Read KITAB SUCI ZABUR INJIL ZABUR 115 Bible Online

ZABUR 115 - KITAB SUCI ZABUR INJIL bible

ZABUR 115

¹Nénten kaji pade, ya ALLAH , nénten tiang pade, laguq peséngan Deside doang saq harus tepuji, lantaran kasih dait setie Deside.

²Kembéq bangse-bangse pade ngeraos, “Léq mbé Allah ie pade?”

³Tuhante araq léq sorge, Ie ngelaksaneang napi saq Ie kayunang.

⁴ Berhale ie pade léman emas dait perak, saq tepiaq siq ime manusie.

⁵Ie pade bedowé biwih, laguq ndéqne tao ngeraos, bedowé mate, laguq ndéqne tao nyerioq.

⁶Ie pade bedowé kentok, laguq ndéqne tao dedengah, bedowé irung, laguq ndéqne tao ngambuq.

⁷Ie pade bedowé ime, laguq ndéqne tao begasap, bedowé naé laguq ndéqne tao lampaq, dait ndéq araq suare saq sugul léman kerongkonganne.

⁸Semoge maraq nike nasib dengan-dengan saq miaq berhale nike, dait selapuq dengan saq percaye léq ie.

⁹Hai Israel, pade beharep tipaq ALLAH , Ie saq nulung dait ngelindungin side.

¹⁰Hai keturunan Harun, pade beharep tipaq ALLAH, Ie saq nulung dait ngelindungin side.

¹¹Hai selapuq dengan saq takut léq ALLAH, pade beharep léq Ie, Ie saq nulung dait ngelindungin side.

¹²ALLAH iling léq ite dait Ie gen ngicanin ite berkah, Ie gen ngicanin umat Israel berkah dait selapuq imam keturunan Harun.

¹³ Ie gen ngicanin berkah dengan-dengan saq takut léq Ie, timaq saq kodéq atao saq beléq.

¹⁴Semoge ALLAH ngicanin luwéq bije, tipaq side dait keturunande.

¹⁵Semoge side teberkahin siq ALLAH, pencipte langit dait gumi!

¹⁶Langit nike dowén ALLAH, laguq Ie ngicanin gumi tipaq manusie.

¹⁷ALLAH nénten tepuji siq dengan maté, siq dengan saq sampun turun ojok taoq saq sepi.

¹⁸Laguq ite saq idup besyukur tipaq Ie, mangkin dait selaéq-laéqne. Pade puji ALLAH!