Read Jukuna 1 Corintios 5 Bible Online

1 Corintios 5 - Jukuna bible

1 Corintios 5

¹Marí que yucu iphaca majó. Pajluhuaja nanaquiyana re i'imacare, ricá jehuíña'atari rijlápuhua rito'ojneru i'imacá. Chapuni huani ilé que la'acana. Necá, uncá jema'alaño Tupana ja'apiyá, uncá la'alaño ilé que huani.

²Ilé que rila'acá. E'iyonaja calé ila'á inacuhuá chá'atajeño que huani. Palani ila'ájla ipéchuhua camu'ují, inaquiyana la'acale rimanaicho. Riqueño'ocá rimanaicho la'acana rujhua'até huacajé, palani ri'imacajla ijló, ica'aquela e'iyayó ri'imacá.

³Uncá ijhua'até calé nucá me'etení. E'iyonaja nupechu aú ja calé nu'umá ijhua'até. Jesucristo pechu aú nuhue'epí méqueca rila'acana, la'arí rimanaicho. Ilere japi nucá ijhua'até, queja numacá ijló rinacu me'etení.

⁴Jahuacájico ee pajhua'atéchaca rilamá'ataje, Hue'emacana Jesucristo a'ajeri ijló hue'epícaje, ihue'epícaloje méqueca ila'ajica ricá raú penaje. Nucá caja i'imajeri ijhua'até nupechu aú.

⁵Marí que ila'ajica: Ilé ina'uqué numácare nacú ijló, icá a'ajeño Jiñá Chi'ináricanajlo ricá, rapichátacaloje rinapona penaje. Marí que ila'ajica ricá. Raú ripechu i'imajó capichácajo liyá Jesucristo iphájica majó huacajé.

⁶Ila'aniya icó chá'atajeño que huani, marí que ri'imacale rehuá. Icá hue'epiño méqueca nemacá rehuá pan amúra'atajona nacú: “Huejápaja pan amúra'atajona amúra'atari pan piyuqueja.” Ñaqué caja ina'uquejlo ricá. Mequeleja ina'uqué la'añó ca'ajná pu'uhuaré. Necá amátaño ajopana. Raú cajrú ina'uqué la'añó pu'uhuaré.

⁷Ñaquele ica'á e'iyayó quele rimanaicho la'ajeri, la'acá pu'uhuaré e'iyohuá. Ica'á ilé cajena e'iyayó. Marí que la'acana aú icá i'imajeño pajluhuaja chuhuá queja palá la'ajeño. Nuhue'epí caja queja palá la'acaño icá. Hue'emacáloje palá péchuruna penaje, Jesucristo taca'arí huachaya i'imacá. Ra'á ricó ina'uquejlo, nenócaloje ricá pu'uhuaré la'acaño chaya penaje. Marí aú rica'á pu'uhuaré ina'uqué la'acare nanaquiyá.

⁸Ñaquele chuhua Jesucristo ja'apiyá i'imacana nacuja hue'emajé. Palá la'acana nacuja hue'emajé. Quehuácaje puráca'aloji chuhuaja hue'ejnataje huecó. Uncá hue'emalaje huamanaicho la'acana nacú, pu'uhuaré la'acana nacú hua'até. Jupichumi huapechu aú calé huala'á ilé que i'imacá.

⁹Nuhuacára'a papera ijló i'imacá. Richu numá ijló, ila'acáloje natejena penaje, la'añó namanaicho. Necaja calé, Jesucristo ja'apiyá jema'ajeño, numá nacú ijló.

¹⁰Uncá numalá ijló ñaqué ajopana ina'uqué nacú, ila'acáloje natejena penaje. Uncá jema'alaño Tupana ja'apiyá necá, numá nacú. Necá jo'ó, queleruna, la'añó namanaicho. Canacújne'equena caja necá. Piro'oquéjena caja necá. Pu'ují napechu nacaje jenami nacú, napechu i'imacale rinacu: “Huachi'ináricana jenami japi ricá” que. Marí que i'imacaño necá. Uncá numalá ijló ilé cajena nacú, ila'acáloje natejena penaje. Uncá meño'ojó iná la'alá natejena. Iná jácho'oquelo eja'ahuá naquiyá, e ca'ajná iná la'ájla natejena.

¹¹Apú ca'ajná quemari rinacuhuá: “Jesucristo ja'apiyá jema'ajeri nucá” que. E'iyonaja rimanaicho la'acana nacú ca'ajná ricá, canacújne'eque ca'ajná ricá. Pu'ují ca'ajná ripechu nacaje jenami nacú, nemacare nacú: “Huachi'ináricana jenami ricá” que. Richapújra'o ca'ajná. Yuhuéra'acajo nacú ca'ajná ricá. Ata'acachi ca'ajná ricá. Cayucújne'eque ca'ajná ricá. Marí que i'imacá ricá. E'iyonaja rimá rinacuhuá: “Jesucristo ja'apiyá jema'ajeri nucá.” Marí que i'imajícaño necá, tejena ila'ajé. Ilé cajena numá nacú ijló, ila'acáloje natejena penaje. Jara'aniyo caja nanacu ta. Ajñániya caja a'ajnehuá ilé que i'imacaño hua'até.

¹²Uncá numalaje ina'uqué nacú meque nala'acana pu'uhuaré nala'acare chona, uncachu ne'emalá Jesucristo ja'apiyá jema'ajeño. Tupana quemájeri nanacu méqueca nala'acana. Eyá Jesucristo hua'atéjena nacú ijhua'até i'imacaño re, nacú imaje na aú ca nala'acá pu'uhuaré, ihuajácaloje necá richona penaje. Ñaquele ica'á pu'uhuaré la'acaño inaquiyana e'iyayó, Tupana puráca'alo lana'aquéjami quemacá queja.