Read KITAB SUCI ZABUR INJIL ZABUR 102 Bible Online

ZABUR 102 - KITAB SUCI ZABUR INJIL bible

ZABUR 102

¹Do'e dengan sengsare saq dalem keadaan ndéq bedowé semanget ngeluh tipaq ALLAH.

²Ya ALLAH, pirengang do'e kaji, menengang kuihan kaji rauh léq arepan Deside.

³Sampunang bebalik léman kaji lamun kaji dalem keadaan susah. Pirengang lamun kaji bekuih, dait gelis jawab kaji.

⁴Idup kaji telang maraq pendet; tolang-tolang kaji maraq barak api.

⁵Kaji lemes maraq pupaq gero, dait nénten araq angen bekelor.

⁶Kaji ngeluh siq suare saq beléq; awak kaji karing tolang-tolang doang.

⁷Kaji maraq kedit undan léq padang gurun, maraq kedit kéas léq onos remukan bangunan saq sepi.

⁸Kaji nénten iniq tindoq, maraq kedit saq kesepian léq atep balé.

⁹Sejeloan kaji tehine siq musuh; aran kaji tejariang kutukan siq dengan saq gedek léq kaji.

¹⁰Kaji ngelorang awu-awu maraq ruti, ineman kaji becampur aiq mate,

¹¹séngaq Deside sampun ngangkat dait saut kaji ojok dalem kemenggahan Deside saq ngelaur maraq api.

¹²Idup kaji liwat maraq lingon léq waktu serep jelo; kaji jari layu maraq pupaq.

¹³Laguq Deside, ya ALLAH, Raje selaéq-laéqne, tetep teinget turun-temurun.

¹⁴Deside gen bangkit dait periak tipaq Sion, sampun dateng waktune jari periak léq ie.

¹⁵Séngaq hambe-hambe Deside ngasihin ie, timaq ie sampun jari remuk. Ie pade periak léq ie, timaq ie sampun jari kerepuk.

¹⁶Kuase ALLAH gen tetakutang siq bangse-bangse; dait keagungan-Ne tetakutang siq selapuq raje,

¹⁷lamun ALLAH penganjeng Sion malik, dait penggitan dalem keagungan-Ne.

¹⁸Ie gen mirengang do'e umat-Ne saq sengsare, dait nénten nolaq petunasan ie pade.

¹⁹Pade tulis selapuq perbuatan ALLAH umaq keturunan saq dateng mudian, adéq bangse saq ndéqman teanakang bau memuji Ie.

²⁰ALLAH merhatiang léman taoq-Ne saq suci saq araq léq atas, léman sorge Ie cingakin ojok gumi

²¹jari pirengang keluhan dengan saq tebui dait bébasang dengan saq tehukum maté.

²²Make peséngan-Ne gen teceriteang léq Sion, dait Ie gen tepuji-puji léq Yerusalem,

²³waktu bangse-bangse dait kerajaan-kerajaan bekumpul jari bebakti tipaq ALLAH.

²⁴ALLAH molakang kekuatan tiang waktu tiang masih bajang, dait kontéqang umur tiang.

²⁵Beterus tiang matur, “Ya Allah sampunang bait nyawen kaji léq tengaq-tengaq idup kaji.” Ya ALLAH, Deside idup selaéq-laéqne,

²⁶ laéq Deside cipteang gumi; langit éndah Deside saq nyipteang.

²⁷Selapuq nike gen musnah, laguq Deside tetep araq; selapuq nike gen lebung maraq kelambi. Deside netéh ie maraq kelambi saq sampun letaq, terus selapuqne gen musnah.

²⁸Laguq Deside tetep pade, idup Deside nénten araq tutuqne.

²⁹Anak hambe-hambe Deside gen idup tentrem, dait anak bai ie pade tetep aman dalem perlindungan Deside.