Read KITAB SUCI ZABUR INJIL ZABUR 10 Bible Online

ZABUR 10 - KITAB SUCI ZABUR INJIL bible

ZABUR 10

¹Kembéq Deside jaoq, ya ALLAH dait nyeboq sewaktu kaji pade kebucuq?

²Siq sombongne dengan jahat nindes dengan miskin; menengang ie pade tejeret siq setne mésaq.

³Dengan jahat luwéqan raos mengenai keméléqne saq jahat, dengan serakah ngutuk dait nolaq ALLAH.

⁴Dengan bedose nénten peduli léq ALLAH, lantaran sombongne, ie bepikir Allah nénten araq.

⁵Dengan jahat berhasil léq dalem selapuq usahene; ie nénten kenal atao ngerti hukum ALLAH dait ngeréméhang selapuq musuhne.

⁶Ie bebase léq dalem angenne, “Tiang ndéq gen gagal, dait turun temurun ndéq gen tetimpe siq bahle.”

⁷ Biwih ie pade penoq siq kutukan, dait sumpah senaq, ucapan-ucapanne penoq siq meriq dait kejahatan.

⁸Ie nyeboq léq dése-dése gen nyematéq dengan saq nénten salaq. Maraq singe ie ngantih léq tengaq bebenes nginté dengan saq lemah. Ie ngadang dengan miskin léq taoq saq sepi, baune dait orosne lalo.

¹⁰Ie nunduk, siep nyakrah; ie geriqang dengan siq kekerasan.

¹¹Ie bebase léq dalem angenne, “Allah sampun lupaq dait nénten merhatiang; jangke seterusne Ie nénten cingakin tiang!”

¹²Silaq bangkit, ya ALLAH, hukum dengan jahat! Iling léq dengan saq tetindes!

¹³Kembéq dengan jahat terus menghine Allah dait bebase léq dalem angenne Allah nénten gen ngukum ie?

¹⁴Laguq Deside cingakin ie; Deside perhatiang kesusahan dait sengsarene, dait tetep siep gen nulung. Dengan saq lemah nyerahang diriq tipaq Deside, Deside tetep nulung dengan saq miskin.

¹⁵Polakang kekuasean dengan jahat dait durhake; hukum ie pade lantaran perbuatanne jangke ie pade jerih.

¹⁶ALLAH mréntah selaéq-laéqne; bangse-bangse saq nénten kenal kance Ie gen musnah léman gumi-Ne.

¹⁷Ya ALLAH, Deside mirengang do'e dengan hine dait neguqang até ie pade.

¹⁸Anak yatim dait dengan saq tetindes Deside béle pelekarene, adéq nénten araq dengan saq petakut ie pade.