Read KITAABKA QUDUUSKA AH BAROORASHADII YEREMYAAH 3 Bible Online

BAROORASHADII YEREMYAAH 3 - KITAABKA QUDUUSKA AH bible

BAROORASHADII YEREMYAAH 3

¹Anigu waxaan ahay ninkii arkay dhibaatadii ay ushii cadhadiisu keentay.

²Wuu i hoggaamiyey oo igu dhex socodsiiyey gudcur aan iftiin lahayn.

³Sida xaqiiqada ah maalintii oo dhan ayuu mar kasta gacantiisa igu sii jeediyaa.

⁴Jiidhkaygii iyo haraggaygiiba wuu gaboojiyey, lafahaygiina wuu jejebiyey.

⁵Wax buu igu wareejiyey, oo wuxuu igu hareereeyey qadhaadh iyo dhib.

⁶Wuxuu iga dhigay inaan meelo gudcur ah dego sidii kuwii waagii hore dhintay.

⁷Derbi buu igu wareejiyey si aanan u bixi karin, silsiladdaydiina mid culus buu ka dhigay.

⁸Oo weliba markaan dhawaaqo oo aan caawimaad u qayshadona baryadayda wuu diidaa.

⁹Jidadkaygii wuxuu ku awday dhagaxyo la qoray, oo wadiiqooyinkaygiina wuu qalloociyey.

¹⁰Wuxuu igu noqday sidii orso ii gabbanaysa iyo sidii libaax meelo qarsoon iigu dhuumanaya.

¹¹Jidadkaygii wuu iga leexiyey, oo cad cad buu ii kala jaray, cidla buuna iga dhigay.

¹²Qaansadiisii wuu xootay, oo wuxuu iga dhigay goolibaadhkii fallaadha.

¹³Isagu wuxuu ka dhigay fallaadhihii gabooyihiisu inay kelyahayga galaan.

¹⁴Waxaan dadkaygii oo dhan u noqday wax la quudhsado, oo maalintii oo dhanna gabaygooda way igu halqabsadaan.

¹⁵Wuxuu iga buuxiyey qadhaadh, dacar buuna igu dhergiyey.

¹⁶Ilkahaygii dhagaxyo quruurux ah ayuu ku jejebiyey, oo dambas buu igu daboolay.

¹⁷Naftaydii nabad waad ka fogaysay, oo barwaaqo iyo wanaag waan illoobay.

¹⁸Waxaan is-idhi, Xooggaygii iyo rajadaydiiba xagga Rabbiga way ka baabbe'een.

¹⁹Xusuuso dhibkaygii iyo wareeggaygii, iyo dacartii iyo xammeetidii.

²⁰Naftaydu iyagay weli soo xusuusataa, oo ceeb bay la foororsatay.

²¹Tan uun baan garwaaqsan ahay, sidaas daraaddeed rajaan leeyahay.

²²Rabbiga naxariistiisa aawadeed ayaan laynoo baabbi'in, maxaa yeelay, raxmaddiisu ma dhammaato.

²³Subax walba way cusub yihiin, daacadnimadaaduna way weyn tahay.

²⁴Naftaydu waxay tidhaahdaa, Rabbigu waa qaybtaydii, sidaas daraaddeed isagaan rajo ku qabi doonaa.

²⁵Rabbigu waa u roon yahay kuwa isaga rajo ku suga iyo naftii isaga doondoontaba.

²⁶Waxaa wanaagsan in badbaadinta Rabbiga rajo iyo aamusnaan lagu sugo.

²⁷Waxaa wanaagsan in nin harqoodka qaato intuu dhallinyar yahay.

²⁸Keligiis ha fadhiisto isagoo aamusan, maxaa yeelay, isagaa kor saaray.

²⁹Afkiisa ciidda ha daro, waxaa suurtowda inay rajo jirto.

³⁰Dhabankiisa ha u dhiibo mid dharbaaxa, oo cay ha ka dhergo.

³¹Waayo, Sayidku ilaa weligiis ma uu sii tuuri doono.

³²Maxaa yeelay, inkastoo uu murugeeyo, haddana weli wuu ugu nixi doonaa naxariistiisa badnaanteeda aawadeed.

³³Waayo, isagu binu-aadmiga kas uma dhibo, umana murugeeyo.

³⁴In maxaabiista dunida oo dhan cagaha hoostooda lagu burburiyo,

³⁵Iyo in dadka xaqiisa laga leexiyo Ilaaha sare hortiisa,

³⁶Iyo in nin gartiisa laga qalloociyo, Sayidku raalli kama aha.

³⁷Waa kee kan wax odhanaya oo ay noqdaan, Sayidkoo aan amrin?

³⁸Kan ugu sarreeya afkiisa sow kama soo baxaan belaayo iyo wanaagba?

³⁹Bal maxaa nin noolu u cabtaa, maxaase nin ciqaabta dembigiisa uga cabtaa?

⁴⁰Jidadkeenna aynu baadhno, oo aynu tijaabinno, oo aynu mar kale Rabbiga u soo noqonno.

⁴¹Qalbigeenna iyo gacmaheenna aynu kor ugu taagno Ilaaha samooyinka ku jira.

⁴²Annagu waannu xadgudubnay oo waannu caasiyownay, oo adiguna nama aad saamixin.

⁴³Cadho baad isku dabooshay, waanad na eryatay, waad na dishay, oo noomana aadan tudhin.

⁴⁴Daruur baad isku dabooshay si aan baryona kuugu soo gudbin.

⁴⁵Waxaad dadyowga dhexdooda naga dhigtay uskag iyo wax la nacay.

⁴⁶Cadaawayaashayadii oo dhammu afkay nagu kala qaadeen.

⁴⁷Waxaa noo yimid cabsi iyo yaamays, iyo halligaad iyo baabbi'in.

⁴⁸Indhahayga waxaa ka daata durdurro ilmo ah, waana baabbi'inta dadkayga aawadeed.

⁴⁹Indhahaygu had iyo goorba way qubtaan oo innaba ma joogsadaan

⁵⁰Ilamaa Rabbigu hoos soo fiiriyo, oo uu samada ka soo eego.

⁵¹Indhahaygu way ii murugeeyaan gabdhaha magaaladayda oo dhan daraaddood.

⁵²Kuwii cadaawayaashayda sababla'aan u ahaa ayaa i ugaadhsaday sida shimbir loo ugaadhsado oo kale.

⁵³Waxay bohol iigu rideen si ay naftayda iiga qaadaan, oo dhagax bay igu soo kor tuureen.

⁵⁴Madaxaygii biyaa ku kor daatay, oo waxaan is-idhi, Waad go'day.

⁵⁵Rabbiyow, anigoo godka ugu dheer ku dhex jira ayaan magacaaga ku baryootamay.

⁵⁶Codkaygii waad maqashay, bal dhegtaada ha ka xidhin neefsashadayda iyo baryadayda.

⁵⁷Maalintii aan ku baryay ayaad ii soo dhowaatay, oo waxaad igu tidhi, Ha cabsan.

⁵⁸Sayidow, naftayda dacwooyinkeeda waad ii qaadday, waadna i madaxfuratay.

⁵⁹Rabbiyow, gardarradii laygu hayay waad aragtay ee ii garsoor.

⁶⁰Aarsashadoodii oo dhan iyo wixii ay iigu fikireen oo dhanba waad wada aragtay.

⁶¹Rabbiyow, waad maqashay caydoodii oo dhan iyo wixii ay iigu fikireen oo dhan,

⁶²Iyo wixii kuwa igu kacay bushimahoodii lahaayeen, iyo wixii ay maalintii oo dhan ii qastiyeenba.

⁶³Bal eeg, markay fadhiyaan iyo markay taagan yihiinba waxaan ahay waxay ka gabyaan.

⁶⁴Rabbiyow, waxaad iyaga siin doontaa abaalgud waafaqsan shuqullada gacmahooda.

⁶⁵Indhala'aanta qalbiga waad siin doontaa, inkaartaadana korkooda waad ka yeeli doontaa.

⁶⁶Cadho baad ku eryan doontaa oo samadaada hoosteeda iyagaad ka baabbi'in doontaa.