Read KITAB SUCI ZABUR INJIL ZABUR 106 Bible Online

ZABUR 106 - KITAB SUCI ZABUR INJIL bible

ZABUR 106

¹ Pade puji ALLAH! Pade besyukur tipaq ALLAH, séngaq Ie solah; kasih-Ne kekel selaéq-laéqne.

²Sai saq bau nyeriteang keperkasean ALLAH, dait ngaturang pujian saq patut bagi Ie?

³Bahagie dengan saq taat léq préntah-préntah-Ne, dait ngelaksaneang keadilan sebilang waktu.

⁴Iling léq kaji, ya ALLAH, demi kesolahan Deside léq umat Deside, tulung kaji éndah lamun Deside nyelametang ie pade.

⁵Semoge kaji serioq kemakmuran dengan-dengan saq Deside piléq dait besukecite bareng umat Deside. Semoge kaji bangge dait cemoh bareng dengan-dengan saq jari dowén Deside.

⁶Kaji pade sampun bedose maraq leluhur kaji pade; kaji pade sampun gawéq jahat dait durhake.

⁷ Waktu léq Mesir leluhur kaji pade nénten ngerti; perbuatan-perbuatan Deside saq ajaip nénten ie pade pahamin. Ie pade lupaq léq kasih Deside saq belimpah, dait léq dékét Segare Teberau ie pade ngelawan Saq Maheagung.

⁸Laguq ALLAH nyelametang ie pade demi diriq-Ne mésaq, adéq keperkasean-Ne jari nyate.

⁹ Siq préntah-Ne Segare Teberau jari sat, Ie gadingang umat-Ne lampaq liwatin segare, maraq liwatin padang gurun.

¹⁰Siq care nike Ie nyelametang ie pade léman musuh, Ie bébasang ie pade léman kuase musuh.

¹¹Laguq aiq nelepang musuh ie pade; ndéq araq sopoq juaq saq kemadéqan.

¹² Beterus umat-Ne percaye léq selapuq manik-Ne dait nyanyiang Ie pujian.

¹³Laguq ie pade becat ngelupaqang perbuatan ALLAH dait nénten ngantos naséhat-Ne.

¹⁴ Léq padang gurun ie pade terangsang siq napsu, dait nyobe Allah.

¹⁵Ie ngicanin napi saq ie pade tunas, laguq wabah penyakit éndah saq nyerang ie pade.

¹⁶ Léq padang gurun nike ie pade talon até léq Musa dait léq Harun, hambe-Ne saq suci.

¹⁷Beterus gumi belaq dait belet Datan, ngilipang Abiram dait keluargene.

¹⁸Api turun nyamber kelompoq ie pade, ngotongang selapuq dengan saq sampun durhake.

¹⁹ Léq Gunung Sinai ie pade miaq anak sampi léman emas, dait nyembah tetato anak sampi emas nike.

²⁰Ie pade tukah Allah saq agung kance sampi saq ngaken pupaq.

²¹Ie pade lupaq léq Allah penyelamet ie pade saq sampun miaq hal-hal saq beléq léq Mesir.

²²Tetu-tetu ajaip perbuatan-perbuatan-Ne léq negeri nike, luar biase gati napi saq Ie piaq léq Segare Teberau.

²³Make Allah beniat binaseang umat-Ne, laguq teandek siq Musa, dengan saq Ie piléq nike. Musa jari penengaq ie pade, sehingge kemenggahan Allah surut.

²⁴ Beterus ie pade nolaq negeri saq solah nike séngaq ndéq percaye léq manik-Ne.

²⁵Ie pade ngerumun léq dalem kémah ie pade dait ndéq mélé dengahang suare ALLAH .

²⁶Make siq sumpah Ie bejanji gen nyematéq ie pade léq padang gurun.

²⁷ Ie gen tetéh keturunan ie pade léq antare bangse-bangse dait tekelin sopoq kance saq lainne léq negeri-negeri asing.

²⁸ Beterus léq Peor ie pade nyembah Baal, dait ngelorang kurban saq teaturang tipaq déwe-déwe saq ndéq bedowé nyawe.

²⁹Perbuatan nike miaq ALLAH menggah, sehingge ie pade teserang siq wabah saq miaq dengan takut.

³⁰Laguq Pinehas nganjeng ngukum dengan saq salaq, make wabah nike engkah.

³¹Perbuatan nike teanggep jari jasene, dait teinget selaéq-laéqne.

³² Léq lingkoq-lingkoq Meriba ie pade miaq ALLAH menggah, dait nyusahang Musa siq perbuatan ie pade.

³³Ie pade miaq angen Musa jari sepaq, sehingge ie nénten mikirang napi saq ie ucapang.

³⁴ Bangse-bangse lain ndéq ie pade musnahang, maraq saq tepréntah siq TUHAN.

³⁵Malahan ie pade becampur kance bangse-bangse nike, dait turut care-care ie pade.

³⁶Beterus ie pade nyembah berhale-berhale, dait nike jari perangkep ie pade.

³⁷ Ie pade ngurbanang bije-bije ie pade tipaq berhale-berhale Kanaan.

³⁸ Ie pade numpahang daraq dengan saq ndéq salaq, daraq bije-bijene mésaq, tejariang kurban tipaq berhale-berhale; sehingge ie pade najisang negeri nike.

³⁹Lantaran perbuatan-perbuatan nike ie pade jari najis, dait ndéq setie léq Allah.

⁴⁰ Beterus kemenggahan ALLAH bangkit tipaq ie pade, Ie pendaq léq dowé-Ne mésaq.

⁴¹Make serahang-Ne ie pade tipaq bangse-bangse, menengang-Ne ie pade tekuasein siq musuh.

⁴²Beterus ie pade tetindes siq musuh-musuh ie pade, dait tetaklukang léq bawaq kuase ie pade.

⁴³Kereng gati ALLAH bébasang ie pade, laguq ie pade demenan ngelawan, sehingge ie pade binase léq dalem dose-dose ie pade.

⁴⁴Laguq ALLAH mirengang kuihan ie pade, Ie merhatiang kesusahan ie pade.

⁴⁵Demi ie pade Ie iling léq perjanjian-Ne dait sayang léq ie pade lantaran kasih-Ne saq beléq.

⁴⁶Ie miaq ie pade teperiakang siq selapuq dengan saq nahen ie pade.

⁴⁷ Selametang kaji pade, ya ALLAH , Tuhan kaji pade, kumpulang tiang pade léman tengaq-tengaq bangse-bangse, adéq kaji pade bau besyukur dait memuji peséngan Deside saq suci.

⁴⁸Pade puji ALLAH, Tuhan Israel, léman selaéq-laéqne jangke selaéq-laéqne Menengang selapuq dengan bebase, “Amin!” Pade puji ALLAH !