Read KITAB SUCI ZABUR INJIL ZABUR 104 Bible Online

ZABUR 104 - KITAB SUCI ZABUR INJIL bible

ZABUR 104

¹Pade puji ALLAH, hai jiwen tiang! Tetu-tetu agung Deside, ya ALLAH, Tuhan kaji! Deside ngadu kuace kemegahan dait kemuliean,

²dait bekelumbung siq cahaye. Deside pentangang langit maraq kémah,

³dait penganjeng Gedéng Deside léq atas aiq léq langit. Deside jariang awan-awan jari keréte Deside, Deside nunggang keléték angin.

⁴ Angin Deside jariang utusan Deside, dait kisap jari pelayan Deside.

⁵Siq kukuhne Deside masang gumi léq dasarne, sehingge nénten gen inggur selaéq-laéqne.

⁶Deside kelumbungin siq segare saq galuh, aiqne jangke dateng pucuk-pucuk gunung.

⁷Waktu Deside semprak, aiq nike ngélék, ngélékne deres lantaran suare guntur Deside.

⁸Aiq ngélék liwatin gunung-gunung ojok tembéréng, ojok taoq saq Deside sedieang umaq ie.

⁹Deside nentuang bates-bates saq nénten kanggo ie liwatin, adéq ndaq tulak nguneng léq gumi.

¹⁰Deside toloq pengembulan aiq ojok dalem tembéréng-tembéréng, anak kokoq ngélék léq antare bukit-bukit,

¹¹jari ngebéng nginem selapuq binatang léq lendang, dait nelangang bedak bagal-bagal gawah.

¹²Léq dékétne kedit-kedit miaq kesebu; ie pade muni léq antare daun-daun.

¹³Léman langit Deside nurunang ujan léq pegunungan, gumi penoq siq hasil karye Deside.

¹⁴Deside niwoqang pupaq umaq héwan, dait segale macem tetaletan umaq manusie. Make ie bau betaletan,

¹⁵dait ngasilang aiq anggur saq nyenengang angen manusie. Maraq nike éndah minyak zaitun saq miaq muene seger, dait keloran saq miaq ie bedowé balung.

¹⁶Leloloan ALLAH mauq ujan saq belimpah lolo cemare Libanon saq Ie talet mésaq.

¹⁷Léq derike kedit-kedit miaq kesebu, kedit ranggung bekesebu léq pucukne.

¹⁸Gunung-gunung saq atas jari taoq bémbéq gawah; kancil nyeboq léq batu karang.

¹⁹Deside miaq bulan jari tande waktu, jelo sampun nenaoq piran waktune gen serep.

²⁰Lamun Deside nurunang peteng, kenjelo jari kekelem, dait selapuq binatang gawah ngelamang.

²¹Singe-singe mendare ngaum boyaq mangse, nunas kakenan saq tesedieang siq Allah.

²²Lamun tiwoq jelo, ie pade mirik dait begélaq léq taoqne nyeboq.

²³Beterus manusie sugul jari ngelaksaneang pegawéanne, dait begawéan jangke sandikale.

²⁴Luwéq gati karye Deside, ya ALLAH, selapuqne Deside cipteang secare bijaksane; gumi penoq siq ciptean Deside.

²⁵Pade serioq segare saq mentang, dait mahluk saq beléq kodéq nénten bau terékéng.

²⁶ Léq derike kapal-kapal belayar, dait Lewiatan, nage segare ciptean Deside, pade bekedék.

²⁷Ie pade selapuq beharep léq Deside, jari mauq keloran léq waktune.

²⁸Deside ngicanin, dait ie pade saq ngumpulang, Deside saq nyedieang, dait ie pade saq ngelorang jangke puas.

²⁹Lamun Deside bebalik, ie pade takut; lamun Deside bait embokne, ie pade binase, dait tulak jari kerepuk maraq semule.

³⁰Laguq lamun Deside ngicanin Roh Deside, ie pade tecipte; Deside ngicanin idup baru tipaq gumi.

³¹Semoge keagungan ALLAH tetep selaéq-laéqne! Semoge Ie seneng léq selapuq ciptean-Ne!

³²Ie merhatiang gumi sehingge gumi ngijik, Ie kintur gunung-gunung, sehingge sugul pendetne.

³³Tiang mélé benyanyi bagi ALLAH seumur idup tiang, nyanyiang pujian bagi Allah tiang semasih tiang araq.

³⁴Semoge nyanyian tiang nyenengang Ie. Tiang mélé besukecite lantaran ALLAH.

³⁵Menengang dengan bedose musnah léman gumi, menengang dengan jahat bis binase. Pade puji ALLAH, hai jiwen tiang! Pade puji ALLAH!