Read KITAB SUCI ZABUR INJIL ZABUR 116 Bible Online

ZABUR 116 - KITAB SUCI ZABUR INJIL bible

ZABUR 116

¹Tiang ngasihin ALLAH, séngaq Ie mirengang tiang dait merhatiang petunasan tiang.

²Ie mirengang tiang, sebilang tiang bekuih léq Ie.

³Tiang teancem bahaye maut; rase takut léq maut nimpe tiang, miaq tiang osah dait takut.

⁴Make tiang bekuih tipaq ALLAH, “Ya ALLAH, kaji tunas, selametang kaji!”

⁵ALLAH nike pengasih dait adil; Tuhante penoq siq belas kasihan.

⁶ALLAH meliharaq dengan-dengan sederhane; léq waktu tiang lemah Ie nyelametang tiang.

⁷Tiang tenangang atén tiang, séngaq ALLAH solah léq tiang.

⁸ALLAH sampun ngeluputang tiang léman kematéan; Ie hibur tiang dait nénten menengang tiang geriq.

⁹Make tiang bau nikmatin idup léq dunie niki, léq dalem perlindungan ALLAH.

¹⁰ Tiang tetep percaye, timaq tiang ngeraos, “Tiang niki menderite gati.”

¹¹Léq waktu tiang bingung, tiang ngeraos, “Ndéq araq sopoq dengan juaq saq bau tepercaye.”

¹²Napi saq gen tiang aturang tipaq ALLAH jari bales kesolahan-Ne tipaq tiang?

¹³Tiang gen ngaturang persembahan anggur tipaq ALLAH jari besyukur lantaran pertulungan-Ne.

¹⁴Tiang gen bayah sesangi tiang tipaq ALLAH léq julun selapuq umat-Ne.

¹⁵Beraji gati léq arepan ALLAH kematéan selapuq dengan saq Ie kasihin.

¹⁶Kaji niki hambe Deside, ya ALLAH, maraq inaq kaji, kaji éndah bebakti léq Deside! Deside sampun nyelametang tiang léman kematéan.

¹⁷Kaji gen aturang kurban syukur, sambil bedo'e tipaq ALLAH .

¹⁸Tiang gen bayah sesangi tiang tipaq ALLAH, léq julun selapuq umat-Ne.

¹⁹Saq bekumpul léq leléah Gedéng ALLAH, léq tengaq kote Yerusalem. Pade puji ALLAH!