Read Jukuna 1 Juan 1 Bible Online

1 Juan 1 - Jukuna bible

1 Juan 1

¹Jesucristo yucuna hualana'á ijló papera chojé. Uncá chiyó eja'ahuá i'imá, Jesucristo i'imari. Ri'imacá marí eja'ahuá chu huacajé, huecá amaño ricá huejlú aú. Huema'á caja ri'imacá huajló yucu. Huasapa caja rinacu huayáte'ela aú i'imacá. Ricá penaje a'arí inajlo cajmuchaji, iná i'imacáloje matajnaco je'echú chu raú penaje.

²Pu'uhuacá ri'imacá huajló, aú huamá ricá. Aú calé hue'emá riyucuna ajopánajlo. Uncá tajnácajo penaje calé ricá huemá nacú. Ri'imá Tupana hua'até i'imacá. Eyá pu'uhuacá ri'imacá marí eja'ahuá chu.

³Ricá, huamácare yucuna, hue'emá ijló. Hua'até ripuráca'alo rimacare nacú huajló hua'apata caja ijló, ipechu i'imacáloje huapechu que caja raú penaje. Tupana pechu chuhuá huapechu; Ri'irí Jesucristo pechu chuhuá caja huapechu. Ñaqué caja ipechu i'imacáloje penaje, hue'emá riyucuna ijló.

⁴Riyucuna hualana'á ijló papera chojé, ipechu i'imacáloje pu'ují raú penaje. Palá la'acá Tupana yucuna marí:

⁵Tupana yucuna, Jesucristo i'imacare huajló i'imacá yucuna, hua'apata piño ijló. Ricá quemari Tupana nacú: “Palá huani la'acá ricá. Uncá huani rila'alá pu'uhuaré. Uncá huani rihue'epila pu'uhuaré la'acana.”

⁶Apala huemá huanacuhuá: “Tupana Pechu chuhuá huapechu.” E'iyonaja huamanaicho la'acana nacú ca'ajná huecá. Pu'uhuaré la'acana nacú jo'ó ca'ajná huecá. Marí cajena hue'emacachu, majopeja huapajlaca huanacuhuá. Pu'uhuaré huala'acare aú iná hue'epí majopeja huapajlaca.

⁷Palá la'acá Tupana. Palá la'acana aú huala'á rila'acá que caja. Panacojéchaca que huapechu raú. Jesucristo, Tupana I'irí, taca'arí a'ahuaná apiyácacanami nacú huachaya i'imacá. Rihuacajé rira aco'oró itapuhua aphumi chiyá i'imacá. Marí caje aú rica'á huanaquiyá piyuqueja pu'uhuaré huala'acare, huamanaicho huala'acare hua'até.

⁸Apala huemá huanacuhuá marí que huecá: “Uncá huala'alá pu'uhuaré. Uncá caja huala'alá huamanaicho.” Marí que huemacá ca'ajná, huapechu i'imacale huanacuhuá: “Quehuaca ricá huemacare huanacuhuá.” E'iyonaja uncá quehuaca calé ricá. Uncá quehuácaje puráca'aloji ja'apiyá calé huecá, marí que huapechu i'imacachu. Tupana quemari piyuqueja ina'uqué nacu: “Pu'uhuaré la'ajeño necá, namanaicho la'ajeño necá.”

⁹Huapechu i'imajica ee: “Quehuaca pu'uhuaré la'ajeño huecá Tupana quemacá que”, e rihue'epeje huamu'ují. Hue'emajica ee piyuque pu'uhuaré huala'acare yucuna Tupánajlo, rila'ajé huanacu palá rimacá que. Ramajo huachaje pu'uhuaré huala'acare liyá. Rica'ajé huanaquiyá piyuqueja pu'uhuaré huala'acare, huamanaicho huala'acare hua'ató. Palá Tupana la'acá iná nacú raú.

¹⁰Huemá ca'ajná huanacuhuá: “Uncá huala'alá pu'uhuaré.” Marí que quemacana aú huala'á Tupana pajlácachi que huajluhua, uncale huema'alá ripuráca'alo ja'apiyá. Ripuráca'alo quemari piyuqueja ina'uqué nacú: “Pu'uhuaré la'ajeño necá, namanaicho la'ajeño necá.”