Read KITAB SUCI ZABUR INJIL ZABUR 108 Bible Online

ZABUR 108 - KITAB SUCI ZABUR INJIL bible

ZABUR 108

¹Nyanyian. Zabur Daud.

² Atén kaji siep, ya Allah, kaji mélé benyanyi dait memuji Deside. Silaq ures, hai jiwen tiang!

³Pade ures gambus dait kecapi! Tiang mélé nguresang jelo saq gen tiwoq.

⁴Ya ALLAH , kaji mélé besyukur tipaq Deside léq antare bangse-bangse. Kaji melét nyanyiang pujian bagi Deside léq antare umat manusie.

⁵Séngaq kasih Deside beléq jangke dateng langit, dait kesetiean Deside jangke dateng awan.

⁶Ya Allah, nyatayang keagungan Deside léq langit, dait kemuliean Deside léq seantéro gumi.

⁷ Selametang kaji pade siq kuase Deside, jawab do'e kaji pade, adéq dengan-dengan saq Deside kasihin teselametang.

⁸Léman taoq-Ne saq suci Allah bemanik, “Tiang mélé besurak dait bagi-bagiang tanaq Sikem; Lembah Sukot gen Tiang ukur.

⁹Gilead dait Manasye nike dowén Tiang, Epraim songkoq waje Tiang, dait Yehuda tunjang kerajaan Tiang.

¹⁰Laguq Moab nike taoq Tiang bisoq naé; Tiang besurak tande menang ngelawan Pilistea. Tiang saut sepatu Tiang tipaq Edom, jari tande bahwe ie dowén Tiang.”

¹¹Sai saq gen jauq tiang ojok Edom? Sai saq déndén tiang ojok kote saq bepenyengker nike?

¹²Ya Allah, napi Deside nénten bareng kance kaji? Napi Deside nénten maju bareng tentere kaji?

¹³Tulung kaji pade ngelawan musuh, séngaq pertulungan manusie nénten araq manpaatne.

¹⁴Kance Allah, ite gen ngelaksaneang perbuatan-perbuatan gagah perkase, séngaq Ie mésaq gen ngicaq-icaq musuh-musuhte.