Read KITAB SUCI ZABUR INJIL ZABUR 103 Bible Online

ZABUR 103 - KITAB SUCI ZABUR INJIL bible

ZABUR 103

¹Léman Daud. Pade puji ALLAH, hai jiwen tiang, sepenoq batin tiang, pade puji peséngan-Ne saq suci.

²Pade puji ALLAH, hai jiwen tiang, ndaq lupaqang selapuq kesolahan-Ne!

³Ie saq ngampunin selapuq dosende, saq nyelahang selapuq penyakitde.

⁴Ie saq nebus nyawende léman kuburan, saq ngelimpahin side siq kasih dait belas kasihan.

⁵Ie saq muasang idupde siq hal saq solah, sehingge mase bajangde tejariang baru maraq kedit rajewali.

⁶ALLAH ngelaksaneang hukum dait keadilan tipaq selapuq dengan saq tetindes.

⁷Ie nyatayang rencane-Ne tipaq Musa dait perbuatan-perbuatan-Ne tipaq bangse Israel.

⁸ Séngaq ALLAH pengasih dait penyayang, Ie penyabar dait kasih-Ne belimpah.

⁹Ie nénten terus-terusan nuntut, dait nénten menggah selaéq-laéqne.

¹⁰Ie nénten ngukum ite setimpal kance dosente, atao bales ite setimpal kance kesalaqante.

¹¹Laguq maraq atasne langit léman gumi, maraq nike beléq kasih-Ne tipaq dengan saq takut léq Ie.

¹²Maraq jaoqne Timuq léman Bat, maraq jaoq nike Ie jaoqang ite léman dose-dosente.

¹³Maraq sopoq bapaq ngasihin bije-bijene, maraq nike ALLAH ngasihin dengan saq takut léq Ie.

¹⁴Séngaq ALLAH wikan léman napi ite tepiaq, Ie iling bahwe ite niki cume kerepuk.

¹⁵Manusie idupne singket maraq pupaq; ie bekembang maraq kembang léq lendang;

¹⁶lamun tetiup siq angin, ie telang, malahan mbé taoqne ndéq tetaoq malik.

¹⁷Laguq ALLAH léman selaéq-laéqne jangke selaéq-laéqne ngasihin dengan saq takut léq Ie, dait keadilan-Ne tetep turun-temurun

¹⁸tipaq dengan saq betegelan léq perjanjian-Ne, dait siq setie ngelaksaneang préntah-Ne.

¹⁹ALLAH mréntah léq sorge, Ie raje saq bekuase léq atas selapuq-lapuqne.

²⁰Pade puji ALLAH, hai malaékat-malaékat-Ne saq perkase, saq dengahang dait ngelaksaneang manik-Ne.

²¹Pade puji ALLAH, hai selapuq mahluk léq sorge, selapuq hambe-Ne saq ngelaksaneang pekayunan-Ne.

²²Pade puji ALLAH, hai selapuq ciptean léq selapuq wilayah kekuasean-Ne. Pade puji ALLAH, hai jiwen tiang!