Read KITAB SUCI ZABUR INJIL ZABUR 109 Bible Online

ZABUR 109 - KITAB SUCI ZABUR INJIL bible

ZABUR 109

¹Umaq pemimpin kor. Zabur Daud Ya Allah saq tetep kaji puji, sampunang meneng doang.

²Séngaq kaji teserang siq penjahat dait penipu saq nyebarang cerite-cerite duste mengenai kaji.

³Ie pade nyerang kaji siq ucapan-ucapan saq penoq siq meriq, dait nénten araq alasan mélé perang kance kaji.

⁴Ie pade nuduh kaji, timaq kaji ngasihin ie pade, dait sampun do'eang ie pade.

⁵Ie pade bales kesolahan kaji siq kejahatan, dait kasih kaji siq meriq.

⁶Angkat sopoq dengan jahat jari ngadilin ie, menengang ie tetuduh siq musuhne.

⁷Menengang ie teadilin dait tenyatayang salaq, dait menengang do'ene teanggep dose.

⁸ Menengang idupne becat tutuq, dait jabatanne tebait siq dengan lain.

⁹Menengang bije-bijene jari anak yatim, dait seninene jari bebalu.

¹⁰Menengang bije-bijene jari tukang pekir saq ngambar, dait tetundung léman onos remukan baléne.

¹¹Menengang selapuq dowéne tesite siq penagih utang, dait hasil usahene terampas siq dengan.

¹²Sampunang araq saq periak léq ie, atao sayang léq bije-bije saq ie adéqang.

¹³Menengang selapuq keturunanne tebinaseang, dait aranne telupaqang siq keturunan saq dateng mudian.

¹⁴Menengang kejahatan leluhurne tetep teilingang siq ALLAH , dait dose inaqne nénten teapus.

¹⁵Menengang dose ie pade tetep teilingang siq ALLAH , dait nénten araq saq nginget ie pade léq gumi.

¹⁶Séngaq dengan nike nénten uwah inget jari metitoqang kasih sayang. Ie nganiaye dengan miskin dait sengsare, dait nyematéq dengan saq lemah.

¹⁷Ie demen ngutuk; menengang ie mésaq kene kutuk! Ie nénten suke ngebéng berkah, menengang nénten araq berkah umaq ie!

¹⁸Bagi ie ngutuk nike perbuatan biase, pade maraq ie ngadu kelambi. Menengang kutuk nike ngerémbés maraq aiq ojok awakne, dait maraq minyak ojok dalem tolang-tolangne.

¹⁹Menengang kutuk nike ngelipang ie maraq kelambi, dait tetep ngelingkerin ie maraq sabuk.

²⁰Ya ALLAH , timpeang hukuman nike ojok dengan saq nuduh kaji, tipaq dengan saq ngeraosang kaji jahat.

²¹Laguq tulung kaji maraq janji Deside, ya Allah Junjungan kaji Saq Mulie, selametang kaji lantaran kesolahan dait kasih Deside.

²²Séngaq kaji miskin dait sengsare, dait atén kaji bakat jangke dateng dalem.

²³Aroh kaji telang maraq lingon léq waktu sandikale, kaji tekerapang maraq balang.

²⁴Jejengku kaji ngijik lantaran puase, awak kaji jari koyos gati.

²⁵ Dengan-dengan saq serioq kaji menghine kaji sambil ngintek-ngintek.

²⁶Tulung kaji, ya ALLAH Tuhan kaji, selametang kaji sesuai kance kasih Deside.

²⁷Make musuh kaji gen nenaoq bahwe nike perbuatan Deside, bahwe Deside, ALLAH , saq ngelaksaneang hal nike.

²⁸Timaq ie pade ngutuk kaji, semoge Deside ngicanin kaji berkah. Timaq ie pade nyombongang diriq, ie pade gen teperilaq; laguq hambe Deside niki semoge besukecite.

²⁹Menengang dengan-dengan saq nuduh kaji tepenoqin siq kehinean, dait rase ilaq kelumbung ie pade maraq jubah.

³⁰Kaji mélé memuji ALLAH , siq suare saq beléq, miaq Ie kesohor léq tengaq kumpulan dengan luwéq.

³¹Séngaq Ie béle dait nyelametang dengan miskin léman dengan-dengan saq ngukum ie pade siq hukuman maté.