Read KITAB SUCI ZABUR INJIL ZABUR 107 Bible Online

ZABUR 107 - KITAB SUCI ZABUR INJIL bible

ZABUR 107

¹ “Pade besyukur tipaq ALLAH séngaq Ie solah, kasih-Ne kekel selaéq-laéqne.”

²Menengang hal nike teucapang siq dengan-dengan saq tetebus siq ALLAH, saq Ie tebus léman kuase musuh.

³Ie sampun ngumpulang side léman negeri-negeri asing, léman timuq dait bat, lauq dait daye.

⁴Araq saq ngambar léq tanaq lendang saq galuh, dait ndéqne nenaoq langan ojok taoqne ndot léq kote.

⁵Ie pade kelapahan dait bedak dait telang selapuq harepan.

⁶Léq waktu susah ie pade bekuih tipaq ALLAH , dait Ie bébasang ie pade léman kekuatiran.

⁷Ie bimbing ie pade liwatin langan saq lomboq jangke dateng léq kote taoq dengan ndot.

⁸Patut ie pade besyukur tipaq ALLAH lantaran kasih-Ne, lantaran karye-karye-Ne saq ajaip umaq manusie.

⁹Séngaq Ie muasang dengan saq bedak, dait besuhang dengan lapah siq selapuq saq solah.

¹⁰Araq saq tokol léq dalem peteng, dengan tahenan saq menderite siq ranté besi,

¹¹séngaq ie pade sampun ngelawan Allah dait ndéq ngelaksaneang préntah Saq Maheagung.

¹²Ie ngeremukang até ie pade siq begawéan berat; ie pade geriq dait ndéq araq saq nulung.

¹³Léq waktu susah ie pade bekuih tipaq ALLAH, dait bébasang-Ne ie pade léman kesulitan.

¹⁴Ie gadingang ie pade sugul léman peteng, dait molakang ranté besi ie pade.

¹⁵Patut ie pade besyukur tipaq ALLAH lantaran kasih-Ne, lantaran karye-karye-Ne saq ajaip tipaq manusie.

¹⁶Séngaq Ie ngerobohang lawang-lawang tembage, dait ngeremukang palang-palang besi.

¹⁷Araq saq bongoh dait menderite lantaran dose-dose ie pade, dait tesiksaq lantaran kesalaqan ie pade.

¹⁸Ie pade pendaq léq selapuq keloran, ajal ie pade sampun rapet.

¹⁹Léq waktu susah ie pade bekuih tipaq ALLAH, dait bébasang-Ne ie pade léman kesulitan.

²⁰Selahang-Ne ie pade siq manik-Ne, dait luputang-Ne ie pade léman loang kubur.

²¹Patut ie pade besyukur tipaq ALLAH lantaran kasih-Ne lantaran karye-karye-Ne saq ajaip tipaq manusie.

²²Menengang ie pade besyukur jauq persembahan, dait nyeriteang perbuatan-Ne siq lagu-lagu sukecite.

²³Araq malik saq babar segare kadu kapal, jari boyaq napkah léq segare saq galuh.

²⁴Ie pade serioq perbuatan-perbuatan ALLAH , karye-Ne saq ajaip léq segare.

²⁵Atas préntah-Ne angin pusut dateng dait beléqang umbak-umbak.

²⁶Kapal-kapal kerangkatan ojok atas, terus tetimplak ojok dasar segare saq galuh. Telang wanénne dengan-dengan ngadepin bahaye saq beléq maraq nike.

²⁷Ie pade pineng dait sempoyongan maraq dengan bowos dait ndéq araq akal.

²⁸Léq waktu susah ie pade bekuih tipaq ALLAH , dait bébasang-Ne ie pade léman kesulitan.

²⁹Ujan angin saq ngamuk jariang-Ne engkah, umbak-umbak éndah jari tenang.

³⁰Ie pade seneng séngaq angin pusut sampun liwat; gadingang-Ne ie pade ojok pelabuan saq tetuju.

³¹Patut ie pade besyukur tipaq ALLAH lantaran kasih-Ne, lantaran karye-karye-Ne saq ajaip tipaq manusie.

³²Ie pade miaq kesohor keagungan ALLAH léq tengaq umat-Ne, dait memuji Ie léq dalem majelis pare sesepuh.

³³Kokoq-kokoq robah-Ne jari padang gurun pengembulan aiq jari tanaq saq gero.

³⁴Tanaq subur Ie jariang tanaq paéq, lantaran kejahatan dengan-dengan saq ndot léq derike.

³⁵Padang gurun robah-Ne jari telage, tanaq gero jari pengembulan aiq.

³⁶Dengan-dengan lapah Ie toloq léq derike; ie pade miaq kote jari taoq ie pade ndot.

³⁷Ie pade sawur binéq léq lendang-lendang dait nalet lolo anggur, terus ngumpulang hasil saq belimpah.

³⁸ALLAH ngicanin berkah tipaq ie pade sehingge bedowé luwéq bije, dait héwan ie pade bejari.

³⁹Laguq ie pade tekalahang dait jari karing sekediq saq masih lantaran sengsare dait penindesan saq kejem.

⁴⁰ALLAH ngerendahang pare penguase ie pade, dait miaq ie pade ngambar léq tanaq lendang saq galuh saq ndéq araq langanne.

⁴¹Laguq dengan miskin bébasang-Ne léman kesusahan ie pade, keluarge ie pade sayan luwéq maraq kumpulan dombe.

⁴²Serioq hal nike dengan jujur jari cemoh, laguq dengan jahat tetungkem.

⁴³Semoge dengan bijaksane mikirang selapuq hal nike dait ngakuq bahwe ALLAH tetep ngasihin.