Read KITAB SUCI ZABUR INJIL ZABUR 105 Bible Online

ZABUR 105 - KITAB SUCI ZABUR INJIL bible

ZABUR 105

¹Pade besyukur tipaq ALLAH, beriteang keagungan-Ne, ceriteang perbuatan-Ne tipaq bangse-bangse.

²Pade nyanyiang pujian bagi ALLAH, beriteang selapuq karye-Ne saq ajaip.

³Ie ALLAH Saq Mahesuci; pade besukecite séngaq ite dowé-Ne, selapuq saq nyembah harus besukecite.

⁴Pade tunas kekuatan léman Ie, tetep nyembah Ie.

⁵Hai keturunan Ibrahim, hambe-Ne, dait keturunan Yakub, dengan saq Ie piléq, pade inget léq selapuq keajaipan saq Ie piaq, ndaq lupaqang keputusan-keputusan-Ne.

⁷ALLAH nike Tuhante, penghukuman-Ne berlaku léq seantéro dunie.

⁸Ie tetep iling léq perjanjian-Ne selaéq-laéqne, manik saq Ie préntahang tipaq siyu keturunan.

⁹ Perjanjian nike Ie piaq kance Ibrahim, terus kance Ishak;

¹⁰ terus tekukuhang kance Yakub, jari perjanjian saq kekel bagi umat Israel.

¹¹Manik-Ne, “Gumi Kanaan gen Tiang béng tipaq side, jari dowé pusakende.”

¹²Laéq umat Israel idup jari dengan pendateng léq derike jumlah ie pade cume sekediq.

¹³Ie pade ngambar léman bangse saq sopoq ojok bangse saq lain, léman sopoq negeri ojok negeri saq lain.

¹⁴ Laguq ALLAH nénten menengang sai saq nindes ie pade; demi ie pade, Ie hukum raje-raje,

¹⁵“Ndaq ganggu dengan-dengan saq Tiang piléq, ndaq gawéq hal saq jahat tipaq nabi-nabi Tiang!”

¹⁶ ALLAH datengang kelapahan léq negeri nike, dait bait selapuq persediean keloran.

¹⁷ Laguq Ie ngemanikang sopoq dengan senjuluq ie pade, Yusup, saq sampun tejual jari panjak.

¹⁸ Naéne tebelakbak siq ranté besi, belongne tekaduang ranté besi.

¹⁹Ahirne telaksane saq ie ramalang, dait Manik ALLAH buktiang bahwe ie kenaq.

²⁰ Beterus raje Mesir, penguase bangse-bangse, bébasang ie léman bui.

²¹ Ie teserahin tugas ngurus istane, dait tebéng kuase léq selapuq dowé bandene;

²²maraq nike éndah wewenang jari ngatur pegawé-pegawé raje, dait mimpin sesepuh-sesepuh.

²³ Beterus Yakub lumbar ojok Mesir dait ndot léq derike jari dengan pendateng.

²⁴ ALLAH miaq umat-Ne jari sayan luwéq, sehingge ie pade kuatan léman musuhne.

²⁵Ie ngerobah até dengan Mesir sehingge meriq léq umat-Ne, dait ndéq adil merlakuang hambe-hambe-Ne.

²⁶ Terus Ie ngutus Musa, hambe-Ne dait Harun saq Ie piléq.

²⁷Léq Mesir ie pade miaq keajaipan-keajaipan, perbuatan-perbuatan saq beléq léman ALLAH,

²⁸ dait ie pade taat léq préntah-Ne. Beterus ALLAH jariang negeri nike peteng dedet.

²⁹ Kokoq ie pade robah-Ne jari daraq, sehingge selapuq empaqne bis maté.

³⁰ Luwéq gati lépang léq negeri ie pade, malahan tame ojok dalem istane raje.

³¹ Allah bemanik, make kelikit-kelikit pade dateng, dait berangkak-berangkak bekeriwung léq selapuq negeri.

³² Ie nurunang és jari gentiq ujan, dait datengang kisap saq saling samber.

³³Ie ngerobohang lolo anggur dait lolo are, dait ngerebaqang selapuq leloloan ie pade.

³⁴ Allah bemanik, make balang pade dateng, jumlahne luwéq gati jangke ndéq bau terékéng.

³⁵Ie pade ngaken selapuq tetaletan léq lendang, dait ngaken jangke bis selapuq hasil gumi.

³⁶ Beterus matéq-Ne anak mame saq sengake léq sebilang keluarge dengan Mesir.

³⁷ Beterus bangse Israel atong-Ne sugul, ie pade jauq emas dait perak; selapuqne séhat dait kuat.

³⁸Dengan Mesir tetimpe siq rase takut saq beléq; ie pade seneng waktu dengan Israel nyedi.

³⁹ Allah kelat awan jari ngudung umat-Ne, dait api jari penerang léq waktu kelem.

⁴⁰ Ie pade nunas, terus datengang-Ne kedit puyuh, ie pade teicanin ruti léman sorge jangke besuh.

⁴¹ Ie belaq gunung batu, terus sugul aiq saq ngélék maraq kokoq léq padang gurun.

⁴²Séngaq ALLAH iling léq manik-Ne saq suci tipaq Ibrahim, hambe-Ne.

⁴³Make Ie atong umat-Ne siq sukecite, dait dengan-dengan saq Ie piléq siq surak-surakan.

⁴⁴ Tanaq bangse-bangse Ie icanin tipaq ie pade, lendang-lendang ie pade tejariang dowén umat-Ne,

⁴⁵adéq umat-Ne nike taat léq hukum-hukum-Ne dait turut préntah-préntah-Ne. Pade puji ALLAH!