaré. Nula'á judíona puráca'alo lana'aquéjami quemacá que. Noma'á caja Romano le'ejé huacára'ajeri huani ja'apiyá. Uncá caja nopichátala Tupana ñacaré ajopana ina'uqué huá'acana aú richojé —que rimacá najló.

⁹Festo huátari judíona pechu i'imacá palá rinacu. Aú rimá Páblojlo: —¿E pihuátaca Jerusalén ejo i'ijnacana, nulamá'atacaloje ijló rejo puráca'aloji penaje?

¹⁰E'iyonaja Pablo quemari rijló: —Maare nutára'o pijimaje. Roma le'ejé huacára'ajeri picá. Maare palani, pema'acáloje nuyucuna penaje. Caja pihue'epí palá uncá nula'alá chapú judíona.

¹¹Nula'aquela nacaje nenócare chona iná, nenojla nucá. Uncá numejñátalajla nocoja naliyá. E'iyonaja uncá quehuaca calé ricá nemacare nunacu. Ñaquele uncá Jerusalén ejo nuhuacára'acana i'imalaje. Nuhuata huahuacára'ajeri huani, Cesar, hua'até pura'acano, rilamá'atacaloje huajló ricá penaje —que Pablo quemacá rijló.

¹²Raú Festo pura'aró ra'apiyatéjena hua'até pamineco. Ejomi rimá Páblojlo: —Caja pihuata Cesar ejo i'ijnacana. Caja queja ri'imajica pijló chuhua. Rejo pi'ijnajé. Pablo tára'aco ne'emacana Agripa jimaje yucuna marí:

¹³E caja meque cala i'imajemi apú ne'emacana iphari Cesarea ejo riyajalo hua'até. Rií i'imari Agripa. Riyajalo ií i'imari Berenice. Necá i'ijnaño Festo ajalácaje.

¹⁴Re ne'emá mequetánaja. E Festo i'imari Pablo yucuna rijló, rimá rijló: —Re pajluhuaja ina'uqué maare, ina'uqué huajáquelana chu, Félis yurícare richu.

¹⁵Nu'umacá Jerusalén e huacajé, Sacerdótena huacára'ajeño, peñahuilana, quele quemaño nojló, nuhuacára'acaloje rinócana penaje.

¹⁶Aú numá najló: “Uncá nayurila huajló, huala'acáloje ilé que penaje. Uncá majopeja calé huecá romano naquiyana huajaca ina'uqué. Pamineco huahuata ritára'aco huajimaje, ricá nemacare nacú: “Uncá ina'uquélari” que. Rarucátajeño hua'até huahuata ritára'aco huajimaje. Ejomi ricá nemacare nacú: “Uncá ina'uquélari” que pura'aró richayo, huahuajaca piyá ricá majopeja”, que numacá najló i'imacá.

¹⁷’Necá penájenami iphaño nunacu maáreje. Ejomi muní que huahuacó piño rilamá'ataje. E nuhuá'a Pablo maná.

¹⁸Nupechu i'imá rinacu: “¿Uncá huani ina'uquélari chi ricá nemá nacú?” E'iyonaja uncá ñaquéjaca calé ricá. Majopeja huani napura'acó rinacu.

¹⁹Nemá rinacu: “Uncá rila'alá huachi'inami chuna puráca'alomi quemacá que”. Jesús nacú napura'ó caja. Nemá rinacu: “Caja ritaca'á”. Eyá Pablo quemari rinacu: “Uncá” que. “Ejo'ocaja ricá”. Marí que napura'acó rinacu.

²⁰Aú calé uncá nuhue'epila meque quemacánaca rinacu. Ñaquele numá Páblojlo: “¿E pihuátaca Jerusalén ejo i'ijnacana, nulamá'atacaloje ijló ricá rejo penaje?”

²¹Aú rimá nojló: “Uncá nuhuátala rejo i'ijnacana. Nuhuata Cesar hua'até pura'acano rinacu”. Aú nuhuacára'a riyurícana re caja jo'ó ina'uqué huajáquelana chu. Apú i'ijnajica hua'até nuhuacára'aje ricá rejo —que Festo quemacá Agrípajlo.

²²Raú Agripa quemari Féstojlo: —Nucá caja huátari ripura'acó richayo jema'acana. —Je, muní pema'ajica ripura'acó —que rimacá rijló.

²³E caja muní que piño Agripa, Berenice, quele mujlúca'año ucapú chojé. Palá nojé huani na'arumacá hua'até namujlúca'a richojé. Ne'emacánaja calé a'acare nanacuhuá, ricá i'imari nanacu. Surárana huacára'ajeño, ajopana pajimila eruna chaje i'imacaño, hua'até nephá rejé. E Festo huá'ari Pablo maná rejé.

²⁴Raú riphá nanacu. E Festo quemari najló: —Hue'emacana Agripa, piyuque icá jahuaquíchaño maare huajhua'até, chuhua numájica ijló pura'acajo nacú: Re pajluhuaja ina'uqué huajhua'até maare. Jerusalén e nu'umaqué huacajé, judíona naquiyana arucátaño nojló ricá. Nemá nojló: “Pu'uhuaré la'ajeri huani ricá”. Apú huacajé piño nanaquiyana i'ijnaño majó, Cesarea ejo. Ñaqué caja nemacá piño nojló rinacu. Nahuata nuhuacára'aca rinócana.

²⁵E'iyonaja calé uncá paala nojló ilé que rila'acana. Uncá na calé rila'á pu'uhuaré i'imacá, nenócaloje ricá penaje. Rimá nojló i'imacá, nuhuacára'acaloje ricá huachaje huani huacára'ajeri ejo, rema'acáloje ripuráca'alo penaje. Aú calé nuhuata rihuacára'acana rejo.

²⁶E'iyonaja uncá nuhue'epila na aú ca rila'á pu'uhuaré i'imacá, nulana'acáloje riyucuna papera chojé huachaje huani huacára'ajerijlo penaje. Ricá penaje nuhuá'icha rimaná, ritára'acoloje ijimaje maare penaje. Hue'emacana, Agripa, pijimaje ritára'ajo pamineco, piquejá'acaloje riliyá riyucuna penaje. Ejomi ca'ajná nuhue'epeje méqueca nulana'ajica Césarjlo rinacojé.

²⁷Uncá huani paala nojló rihuacára'acana rejo, uncaja que rinacu quemacana i'imá na aú ca rila'á pu'uhuaré.